ରାଜଧାନୀରେ ମର୍ମନ୍ତୁଦ ସଡ଼କ ଦୁର୍ଘଟଣା । ଭୁବନେଶ୍ବର ଶାସ୍ତ୍ରୀନଗର ଛକରେ ବାଇକ ଆରୋହୀଙ୍କୁ ଧକ୍କା ଦେଲା ମର୍ସିଡିଜ କାର୍ । ବାଇକ୍‌ ଧକ୍କା ଦେବା ପରେ ପ୍ରାୟ ୧୦୦ ମିଟର ପର୍ଯ୍ୟନ୍ତ ଘୋଷାଡ଼ି ନେଲା କାର । ଯାହାଫଳରେ ଘଟଣାସ୍ଥଳରେ ହିଁ ବାଇକ୍‌ ଆରୋହୀଙ୍ ମୃତ୍ୟୁ ହୋଇଛି ।

ଏହି ମର୍ମନ୍ତୁଦ ଦୁର୍ଘଟଣାରେ ପ୍ରାଣ ହରାଇଥିବା ଯୁବକ ଜଣକ ହେଉଛନ୍ତି ନୂଆପଲ୍ଲୀ ନୂଆସାହିର ଦେବୀ ପ୍ରସାଦ ରାଉତରାୟ । ସେହିପରି ଦୁର୍ଘଟଣା ବେଳେ କାର ଚଳାଉଥିବା ଜଣେ ଯୁବକ ଏବଂ ଯୁବତୀଙ୍କୁ ଅଟକ ରଖି ଖୋଳତାଡ଼ କରୁଛି ଖାରବେଳ ନଗର ଥାନା ପୋଲିସ ।

ଅଧିକ ପଢ଼ନ୍ତୁ: ମଧ୍ୟରାତ୍ରିରେ ପବ୍‌ରେ ଭୟଙ୍କର ଅଗ୍ନିକାଣ୍ଡ; ୨୭ ଜଣଙ୍କର ଦୁଃଖଦ ମୃତ୍ୟୁ, ୬୦ରୁ ଅଧିକ ଆହତ

ସେପଟେ ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା । ଉତ୍ତ୍ୟକ୍ତ ଲୋକ ଘଟଣାସ୍ଥଳରେ ଦାମୀ ମର୍ସିଡିଜ୍ ଗାଡ଼ିକୁ ଭଙ୍ଗାରୁଜା କରିଥିଲେ । ଯାହାଫଳରେ ଦୁଇ ଘଣ୍ଟାରୁ ଅଧିକ ସମୟ ଧରି ପୋଲିସକୁ ନାକେଦମ ହେବାକୁ ପଡ଼ିଥିଲା । ଅତିରିକ୍ତ ଡିସିପି, ଦୁଇଟି ଜୋନର ଏସିପି, ୪ଟି ଥାନାର ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ । ଏହା ସହ ପୋଲିସ୍‌ ଉପରକୁ ଢେଲା ପଥର ମାଡ଼ କରିଥିଲେ ଉତ୍ୟକ୍ତ ଲୋକ ।

ଏହା ସହ ଯେମିତି ଭିଡ଼ ହିଂସା ନ ହୁଏ ସେଥିପାଇଁ ପୋଲିସ ତ୍ବରିତ ପଦକ୍ଷେପ ନେଇଥିଲା । ଦୁର୍ଘଟଣା ଘଟାଇଥିବା ଗାଡ଼ିକୁ ପୋଲିସ ଟୋଇଂ କରି ଥାନାକୁ ଆଣିଥିଲା । ସେପଟେ ମୃତଦେହକୁ ଜବତ କରି ଶବ ବ୍ୟବଛେଦ ପାଇଁ ପଠାଇଛି ପୋଲିସ । ଆଜି ମୃତକଙ୍କର ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ ।