ଅର୍ଗସ ବ୍ୟୁରୋ: କଲେଜ୍ରେ କେମିତି ସୁରକ୍ଷିତ ରହିବେ ଛାତ୍ରୀ ? କେମିତି ଭଲରେ ପାଠପଢା ହେବ ବିନା କୌଣସି ବାଧାରେ ସେନେଇ ରାଜ୍ୟ ସରକାର ବଡ଼ ପଦକ୍ଷେପ ନେଇଛନ୍ତି । ଖାସ କରି କଲେଜ୍ରେ ଆଭ୍ୟନ୍ତରୀଣ ଅଭିଯୋଗର ଶୁଣାଣି କରିବାକୁ କମିଟି ଗଠନ କରିବାକୁ ନିର୍ଦ୍ଦେଶ ଜାରି ହୋଇଛି । ଏହି କମିଟିରେ କେବଳ ଅଧ୍ୟାପକ, ଅଧ୍ୟାପିକା ନୁହେଁ ଛାତ୍ରଛାତ୍ରୀ, ଅନ୍ୟ କର୍ମଚାରୀ ମଧ୍ୟ ଆଭ୍ୟନ୍ତରୀଣ କମିଟି ପାଖରେ ସବୁ କହିପାରିବେ । ଆସନ୍ତା ୩୦ ତାରିଖ ସୁଦ୍ଧା କମିଟି ଗଠନ କରିବାକୁ ନିର୍ଦ୍ଦେଶ ଜାରି ହୋଇଛି । ଯାହାକୁ ନେଇ ସବୁଠି ଚର୍ଚ୍ଚା ।
ଉଚ୍ଚଶିକ୍ଷା ଅନୁଷ୍ଠାନର ଛାତ୍ରଛାତ୍ରୀ ଓ କର୍ମଚାରୀମାନଙ୍କୁ ସୁରକ୍ଷିତ, ସକରାତ୍ମକ ପରିବେଶ ଯୋଗାଇବା ପାଇଁ ରାଜ୍ୟ ସରକାରଙ୍କ ବଡ ପଦକ୍ଷେପ । ଏଥିପାଇଁ ଆଭ୍ୟନ୍ତରୀଣ ଅଭିଯୋଗ କମିଟି ଗଠନ ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି । ସେପ୍ଟମ୍ବର ୩୦ ସୁଦ୍ଧା ସମସ୍ତ ଉଚ୍ଚ ଶିକ୍ଷା ଅନୁଷ୍ଠାନରେ ଏହି କମିଟି ଗଠନ ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ସବୁ ବିଶ୍ବ ବିଦ୍ୟାଳୟ ଓ କଲେଜକୁ ଚିଠି ଲେଖାଯାଇଛି । କମିଟିରେ ଭବିଷ୍ୟତ ପାଇଁ ରେକର୍ଡ ହୋଇ ରହିବ । କଲେଜ କ୍ୟାମ୍ପସର ଶୈକ୍ଷିକ ବାତାବରଣରେ ମହିଳାଙ୍କ ଉପରେ ହୋଇପାରିବ ନାହିଁ ନିର୍ଯାତନା । ଏ ନେଇ କମିଟି କରିବ ତଦାରଖ ।
ଅନେକ ସମୟରେ ଶିକ୍ଷାନୁଷ୍ଠାନରେ ନିର୍ଯାତନାର ଅଭିଯୋଗ ଆସୁଛି । ସଜସଜ ବାଣୀବିହାରରୁ ମଧ୍ୟ ସମାନ ଅଭିଯୋଗ ଆସିଥିଲା । ଯାହା ପୁରା ରାଜ୍ୟରେ ଚହଳ ପକାଇଥିଲା । ମାମଲା ସାମ୍ନାକୁ ଆସିବା ପରେ ସଙ୍ଗେ ସଙ୍ଗେ ରାଜ୍ୟ ସରକାର ଘଟଣାକୁ ଗୁରୁତର ସହ ନେଇଥିଲେ ଏବଂ ୩୦ ତାରିଖ ସୁଦ୍ଧା କମିଟି ଗଠନ ହେବ ବୋଲି ନିର୍ଦ୍ଦେଶ ଜାରି କଲେ । କମିଟି ଗଠନ ହେବା ପରେ ନିର୍ଯାତନା ତ ଲୁଚିବ ନାହିଁ ବରଂ କଡ଼ା କାର୍ଯ୍ୟାନୁଷ୍ଠାନ ହେବ ବୋଲି ସ୍ପଷ୍ଟ କରିଛନ୍ତି ବିଭାଗୀୟ ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।
ସେପଟେ, ଉଚ୍ଚ ଶିକ୍ଷା ଅନୁଷ୍ଠାନରେ ମହିଳାମାନଙ୍କୁ ସକରାତ୍ମକ ଓ ସମ୍ମାନାସ୍ପଦ ବାତାବରଣ ସୃଷ୍ଟି ପାଇଁ ରାଜ୍ୟ ସରକାରଙ୍କ ପଦକ୍ଷେପକୁ ସ୍ଵାଗତ କରିଛନ୍ତି ଛାତ୍ରୀ । ସେପଟେ ବିଜେବି ସ୍ଵୟଂଶାସିତ ମହାବିଦ୍ୟାଳୟରେ ଆଭ୍ୟନ୍ତରୀଣ ଅଭିଯୋଗ କମିଟି ଠିକ ଭାବେ କାର୍ଯ୍ୟ କରୁଛି । ପ୍ରତିମାସରେ ତିନି ଥର ମିଟିଂ ହେବା ସହ କମିଟି ପକ୍ଷରୁ ରିଭ୍ୟୁ କରାଯାଉଛି ବୋଲି ଅଧକ୍ଷା ପ୍ରଫେସର ଇତିଶ୍ରୀ ପାଢ଼ୀ କହିଛନ୍ତି । ମୋଟ୍ ଉପରେ ଉଚ୍ଚ ଶିକ୍ଷା ବିଭାଗର ଚିଠି ଅନୁଯାୟୀ, ସେପ୍ଟମ୍ବର ୩୦ ସୁଦ୍ଧା ଆଭ୍ୟନ୍ତରୀଣ ଅଭିଯୋଗ କମିଟି ଗଠନ ପାଇଁ କଣ ପଦକ୍ଷେପ ନିଆଯାଇଛି ସେ ସମ୍ପର୍କରେ ମଧ୍ୟ ଜଣାଇବାକୁ ନିର୍ଦ୍ଦେଶ ରହିଛି ।