ଅର୍ଗସ ବ୍ୟୁରୋ : ଡ୍ରାଗନକୁ ଭାରତର କଡ଼ା ଜବାବ । ସୀମାନ୍ତ ଅରୁଣାଚଳ ପ୍ରଦେଶକୁ କଜବା କରିବାକୁ ନୂଆ ଷଡ଼ଯନ୍ତ୍ର କରୁଛି ଚୀନ । କଳେବଳେକୌଶଳେ ଅରୁଣାଚଳ ପ୍ରଦେଶ କବ୍ଜା କରିବାକୁ ସୀମାନ୍ତବର୍ତ୍ତୀ ୩୦ଟି ସ୍ଥାନର ନାଁ ବଦଳାଇ ଦେଇଛି ଡ୍ରାଗନ । ଚୀନର ଏପରି ଷଡ଼ଯନ୍ତ୍ରକୁ ଦୃଢ଼ ବିରୋଧ କରିବା ସହ ବେଜିଂକୁ ଜବାବ ଦେଇଛନ୍ତି ବୈଦେଶିକ ମନ୍ତ୍ରୀ ଏସ ଜୟଶଙ୍କର ।
ବେଜିଂ ନୂଆ ନାଁ ତାଲିକା ଜାରି କରିବା ପରେ ଚୀନ୍ ଉପରେ ବର୍ଷିଛି ଭାରତ । ଅରୁଣାଚଳ ପ୍ରଦେଶ ଉପରେ ନିଜର ଦାବି ଜାହିର କରିବାକୁ ଯାଇ ବେଜିଂ ରାଜ୍ୟର ୩୦ଟି ସ୍ଥାନର ନୂଆ ନାଁର ଚତୁର୍ଥ ତାଲିକା ଜାରି କରିଛି । ଏପରି ନିଷ୍ପତ୍ତିକୁ ଚୀନର ମୁର୍ଖାମୀ କହି ସମାଲୋଚନା କରିଛନ୍ତି ବୈଦେଶିକ ମନ୍ତ୍ରଣାଳୟ ମୁଖପାତ୍ର ରଣଧୀର ଜୟସ୍ବାଲ ।
ଅଧିକ ପଢନ୍ତୁ ଭାରତ ଖବର
ଅରୁଣାଚଳ ପ୍ରଦେଶ ଭାରତର ଏକ ଅବିଚ୍ଛେଦ୍ୟ ଅଙ୍ଗ ଥିଲା, ଅଛି ଆଉ ରହିବ ବୋଲି ସେ କହିଛନ୍ତି । ଗୁଜରାଟ ଗସ୍ତରେ ଥିବା ଜୟଶଙ୍କର ମଧ୍ୟ ସାମ୍ବାଦିକ ସମ୍ମିଳନୀରେ ଚୀନ ବିରୋଧରେ ବର୍ଷିଛନ୍ତି । ନିକଟରେ ଅରୁଣାଚଳ ପ୍ରଦେଶର ୧୧ଟି ଆବାସିକ ଅଞ୍ଚଳ, ୧୨ଟି ପାହାଡ, ୪ଟି ନଦୀ, ଗୋଟିଏ ହ୍ରଦ, ଗୋଟିଏ ଅଣ୍ଡରପାସ୍ ଓ ଏକ ଖୋଲା ଜମିର ନାଁ ବଦଳାଇ ଥିଲା ଚୀନ ।