ଚୀନର ଏକ କୋଇଲା ଖଣିରେ ଗ୍ୟାସ୍‌ ବିସ୍ଫୋରଣରେ ଏଯାବତ ୯୦ ଜଣ ଶ୍ରମିକଙ୍କର ମୃତ୍ୟୁ ହୋଇଛି । ଉତ୍ତର ଚୀନ‌ର ଶାଂକ୍ସି ଅଞ୍ଚଳରେ ଶୁକ୍ରବାର ରାତି ପ୍ରାୟ ୭ଟା ୨୯ରେ ଏହି ଅଘଟଣ ଘଟିଛି । ଦୁର୍ଘଟଣା ସମୟରେ ଖଣିରେ ୨୪୭ ଜଣ ଶ୍ରମିକ କାମ କରୁଥିଲେ । ପ୍ରଥମରୁ ୮ ଜଣଙ୍କର ମୃତ୍ୟୁ ହୋଇଥିବା କୁହାଯାଇଥିଲା, କିନ୍ତୁ ବର୍ତ୍ତମାନ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏବେ ଅନେକ ଶ୍ରମିକ ନିଖୋଜ ଥିବା କୁହାଯାଉଛି ।

ଏହି ଦୁର୍ଘଟଣାକୁ ନେଇ ଚୀନ ରାଷ୍ଟ୍ରପତି ସି ଜିନପିଙ୍ଗ ଚିନ୍ତା ପ୍ରକଟ କରିଥିବାବେଳେ ଉଦ୍ଧାର କାର୍ଯ୍ୟକୁ ଦ୍ୱିଗୁଣିତ କରିବାକୁ ନିର୍ଦ୍ଦେଶ କରିଛନ୍ତି । ଆହତମାନଙ୍କର ଚିକିତ୍ସା ସହିତ ଫସି ରହିଥିବା ଶ୍ରମିକଙ୍କୁ ବୈଜ୍ଞାନିକ ଉପାୟରେ ଯଥାଶୀଘ୍ର ଖୋଜିବା ଏବଂ ପରିସ୍ଥିତିକୁ ପ୍ରଭାବଶାଳୀ ଭାବରେ ପରିଚାଳନା କରିବା ପାଇଁ ସମସ୍ତ ପ୍ରୟାସ ଉପରେ ଜିନପିଙ୍ଗ ଗୁରୁତ୍ୱାରୋପ କରିଛନ୍ତି । ସେ ଏହା ମଧ୍ୟ କହିଛନ୍ତି ଯେ ଦୁର୍ଘଟଣା ପାଇଁ ଦାୟୀ ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ।

ସ୍ଥାନୀୟ ପ୍ରଶାସନ ଉଦ୍ଧାର କାର୍ଯ୍ୟକୁ ତ୍ଵରାନ୍ଵିତ କରିଥିବାବେଳେ ଏବେ ଉଦ୍ଧାର କାର୍ଯ୍ୟ ଜାରି ରହିଛି । ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ଯେ ଏହି ଦୁର୍ଘଟଣା ଗ୍ୟାସ୍‌ ବିସ୍ଫୋରଣରୁ ହୋଇଛି । ଚୀନରେ ପୂର୍ବରୁ ଏପରି ଅନେକ କୋଇଲା ଖଣି ଦୁର୍ଘଟଣା ଘଟୁଥିଲା । ଗତ ୨୦୦୦ ମସିହାଠାରୁ ଦୃଢ ସତର୍କତାମୂଳକ ପଦକ୍ଷେପ ନେବାପରେ ମୃତ୍ୟୁ ସଂଖ୍ୟା ହ୍ରାସ ପାଇଥିଲା । କିନ୍ତୁ ଏବେ ପୁଣିଥରେ ବଡ଼ ଧରଣର ବିସ୍ଫୋରଣରେ ଅନେକ ଶ୍ରମିକଙ୍କ ମୃତ୍ୟୁ ଘଟିଛି ।

• ଶାଂକ୍ସି କୁହାଯାଏ କୋଇଲା ରାଜଧାନୀ

ଚୀନର ସବୁଠାରୁ ଗରିବ ଅଞ୍ଚଳ ମଧ୍ୟରୁ ଗୋଟିଏ, ଶାଂକ୍ସିକୁ ଦେଶର କୋଇଲା ଖଣି ରାଜଧାନୀ ଭାବରେ ବିବେଚନା କରାଯାଏ । ଚୀନରେ ଗତ ଦଶନ୍ଧି ମଧ୍ୟରେ ଖଣି ସୁରକ୍ଷାରେ ଉନ୍ନତି ହୋଇଛି ସତ, କିନ୍ତୁ ଏପରି ଏକ ଶିଳ୍ପରେ ଦୁର୍ଘଟଣା ଏବେ ବି ଘଟୁଛି ଯେଉଁଠାରେ ସୁରକ୍ଷା ପ୍ରୋଟୋକଲ ପ୍ରାୟତଃ ଢିଲା ଏବଂ ନିୟମ ବାହାରେ ବୋଲି କୁହାଯାଉଛି । ପ୍ରାୟ ୩ କୋଟି ୪୦ ଲକ୍ଷ ଜନସଂଖ୍ୟା ବିଶିଷ୍ଟ ଶାଂକ୍ସି ଅଞ୍ଚଳରୁ ଗତ ବର୍ଷ ଲକ୍ଷ ଲକ୍ଷ ଖଣି ଶ୍ରମିକ ୧.୩ ବିଲିୟନ ଟନ୍ କୋଇଲା ବାହାର କରିଥିଲେ, ଯାହା ଚୀନର ମୋଟ କୋଇଲାର ପ୍ରାୟ ଏକ ତୃତୀୟାଂଶ ।

ପଢନ୍ତୁ ଏହି ଖବର: କୋଇଲା ଖଣିରେ ଭୟଙ୍କର ବିସ୍ଫୋରଣ, ୧୦ ମୃତ

• ପୂର୍ବରୁ ବି ଯାଇଛି ଅନେକ ଜୀବନ

ପୂର୍ବରୁ ମଧ୍ୟ ଚୀନରେ ଅନେକ କୋଇଲା ଖଣି ଦୁର୍ଘଟଣା ଘଟିଛି । ୨୦୨୩ ମସିହାରେ, ଉତ୍ତର ଆଭ୍ୟନ୍ତରୀଣ ମଙ୍ଗୋଲିଆରେ ଏକ ଖୋଲା କୋଇଲା ଖଣି ଭୁଶୁଡ଼ି ପଡ଼ିବାରୁ ୫୩ ଜଣଙ୍କ ମୃତ୍ୟୁ ହୋଇଥିଲା । ସେହିପରି ୨୦୦୯ ମସିହାରେ, ଉତ୍ତର-ପୂର୍ବ ହେଲଙ୍ଗଜିଆଙ୍ଗ ପ୍ରଦେଶର ଏକ ଖଣିରେ ବିସ୍ଫୋରଣ ଘଟି ୧୦୦ ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା । ଚୀନ ରେକର୍ଡ ଗତିରେ ନବୀକରଣୀୟ ଶକ୍ତି କ୍ଷମତା ସ୍ଥାପନ କରିବା ସତ୍ତ୍ୱେ ବିଶ୍ୱର ସର୍ବବୃହତ କୋଇଲା ଗ୍ରାହକ ଏବଂ ସର୍ବବୃହତ ଗ୍ରୀନହାଉସ୍ ଗ୍ୟାସ ନିର୍ଗମନକାରୀ ଦେଶ ହୋଇଛି ।