କଟକ : ବାଣ ଫୁଟୁଥିଲା । ବାଜା ବାଜୁଥିଲା , ରୋଷଣୀ ଚାଲୁଥିଲା । ଆଉ ମାତ୍ର କିଛିଟା ସମୟ ପରେ ଏକାଠି ହୋଇଥାନ୍ତେ ଦୁଇଟି ପରିବାର । ଗଢି ଉଠିଥାନ୍ତା ଆଉ ଏକ ସମ୍ପର୍କ । ହେଲେ ମାତ୍ର କିଛି କ୍ଷଣରେ ସବୁକିଛି ଓଲଟପାଲଟ ହୋଇଗଲା । କାନ୍ଦ ବୋବାଳିରେ ଫାଟିପଡିଲା ପୁରା ଅଞ୍ଚଳ । ଶୁଭଦିନଟା ଅଶୁଭ ପାଲଟିଗଲା ....
ଭୋ ଭୋ ହୋଇ କାନ୍ଦୁଛନ୍ତି ପୁରା ପରିବାର । କାରଣ ଏମିତି ସମୟରେ ଏପରି ଅଘଟଣ ଯେ ଘଟିଯିବ କେହି ଭାବିନଥିଲେ । ପୁଅର ବାହାଘର ପାଇଁ ସରିଥିଲା ସବୁ ପ୍ରସ୍ତୁତି । ବରଯାତ୍ରୀ ସହ ପ୍ରସେସନ ଧରି ସମସ୍ତେ ବାହାରିଥିଲେ କନିଆଁ ଘରକୁ । ଆଉ କିଛି ସମୟରେ ପହଞ୍ଚିଥିଲେ ଏକ ନୂଆ ସମ୍ପର୍କର ଆରମ୍ଭ ହୋଇଥାନ୍ତେ । ହେଲେ କିଏ ଜାଣିଥିଲା ଗାଡିଟା କାଳ ସାଜିବ ବୋଲି । ଚାହୁଁଚାହୁଁ ପ୍ରସେସନରେ ଥିବା ବରଯାତ୍ରୀ ବସ ଭାରସାମ୍ୟ ହରାଇ ଚଢିଗଲା ବରର ବାପା ଉପରେ । ସାଙ୍ଗେସାଙ୍ଗେ ତାଙ୍କୁ ଡାକ୍ତରଖାନାକୁ ଆଣିଥିଲେ ପରିବାର ଲୋକେ । ହେଲେ ମୃତ୍ୟୁ ଘୋଷଣା କରିଥିଲେ ଡାକ୍ତର ।
ଏଭଳି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ନରସିଂହପୁର ବ୍ଲକର ଚତୁରାପଦା ଗାଁରେ । ମୃତକ ଜଣକ ହେଉଛନ୍ତି ବିମ୍ବାଧର ନାୟକ । ବାପାଙ୍କ ମୃତ୍ୟୁକୁ ସହଜରେ ବିଶ୍ବାସ କରିପାରୁନାହାନ୍ତି ପୁଅ ବବୁଲ । କାନ୍ଦି କାନ୍ଦି ଭୂଇଁରେ ଲୋଟି ପଡୁଛନ୍ତି ପୁରା ପରିବାର । କିଏ ଜାଣିଥିଲା , ଏତେ ବଡ ଅଘଟଣ ହୋଇଯିବ ବୋଲି । ଏବେ ଶୋକରେ ପୁରା ପରିବାର ପୁରା ଅଞ୍ଚଳ ।