ଅର୍ଗସ ବ୍ୟୁରୋ : କିଏ ହେବ ପାକିସ୍ତାନର ବାଦଶାହା । କାହା ହାତକୁ ଯିବ ଶାସନ କଳ ଚାବି । ପୂର୍ବତନ ଦୁଇ ପ୍ରଧାନମନ୍ତ୍ରୀଙ୍କ ପାର୍ଟି ମଧ୍ୟରେ ଚାଲିଛି କଡ଼ା ଟକ୍କର । ଆଉ କିଛି ସମୟର ଅପେକ୍ଷା । ଭୋଟ୍ ଗଣତି ଜାରି ରହିଥିବା ବେଳେ ଇମ୍ରାନ ଖାନଙ୍କ ସ୍ବମର୍ଥିତ ସ୍ବାଧୀନ ପ୍ରାର୍ଥୀ ଓ ନଓ୍ବାଜ୍ ସରିଫ୍ଙ୍କ ପାର୍ଟି ମଧ୍ୟରେ କଡ଼ା ଟକ୍କର ଚାଲିଛି । ଭୋଟ୍ ଗଣତି ପର୍ଯ୍ୟାୟରେ ଇମ୍ରାନଙ୍କ ପ୍ରାର୍ଥୀ ଆଗରେ ଚାଲୁଛନ୍ତି । ଏପଟେ ନିର୍ବାଚନରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ୍ ସରିଫଙ୍କ ବିଜୟ ହୋଇଛି । ଲାହୋର ଆସନରେ ସେ ୧, ୭୧, ୦୨୪ ଖଣ୍ଡ ଭୋଟରେ ଜିତିଛନ୍ତି ।
ସେହିପରି ପୂର୍ବ ପ୍ରଧାନମନ୍ତ୍ରୀ ଶହବାଜ୍ ସରିଫଙ୍କ ପୁଅ ନିର୍ବାଚନରେ ବିଜୟୀ ହୋଇଛନ୍ତି । ଅନ୍ୟପଟେ ପଞ୍ଜାବ ପ୍ରାନ୍ତର ପୂର୍ବତନ ମୁଖ୍ୟମନ୍ତ୍ରୀ ହମଜା ଶହବାଜ ଲାହୋରର ଏନଏ-୧୧୮ ସିଟ୍ ରେ ବାଜିମାରି ନେଇଛନ୍ତି । ନିର୍ବାଚନ ଆୟୋଗଙ୍କ ଅନୁଯାୟୀ, ସେ ୧,୦୫, ୯୬୦ ଭୋଟରେ ବିଜୟୀ ହୋଇଛନ୍ତି । ସେପଟେ ମୁମ୍ବାଇ ଆକ୍ରମଣ ମାଷ୍ଟର ମାଇଣ୍ଡ୍ ତଥା ଆତଙ୍କବାଦୀ ହାଫିଜ୍ ସାଇଦ୍ର ପୁଅକୁ ପରାଜୟ ମିଳିଛି ।
ଅଧିକ ପଢନ୍ତୁ ବିଦେଶ ଖବର
ପାକିସ୍ତାନ ନ୍ୟାସନାଲ ଆସେମ୍ବଲିରେ ମୋଟ ୩୩୬ ଆସନ ରହିଛି । ସେଥିମଧ୍ୟରୁ ୨୬୬ ଆସନରେ ପ୍ରାର୍ଥୀ ନିର୍ବାଚିତ ହୋଇ ନ୍ୟାସନାଲ ଆସେମ୍ବଲିକୁ ଆସନ୍ତି । ବାକି ୭୦ ସାଂସଦ ଆସନ ସଂରକ୍ଷିତ । ମହିଳାଙ୍କ ପାଇଁ ୬୦ ଆସନ ସଂରକ୍ଷିତ ଓ ଅଣମୁସଲିମଙ୍କ ପାଇଁ ୧୦ଟି ସଂରକ୍ଷଣ ଆସନ ରହିଛି । ମୋଟ ୨୬୬ ଆସନ ପାଇଁ ନିର୍ବାଚନ ହେଉଥିବାରୁ ସଂଖ୍ୟା ଗରିଷ୍ଠତା ପାଇଁ ୧୩୪ ସିଟ ଆବଶ୍ୟକ ।