ଭୋପାଳ: ବେପରୁଆ ପୋଲିସ ବାବୁ । ବର୍ଦ୍ଦିରେ ଥିଲେ, ହେଲେ ନିୟମକୁ ଖାତିର୍ ନ ଥିଲା । ମଦ ପିଇ ଗାଡ଼ି ଚଳାଇଲେ, ଏକାଧିକ ଗାଡ଼ିକୁ ଧକ୍କା ଦେବା ପରେ ଶିକ୍ଷକଙ୍କ ଜୀବନ ବି ନେଇଗଲେ । ଏଭଳି ଘଟଣା ଘଟିଛି ମଧ୍ୟପ୍ରଦେଶର ନୀମୁଚର ଜୱାଦ ରୋଡ୍‌ରେ ।

ଯେଉଁଠି ଶାନ୍ତ ଶୁକ୍ରବାରର ସନ୍ଧ୍ଯା ଶୋକରେ ବୁଡ଼ି ଯାଇଛି । ସମସ୍ତଙ୍କ ଆଖି ଆଗରେ ଜଣେ ପୋଲିସ ASI ମଦ୍ୟ ପିଇଥିବା ଅବସ୍ଥାରେ ଏକାଧିକ ଗାଡ଼ିକୁ ଧକ୍କା ଦେଇଛନ୍ତି । ନୀମୁଚର ଭର୍ଭାଡିଆ ଗାଁ ନିକଟରେ ASIଙ୍କ ଗାଡ଼ି ଧକ୍କାରେ ଜଣେ ଶିକ୍ଷକଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସ୍ତ୍ରୀ ଓ ଦୁଇ ସନ୍ତାନ ଗୁରୁତର ଆହାତ ହୋଇଛନ୍ତି ।

ଏଥିସହ ପଢ଼ନ୍ତୁ: ଭାରତୀଙ୍କର କମିଲା ପ୍ରୋଟିନ ସ୍ତର, ହେଲେ ଅସୁସ୍ଥ

ଦୁର୍ଘଟଣାକୁ ଆଖିରେ ଦେଖିଥିବା ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ପୋଲିସ ASI ମନୋଜ ଯାଦବ ନିଶାରେ ଥିଲେ । ତାଙ୍କ ମୁହଁରୁ ମଦର ଦୁର୍ଗନ୍ଧ ଆସୁଥିଲା । ଦ୍ରୁତଗତିରେ ମନୋଜ ଗାଡ଼ି ଚଳାଇବା ସହ ଏଣେତେଣେ ମାଡ଼ି ଯାଉଥିଲେ । ଏକାଧିକ ବାଇକ୍‌କୁ ମନୋଜଙ୍କ ଗାଡ଼ି ଧକ୍କା ଦେଇଥିଲା ।

ସିରିଜ୍ ଦୁର୍ଘଟଣା ପରେ ASI ମନୋଜଙ୍କ ଗାଡ଼ିରୁ ପୋଲିସ ଏକ ମଦ ବୋତଲ ସହ ଖାଲି ଗିଲାସ ଜବତ କରିଛି । ମୃତ ଶିକ୍ଷକ ଜଣଙ୍କ ହେଲେ ଜ୍ଞାନଦ୍ୟୋୟ ITI କଲେଜର ଶିକ୍ଷକ ୪୨ ବର୍ଷୀୟ ଦଶରଥ । ତାଙ୍କ ସ୍ତ୍ରୀ ଲଳିତା ବାଇଙ୍କ ସହ ପୁଅ ହର୍ଷିତ ଓ ଝିଅ ଜୟା ଗୁରୁତର ଆହତ ହୋଇଛନ୍ତି ।

ଦୁର୍ଘଟଣା ପରେ ସ୍ଥାନୀୟ ଲୋକେ ଗୁରୁତରଙ୍କୁ ଜିଲ୍ଲା ହସ୍ପିଟାଲ୍‌ରେ ଭର୍ତ୍ତି କରିଛନ୍ତି । ଡାକ୍ତର ମେଡିକାଲ୍‌ରେ ଦଶରଥଙ୍କୁ ମୃତ ଘୋଷଣା କରିଥିବା ବେଳେ ତାଙ୍କ ସ୍ତ୍ରୀ ଓ ୨ ଛୁଆଙ୍କ ସ୍ଵାସ୍ଥ୍ୟାବସ୍ଥା ଗୁରୁତର ରହିଛି । ସିରିଜ୍ ଦୁର୍ଘଟଣା ପରେ ସ୍ଥାନୀୟ ଲୋକ ରାସ୍ତାରୋକ କରିବା ସହ ମଦୁଆ ପୋଲିସ ଅଧିକାରୀଙ୍କୁ ଗିରଫ ଦାବି କରିଥିଲେ ।

ଏଥିସହ ପଢ଼ନ୍ତୁ: RBIର ବଡ଼ ଘୋଷଣା! ସୁନା ପରି ଏବେ ରୂପାରେ ବି ମିଳିବ ଲୋନ୍, ଜାଣନ୍ତୁ କେତେ ପର୍ଯ୍ୟନ୍ତ ନେଇପାରିବେ ଋଣ?

ରାସ୍ତାରୋକ ସ୍ଥଳରେ ବରିଷ୍ଠ ପୋଲିସ ଅଧିକାରୀ ପହଞ୍ଚିବା ସହ ଲୋକଙ୍କୁ ବୁଝାସୁଝା କରିଥିଲେ । ନୀମୁଚ ଏସ୍‌ପି ASI ମନୋଜ ଯାଦବଙ୍କୁ ନିଲମ୍ବିତ କରିବା ସହ ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି । ମନୋଜଙ୍କ ବିରୋଧରେ ଏକ ଏତଲା ମଧ୍ୟ ଦିଆଯାଇଛି ।

ଏହା ପୂର୍ବରୁ ଗତ ସପ୍ତାହରେ ଭୋପାଳ ଓ ଇନ୍ଦୋରରେ ପୃଥକ ପୃଥକ ସମାନ ଧରଣର ଦୁର୍ଘଟଣା ହୋଇଥିଲା । ସୋମବାର ସନ୍ଧ୍ୟାରେ ITBP ଯବାନ ଦୀପକ ତାଙ୍କ କାରକୁ ଭୋପାଳ ରେଲୱେ ଷ୍ଟେସନ ନିକଟରେ ୪ ପଥଚାରୀଙ୍କ ଉପରକୁ ଚଢ଼ାଇ ଦେଇଥିଲେ । ସେହିଭଳି ଇନ୍ଦୋରର ରାଓଜୀ ବାଜରରେ ବର୍ଦ୍ଦିରେ ଥିବା ୩ ପୋଲିସ କର୍ମଚାରୀ ଏକ ଫାର୍ମାସୀ ବାହାରେ ଦୁଇ ଜଣ ମହିଳାଙ୍କୁ ଧକ୍କା ଦେଇ ଖସି ପଳାଇଥିଲେ ।