ଆଜି ମହାରାଷ୍ଟ୍ରର ଧୁଲେ ନିକଟ ମୁମ୍ବାଇ-ଆଗ୍ରା ହାଇୱେରେ ବଡ଼ ଧରଣର ସଡ଼କ ଦୁର୍ଘଟଣା । ହଠାତ୍ ପଛକୁ ପଛ ପିଟି ହେଲା ଏକାଧିକ ଯାନ । ଦୁର୍ଘଟଣାରେ ଏଯାବତ ୬ଜଣଙ୍କ ମୃତ୍ୟୁ ଘଟିଥିବାବେଳେ ୨୪ରୁ ଅଧିକ ଲୋକ ଆହତ ହୋଇଛନ୍ତି । ଲଲିଙ୍ଗ ଘାଟ ନିକଟରେ ଏକ ଡମ୍ପର ଟ୍ରକ୍ ପ୍ରଥମେ ମାଲବାହୀ ଟ୍ରକକୁ ଧକ୍କା ଦେବା ପରେ ଏହି ଦୁର୍ଘଟଣା ଘଟିଥିଲା । ଜାତୀୟ ରାଜପଥରେ ଯାଉଥିବା ଏକାଧିକ ଗାଡ଼ି ହଠାତ୍ ଭାରସାମ୍ୟ ହରାଇ ପଛକୁ ପଛ ଧକ୍କା ହୋଇଥିଲେ । ଏହାସହିତ ଏକ ଯାତ୍ରୀବାହୀ ବସ୍ ମଧ୍ୟ ଭାରସାମ୍ୟ ହରାଇ ଦୁର୍ଘଟଣାଗସ୍ତ ହୋଇଛି ।

• ୬ ମୃତ, ୨୬ ଆହତ

ଦୁର୍ଘଟଣା ଘଟିବା ପରେ ହାଇୱେ ପାଟ୍ରୋଲିଂ ଟିମ ଓ ଟୋଲ ପ୍ଲାଜା କର୍ମଚାରୀମାନେ ଦୁର୍ଘଟଣାସ୍ଥଳରେ ପହଞ୍ଚିଥିଲେ । ସେମାନଙ୍କ କହିବାନୁସାରେ, ଦୁର୍ଘଟଣା ଘଟିବା ପରେ ସେମାନେ ତୁରନ୍ତ ଦୁର୍ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଠିକ୍ ଏହି ସମୟରେ ମଧ୍ୟପ୍ରଦେଶରୁ ଆସୁଥିବା ଯାତ୍ରୀବାହୀ ବସଟି ଦୁର୍ଘଟଣାଗସ୍ତ ଯାନକୁ ଧକ୍କା ଦେଇଥିଲା । ଫଳରେ ଘରୋଇ ବସର କ୍ୟାବିନରେ ବସିଥିବା କିଛି ଯାତ୍ରୀ ଓ ଉଦ୍ଧାର କାର୍ଯ୍ୟରେ ଲାଗିଥିବା ଜଣେ ଟୋଲ ପ୍ଲାଜା କର୍ମଚାରୀଙ୍କ ମଧ୍ୟ ମୃତ୍ୟୁ ଘଟିଛି । ଆହତ ଯାତ୍ରୀଙ୍କୁ ତୁରନ୍ତ ଚିକିତ୍ସା ପାଇଁ ନିକଟସ୍ଥ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଛି । ଘଟଣାରେ ୬ ଜଣଙ୍କ ମୃତ୍ୟୁ ଘଟିଥିବାବେଳେ ୨୬ ଜଣ ଯାତ୍ରୀ ଆହତ ହୋଇଛନ୍ତି ।

Dhule, Maharashtra: A triple accident at Laling Ghat on the Mumbai-Agra Highway near Dhule killed six people, including a toll worker, and injured 26 others after a bus lost control and hit already crashed vehicles during rescue operations pic.twitter.com/9tNIdBR8c1

— IANS (@ians_india) May 25, 2026

ପୋଲିସ ଓ ଉଦ୍ଧାରକାରୀ ଟିମ ମଧ୍ୟ ଘଟଣା ସମ୍ପର୍କରେ ଖବର ପାଇବା ପରେ ତୁରନ୍ତ ଦୁର୍ଘଟଣାସ୍ଥଳରେ ପହଞ୍ଚିଥିଲେ । ଦୁର୍ଘଟଣା ଯୋଗୁଁ ହାଇୱେରେ ଯାତାୟାତ ମଧ୍ୟ ବାଧାପ୍ରାପ୍ତ ହୋଇଛି । ଦୁର୍ଘଟଣାରେ ଭାଙ୍ଗିଯାଇଥିବା ଗାଡ଼ିଗୁଡ଼ିକ ରାସ୍ତା ଉପରୁ ହଟାଯାଉଛି । ପୋଲିସ ଦୁର୍ଘଟଣାର କାରଣ ଖୋଜୁଥିବା କହିଛି । ପ୍ରାଥମିକତା ଭାବେ ରାସ୍ତାରେ ଭିଡ଼ ହଟାଇବାକୁ ଗୁରୁତ୍ଵ ଦିଆଯାଇଛି ।

• ପୃଥକ ଦୁର୍ଘଟଣାରେ ୮ ମୃତ

ମହାରାଷ୍ଟ୍ରର ରାୟଗଡ଼ ଜିଲ୍ଲାରେ ଆଉ ଏକ ପୃଥକ ଦୁର୍ଘଟଣାରେ ୮ ଜଣଙ୍କର ମୃତ୍ୟୁ ଘଟିଛି, ଯେତେବେଳେ ଏକ ଯାନ ଘାଟିକୁ ଖସିପଡ଼ିଥିଲା । ଉଦ୍ଧାରକାରୀ ଟିମ ଘଟଣାସ୍ଥଳରେ ପହଞ୍ଚି ଦୁଇଟି ମୃତଦେହକୁ ଉଦ୍ଧାର କରିଥିବାବେଳେ ଶବ ବ୍ୟବଚ୍ଛେଦ ପାଇଁ ପଠାଇଛି । ଘାଟିଟି ଗଭୀର ଓ ଦୁର୍ଗମ ହୋଇଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଥିବା ଉଦ୍ଧାରକାରୀ ଟିମ କହିଛି ।