ଅର୍ଗସ ବ୍ୟୁରୋ: ବାତ୍ୟା ଦାନାକୁ ନେଇ ପାଣିପାଗ ବିଭାଗ ଦେଲା ବଡ଼ ଅପଡେଟ୍ । କାରଣ ଲ୍ୟାଣ୍ଡଫଲ ପରେ ରିକର୍ଭ କରିବ ଭୀଷଣ ବାତ୍ୟା । ରିକର୍ଭ କରି ଆଭ୍ୟନ୍ତରୀଣ ଓ ଦକ୍ଷିଣ ଓଡିଶା ମୁହାଁଇବ ଦାନା । ଯାହାର ପ୍ରଭାବରେ ଉତ୍ତର ଉପକୂଳ ଓଡ଼ିଶା ସହ ଆଭ୍ୟନ୍ତରୀଣ ଓ ଦକ୍ଷିଣ ଓଡ଼ିଶାରେ ହେବ ପ୍ରବଳ ବର୍ଷା । ଏଠାରେ ଆମେ ସ୍ପଷ୍ଟ ଭାବରେ କହିରଖୁଛୁ କି, ୩ ଦିନ ତଳେ ଅର୍ଗସ ପୋଡକାଷ୍ଟର କାର୍ଯ୍ୟକ୍ରମରେ ଏନେଇ ସ୍ପଷ୍ଟ କରାଯାଇଥିଲା କି ବାତ୍ୟା ପଛକୁ ଫେରିବ । ମଧ୍ୟପ୍ରଦେଶ ଉପରେ ଆଉ ଏକ ଘୂର୍ଣ୍ଣୟମାନ ବାୟୁବଳୟ ପ୍ରଭାବରେ ଦାନା ପଛକୁ ଫେରିବା ପାଇଁ ବାଧ୍ୟ ହେବ ।
ବର୍ତ୍ତମାନ ସୁଦ୍ଧା ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ, ଭୀଷଣ ବାତ୍ୟା ଏବେ ପାରାଦୀପ ଠାରୁ ୨୬୦ କିମି ଦକ୍ଷିଣ ପୂର୍ବରେ ରହିଛି । ସେହିପରି ଧାମରା ବନ୍ଦରଠାରୁ ୨୯୦ କିମି ଦକ୍ଷିଣ ପୂର୍ବରେ ରହିଛି ବାତ୍ୟା ରହିଛି । ଗତ ୬ ଘଣ୍ଟା ହେବ ଘଣ୍ଟାପ୍ରତି ୧୨ କିମି ବେଗରେ ଗତି କରୁଛି ଦାନା । ଆଜି ମଧ୍ୟରାତ୍ରରେ ଭିତରକନିକା ଏବଂ ଧାମରା ମଧ୍ୟରେ ଲ୍ୟାଣ୍ଡଫଲ କରିପାରେ । ଲ୍ୟାଣ୍ଡଫଲ ପରେ ଭଦ୍ରକରୁ ଦିଗ ବଦଳାଇ ଆଭ୍ୟନ୍ତରୀଣ ଓ ଦକ୍ଷିଣ ଓଡିଶା ଆଡକୁ ମୁହାଁଇବ । କିନ୍ତୁ ସେତେବେଳକୁ ତାହାର ଶକ୍ତି ଧୀରେ ଧୀରେ ହ୍ରାସ ପାଇ ଆସୁଥିବ । ବାତ୍ୟା ପ୍ରଭାବରେ ଆଜି ଜଗତସିଂହପୁର, କେନ୍ଦ୍ରାପଡା, ଭଦ୍ରକ, ବାଲେଶ୍ବର,ମୟୂରଭଞ୍ଜ, କେନ୍ଦୁଝର, ଯାଜପୁର, କଟକ, ଖୋର୍ଦ୍ଧାରେ ଭୀଷଣ ବର୍ଷା ହେଉଛି । କାଲିଠୁ ସୁନ୍ଦରଗଡ, ଝାରସୁଗୁଡା, ସମ୍ବଲପୁର, ଦେବଗଡ଼, ବୌଦ୍ଧ, ନୟାଗଡ଼ ଦେଇ ଅତିକ୍ରମ କରିବ ବାତ୍ୟାର ଅଂଶ, ଯାହା ଫଳରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି ।
ବାତ୍ୟା ପ୍ରଭାବରେ ଏବେଠୁ ଅଶାନ୍ତ ହେଲାଣି ସମୁଦ୍ର । ପାରାଦୀପରୁ ଧାମରା ସବୁଠି ଉଚ୍ଚ ଜୁଆର ଉଠିବା ନେଇ ସମ୍ଭାବନା ରହିଛି । ହେଲେ ଏବେଠୁ ସମୁଦ୍ରରେ ଉଚ୍ଚଉଚ୍ଚ ଜୁଆର ମାଡ଼ି ଆସୁଛି । ସୂଚନା ଅନୁସାରେ, ପାରାଦ୍ଵୀପରେ ସର୍ବାଧିକ ବର୍ଷା ୫୧ ମିଲିମିଟର ହୋଇଥିବା ବେଳେ ଚାନ୍ଦବାଲିରେ ୩୯ ମିଲିମିଟର ବର୍ଷା ରେକର୍ଡ ହୋଇଛି । ଏହାସହ ପୁରୀରେ ୪.୮ ମିଲିମିଟର ବର୍ଷା ରେକର୍ଡ ହୋଇଛି । ସେପଟେ, ଜଗତସିଂହପୁରରେ ୦.୫ ରୁ ୧ ମିଟର ଜୁଆର ଉଠିବା ସହିତ ବାଲେଶ୍ଵର ଓ ପୁରୀରେ ୧ ରୁ ୨ ମିଟର ଜୁଆର ଉଠିବାର ସମ୍ଭାବନା ରହିଛି ।