ୱାଶିଂଟନ: ଆମେରିକାର ମିଆମି ଅନ୍ତର୍ଜାତୀୟ ବିମାନବନ୍ଦରରେ ବଡ଼ ଅଘଟଣ । ରନୱେରେ ନୁହେଁ, ବରଂ ବିମାନ ଚଳାଚଳ ପାଇଁ ଉଦ୍ଦିଷ୍ଟ ଟ୍ୟାକ୍ସିୱେରେ ଦୁଇଟି ବିମାନ ମଧ୍ୟରେ ଧକ୍କା ହୋଇଛି । ଏହି ଦୁର୍ଘଟଣାରେ ଦୁଇ ଜଣ ଆହତ ହୋଇଥିବା ସୂଚନା ମିଳିଛି । ଶନିବାର ରାତି ପ୍ରାୟ ୯ଟା ୧୫ ମିନିଟ୍ ସମୟରେ ଏହି ଘଟଣା ଘଟିଥିଲା । ପାନାମା ସିଟିରୁ ୧୬୬ ଜଣ ଯାତ୍ରୀ ଏବଂ ୬ ଜଣ କ୍ରୁ ସଦସ୍ୟଙ୍କୁ ନେଇ ଆସିଥିବା କୋପା ଏୟାରଲାଇନ୍ସର ବୋଇଂ ୭୩୭ ବିମାନଟି ଟ୍ୟାକ୍ସିୱେରେ ଯାଉଥିବା ବେଳେ UPS କମ୍ପାନୀର ଏକ ବୋଇଂ ୭୬୭ କାର୍ଗୋ ବିମାନ ସହ ଧକ୍କା ହୋଇଥିଲା । କୋପା ଏୟାରଲାଇନ୍ସ ବିମାନର ଡେଣାର ଅଗ୍ରଭାଗ କାର୍ଗୋ ବିମାନର ଆଗ ଅଂଶରେ ବାଜିଥିଲା ।
ଘଟଣା ପରେ କୋପା ଏୟାରଲାଇନ୍ସ ବିମାନଟି ଟର୍ମିନାଲରେ ପହଞ୍ଚିବା ପରେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ଓହ୍ଲାଇ ଦିଆଯାଇଥିଲା । ଏହି ଦୁର୍ଘଟଣାରେ ୨ ଜଣ ଯାତ୍ରୀ ଆହତ ହୋଇଥିବା ବେଳେ ବିମାନବନ୍ଦରର ମେଡିକାଲ ଟିମ୍ ସେମାନଙ୍କୁ ପ୍ରାଥମିକ ଚିକିତ୍ସା ଯୋଗାଇଥିଲା । ପ୍ରାଥମିକ ଭାବେ ଆଘାତ ସାମାନ୍ୟ ବୋଲି କୁହାଯାଇଛି । ଅନ୍ୟ ଯାତ୍ରୀ ଏବଂ ୬ ଜଣ କ୍ରୁ ସଦସ୍ୟ ସୁରକ୍ଷିତ ଥିବା ଏୟାରଲାଇନ୍ସ ପକ୍ଷରୁ କୁହାଯାଇଛି।
- ବିମାନ ପାଇଲଟଙ୍କ ରେଡିଓ ବାର୍ତ୍ତା ଭାଇରାଲ
ଏହି ଦୁର୍ଘଟଣା ପରେ ଏୟାର ଟ୍ରାଫିକ୍ କଣ୍ଟ୍ରୋଲ୍ ସହ ବିମାନ ପାଇଲଟଙ୍କ କଥାବାର୍ତ୍ତାର ଏକ ଅଡିଓ ରେକର୍ଡିଂ ସାମ୍ନାକୁ ଆସିଛି । କୋପା ଏୟାରଲାଇନ୍ସର ପାଇଲଟ୍ କଣ୍ଟ୍ରୋଲ୍ ରୁମ୍କୁ ସୂଚନା ଦେଇ କହିଥିଲେ, 'କେହି ଆମକୁ ଧକ୍କା ଦେଲେ।' ଏହାପରେ UPS ବିମାନର ପାଇଲଟଙ୍କୁ ଏନେଇ ପଚରାଯିବାରୁ ସେ କହିଥିଲେ ଯେ, ବିମାନଟି ଆଗକୁ ଅଧିକ ଚାଲିଯାଇଥିଲା ଏବଂ କୋପା ବିମାନର ଡେଣା ତାଙ୍କ ବିମାନରେ ବାଜିଥିଲା । ପରବର୍ତ୍ତୀ ସମୟରେ କୋପା ବିମାନର ପାଇଲଟ୍ ବାମ ପାର୍ଶ୍ୱ ଡେଣାର ଅଗ୍ରଭାଗ କ୍ଷତିଗ୍ରସ୍ତ ହୋଇଥିବା ଆଶଙ୍କା ପ୍ରକାଶ କରିଥିଲେ ।
- ଦୁର୍ଘଟଣା ବେଳେ ବିମାନ ଭିତରେ ଥିଲେ ୧୬୬ ଯାତ୍ରୀ
ବିମାନରେ ଥିବା ଜଣେ ଯାତ୍ରୀ ସିଜାର ଫେରେରା ଗଣମାଧ୍ୟମକୁ ନିଜର ଅନୁଭୂତି ବଖାଣିଛନ୍ତି । ତାଙ୍କ କହିବା ଅନୁସାରେ, ବିମାନଟି ସ୍ୱାଭାବିକ ବେଗରେ ଟ୍ୟାକ୍ସିୱେରେ ଯାଉଥିବା ବେଳେ ହଠାତ୍ ଯାତ୍ରୀଙ୍କ ମଧ୍ୟରେ ହୋହଲ୍ଲା ଶୁଣିବାକୁ ମିଳିଥିଲା । ଏହାପରେ ଏକ ବଡ଼ ଧକ୍କା ଅନୁଭବ ହୋଇଥିଲା ଏବଂ ବିମାନଟି ହଠାତ୍ ଦୋହଲି ଯାଇଥିଲା । କିଛି ଯାତ୍ରୀ ଭୟଭୀତ ହୋଇପଡ଼ିଥିବା ବେଳେ କ୍ରୁ ସଦସ୍ୟମାନେ ତୁରନ୍ତ ସମସ୍ତଙ୍କୁ ନିଜ ନିଜ ସିଟ୍ରେ ବସି ରହିବାକୁ କହିଥିଲେ ।
- ୨ମାସ ଭିତରେ ଦ୍ୱିତୀୟ ବଡ଼ ଦୁର୍ଘଟଣା
ଗତ ଦୁଇ ମାସ ମଧ୍ୟରେ ମିଆମି ଅନ୍ତର୍ଜାତୀୟ ବିମାନବନ୍ଦରରେ ଏହା ଦ୍ୱିତୀୟ ବଡ଼ ଅଘଟଣ । ସେପ୍ଟେମ୍ବର ୬ ତାରିଖରେ ଏକ ଆମାଜନ୍ କାର୍ଗୋ ବିମାନ ରନୱେରୁ ବାହାରି ଯାଇ ଦୁଇଟି ଗାଡ଼ିକୁ ଧକ୍କା ଦେଇଥିଲା । ଏହି ଦୁର୍ଘଟଣା ପରେ ବିମାନଟିରେ ନିଆଁ ଲାଗିଯାଇଥିଲା । ଫଳରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ଆଉ ୫ ଜଣ ଆହତ ହୋଇଥିଲେ।
ପଢନ୍ତୁ ଏହି ଖବର: ଯମୁନା ଏକ୍ସପ୍ରେସୱେରେ ଚଳନ୍ତା ବସ୍ରେ ଭୟଙ୍କର ନିଆଁ… ୪୦ ଯାତ୍ରୀଙ୍କୁ ବଞ୍ଚାଇଦେଲେ ଡ୍ରାଇଭର- ଆମେରିକାରେ ବିମାନ ଚଳାଚଳରେ ବଡ଼ ବିଭ୍ରାଟ
ଅନ୍ୟପଟେ ଆମେରିକାରେ ଶୁକ୍ରବାର ଦେଖାଦେଇଥିବା ବିମାନ ଚଳାଚଳ ବିଭ୍ରାଟର ପ୍ରଭାବ ଏବେ ବି ଜାରି ରହିଛି । ଏୟାର ଟ୍ରାଫିକ୍ କଣ୍ଟ୍ରୋଲରଙ୍କ ଯୋଗାଯୋଗ ବ୍ୟବସ୍ଥାରେ ତ୍ରୁଟି ଯୋଗୁଁ ଆମେରିକାର ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ ପକ୍ଷରୁ ପ୍ରାୟ ପାଞ୍ଚ ଘଣ୍ଟା ପାଇଁ ବିମାନ ଚଳାଚଳ ଉପରେ ଗ୍ରାଉଣ୍ଡ ଷ୍ଟପ୍ ଲଗାଯାଇଥିଲା । ଏହାଦ୍ୱାରା ୨୦ ହଜାରରୁ ଅଧିକ ବିମାନ ପ୍ରଭାବିତ ହୋଇଥିବା ଖବର ମିଳିଛି । ଏକ ସରକାରୀ ଠିକାଦାର ସଂସ୍ଥା L3Harris ଦ୍ୱାରା ସ୍ଥାପିତ ଏକ ରାଉଟରରେ ତ୍ରୁଟି ଯୋଗୁଁ ଏହି ବିଭ୍ରାଟ ଘଟିଥିବା ଆଶଙ୍କା କରାଯାଉଛି । ତେବେ ଲଗାତାର ବିମାନ ଦୁର୍ଘଟଣା ଏବଂ ଯୋଗାଯୋଗ ବ୍ୟବସ୍ଥାରେ ବିଭ୍ରାଟ ଆମେରିକାର ବିମାନ ସୁରକ୍ଷାକୁ ନେଇ ନୂଆ ପ୍ରଶ୍ନ ସୃଷ୍ଟି କରିଛି ।
