In Subhadra Yojana, one should apply after the age of 21 years

ଘର

ଓଡ଼ିଶା

ସୁଭଦ୍ରା ଯୋଜନାରେ ୨୧ ବର୍ଷ ବୟସ ପରେ ଆବେଦନ କରି ହେବ

by Banajyotshna Ray

In Subhadra Yojana, one should apply after the age of 21 years

NEWS HIGHLIGHTS

ମୋଦିଙ୍କ ଚାରିପାଖରେ ମହିଳାଙ୍କ ସୁରକ୍ଷା କବଚ
ଦେଶରେ ଆଗରୁ ହୋଇଥିଲା, ମାତ୍ର ଓଡ଼ିଶାରେ ହୋଇନଥିଲା
ଏବେ ୨୦୨୪ ରେ ସରକାର ବଦଳିବା ପରେ ହୋଇଛି
ମୋଦି ଆସି ଏହି ସୁରକ୍ଷା କବଚକୁ କରିବେ ଆହୁରି ମଜବୁତ
ସୁଭଦ୍ରା ଯୋଜନାରେ ୨୧ ବର୍ଷ ବୟସ ପରେ ଆବେଦନ କରି ହେବ
ସୁଭଦ୍ରାରେ ୬୦ ବର୍ଷ ବୟସ ପର୍ଯ୍ୟନ୍ତ ଯୋଜନାର ଲାଭ ନେବେ ମହିଳା
୬୦ ବର୍ଷ ପରେ ଆପେ ଆପେ ବାର୍ଦ୍ଧକ୍ୟ ଭତ୍ତାକୁ ରୁପାନ୍ତରିତ ହୋଇଯିବ
ବିଜେଡି ସରକାର ସମୟରେ ମହିଳା ମାନେ ମଦ ଭାଟିକୁ କରୁଥିଲେ ବିରୋଧ
ଏବେ ଓଡ଼ିଶାରେ ମଦ ଭାଟି ଭାଙ୍ଗୁଛନ୍ତି ବିଜେପି ସରକାର

ଅର୍ଗସ ବ୍ୟୁରୋ: ରାଜ୍ୟରେ ଉପର ମୁହାଁ ସୁଭଦ୍ରା ମିଟର । ସୁଭଦ୍ରା ଯୋଜନାକୁ ନେଇ ରାଜ୍ୟ ସାରା ବଢୁଛି ଉତ୍ସାହ । ୧୭ରେ ଓଡ଼ିଶା ଆସି ସୁଭଦ୍ରା ଯୋଜନାର ଶୁଭାରମ୍ଭ କରିବେ ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଘରେ ଘରେ ସୁଭଦ୍ରା । ସୁଭଦ୍ରା ଯୋଜନା ପାଇଁ ଆବେଦନ କରିସାରିଲେଣି ୫୦ ଲକ୍ଷରୁ ଉର୍ଦ୍ଧ୍ଵ ମହିଳା, ଆଗକୁ ସଂଖ୍ୟା ଆହୁରି ବଢିବ । ତେବେ ୧୫ ତାରିଖ ଯାଏଁ ଯେଉଁ ମାନେ ଆବେଦନ କରିଥିବେ ସେମାନଙ୍କ ପାଖକୁ ୧୭ ତାରିଖରେ ବ୍ୟାଙ୍କରୁ ପ୍ରଥମ କିସ୍ତି ଯିବ । ଆସନ୍ତାକାଲି ସାରା ରାଜ୍ୟରେ ହେବ ୧୦ ହଜାରଟି ସୁଭଦ୍ରା ସ୍ବାଗତ ପଦଯାତ୍ରା । ରାଜଧାନୀରୁ ଆରମ୍ଭ କରି ଓଡିଶାର ପ୍ରତ୍ୟେକ ରାଜସ୍ଵ ଗ୍ରାମରେ ହେବ ସୁଭଦ୍ରା ପଦ ଯାତ୍ରା । ସେହିପରି ପ୍ରତି ପଞ୍ଚାୟତରେ ଜିପିଏଲଏଫଙ୍କ ନେତୃତ୍ୱରେ ହେବ ପଦ ଯାତ୍ରା । ଏହାସହ ମିଶନ ଶକ୍ତି ଏବଂ ମହିଳା, ଶିଶୁ କଲ୍ୟାଣ ବିଭାଗ ନେତୃତ୍ଵରେ ଭୁବନେଶ୍ଵର ସ୍ଥିତ ଗିରିଦୂର୍ଗା ମନ୍ଦିର ଠାରୁ ରମାଦେବୀ ବିଶ୍ଵବିଦ୍ୟାଳୟ ଯାଏଁ ହେବ ରାଜ୍ୟ ସ୍ତରୀୟ ସୁଭଦ୍ରା ସ୍ଵାଗତ ପଦଯାତ୍ରା । ଏସଏଚଜି ମାଆ ମାନେ ମଧ୍ୟ ଗାଁ ଗାଁରେ ପଦଯାତ୍ରା ସାମିଲ ହେବେ ।

ପ୍ରତି ବ୍ଲକ୍ ଓ ପଞ୍ଚାୟତରେ ପାଳନ ହେଉଛି ସୁଭଦ୍ରା ସ୍ଵାଗତ ସପ୍ତାହ । ଗାଁ ଗାଁରେ ବୁଲୁଛି ସୁଭଦ୍ରା ରଥ । ଏହି କ୍ରମରେ ସୁଭଦ୍ରା ଯୋଜନାକୁ ଆହୁରି ଲୋକାଭିମୁଖୀ କରିବା ସହ ମହିଳାଙ୍କୁ ସଚେତନ କରିବା ପାଇଁ ଭୁବନେଶ୍ୱରରେ ବୁଲୁଛି ସୁଭଦ୍ରା ସଚେତନତା ରଥ । ଭୁବନେଶ୍ୱର ଜାଗମରା ଜଗନ୍ନାଥ ମନ୍ଦିରରୁ ମାଁ ସୁଭଦ୍ରାଙ୍କ ଆଶୀର୍ବାଦ ନେଇ ବାହାରିଛି ସଚେତନତା ରଥ ।

ଆଉ ଏ ସବୁ ଭିତରେ ସୁଭଦ୍ରା ହିତାଧିକାରୀଙ୍କ ପାଇଁ ଆସିଛି ଆଉ ଏକ ଖୁସି ଖବର । ସୁଭଦ୍ରା ସହାୟତା ଉପଲବ୍ଧି ହେବ ଆହୁରି ସହଜ । ଡାକ ବିଭାଗ ବ୍ୟାଙ୍କ ଆକାଉଣ୍ଟରେ ବି ମିଳିବ ସୁଭଦ୍ରା ପ୍ରୋତ୍ସାହନ ରାଶି । ସେପଟେ ସୁଭଦ୍ରା ଯୋଜନାର ବ୍ୟାପକ ପ୍ରଚାର ପ୍ରସାର ପାଇଁ ବଡ ପଦକ୍ଷେପ ନେଇଛନ୍ତି ସରକାର । ସବୁ ବିଭାଗ କରିବେ ସୁଭଦ୍ରା ଯୋଜନାର ବ୍ରାଣ୍ଡିଂ । ଏ ନେଇ ସବୁ ବିଭାଗ ସଚିବଙ୍କୁ ଚିଠି ଲେଖିଛନ୍ତି ମହିଳା ଓ ଶିଶୁ କଲ୍ୟାଣ ବିଭାଗ ସଚିବ । ସବୁ ବିଭାଗ କାର୍ଯ୍ୟାଳୟରେ ଏଲ୍ ଇ ଡି ଜରିଆରେ ସୁଭଦ୍ରା ଯୋଜନାର ଭିଡ଼ିଓ ଚାଲିବ । ସବୁ ବିଭାଗର ୱେବ୍ ସାଇଟ୍, ସୋସିଆଲ ମିଡ଼ିଆ ହାଣ୍ଡେଲ, ମୋବାଇଲ ଆପରେ ପ୍ରଦର୍ଶିତ ହେବ ସୁଭଦ୍ରା ଯୋଜନା ଲୋଗୋ ଏବଂ ଟ୍ୟାଗ ଲାଇନ୍ । ୧୫ ତାରିଖରୁ ସବୁ ବିଭାଗର ସୋସିଆଲ ମିଡ଼ିଆ ପେଜର ପ୍ରୋଫାଇଲ୍ ପିକ୍ଚର୍ ରେ ଲାଗିବ ସୁଭଦ୍ରା ଲୋଗୋ ।

ଅଧିକ ପଢ଼ନ୍ତୁ ଓଡିଶା ଖବର:

ଲେବାନନରେ ଭୟଙ୍କର "ପେଜର ବିସ୍ଫୋରଣ", ଗଲା ୧୧ ଜଣଙ୍କ ଜୀବନ

by Swayangprajna Mishra

In Lebanon, the terrible "pager explosion", the lives of 11 people were lost

ଅର୍ଗସ ବ୍ୟୁରୋ : ଲେବାନନରେ ଭୟଙ୍କର ପେଜର ବିସ୍ଫୋରଣ । ନିମିଷକେ ଚାଲିଗଲା ୧୧ ଜଣଙ୍କ ପ୍ରାଣ । ଏହାସହିତ ୪ ହଜାରରୁ ଅଧିକ ଆହତ ବି ହୋଇଛନ୍ତି । ଲେବନାନରେ ଥିବା ହିଜବୁଲ୍ଲାରର ସଦସ୍ୟ ଉପରେ ଟାର୍ଗେଟ କରି ଆକ୍ରମଣ କରାଯାଇଛି । ଘଟଣାରେ ଇସ୍ରାଏଲର ହାତ ଥିବା ସୂଚନା ରହିଛି । ତେବେ ହିଜବୁଲ୍ଲାରେ ମୋବାଇଲ ଫୋନ୍ ବଦଳରେ ପେଜର ଦ୍ବାରା କଥାବାର୍ତ୍ତା ହୁଏ । ତେବେ କଣ ଏହି "ପେଜର ବିସ୍ଫୋରଣ" । କେମିତି ହୁଏ ପେଜର ବିସ୍ଫୋରଣ ଆସନ୍ତୁ ଜାଣିବା ।

'ପେଜର' କଣ ଯେପରି ଆମେ ଅନ୍ୟଜଣଙ୍କ ସହ କଥା ହେବାପାଇଁ ମୋବାଇଲ ଫୋନ ବ୍ୟବହାର କରିଥାନ୍ତି, ସେହିପରି ଲେବାନନରେ ହିଜବୁଲ୍ଲାର ସଦସ୍ୟ ମାନଙ୍କୁ ମୋବାଇଲ ବଦଳରେ ପେଜର ଦିଆଯାଇଥାଏ । ଏହା ଏକପ୍ରକାର ଓୟାରଲେସ ରେଡିଓ ଡିଭାଇସ । ରେଡିଓ ସିଗନାଲ ଦ୍ବାରା ଏହା ମେସେଜ ରିସିଭ୍ କରିଥାଏ । ମେସେଜ ପଠାଇବା ଏବଂ ପଢିବା ପାଇଁ ଏହାକୁ ବ୍ୟବହାର କରାଯାଇଥାଏ । ସେଠାକାର ପସନ୍ଦର ଟେଲିକମ୍ୟୁନିକେସନ ବ୍ୟବସ୍ଥା ହେଉଛି ପେଜର ।
କେମିତି ହୁଏ ପେଜର ବିସ୍ଫୋରଣ ଆତଙ୍କ
ଏକକାଳୀନ ସମୟରେ ଏହି ପେଜର ବିସ୍ଫୋରଣ ହୋଇଥାଏ । ହିଜବୁଲ୍ଲା କିଛିମାସ ପୂର୍ବରୁ ୫ ହଜାର ପେଜର ଅର୍ଡର କରିଥିଲା । ପେଜରେ ଭିତରେ ୩ ଗ୍ରାମର ବିସ୍ଫୋରକ ଲୁଚାଇ ରଖାଯାଇଥିଲା । ପ୍ରଥମେ ଏଠାକାର ହିଜବୁଲ୍ଲା ଉପରେ ମୋବାଇଲ ଫୋନ ଦ୍ବାରା ଆକ୍ରମଣ କରାଯାଉଥିଲା । ପରେ ଜଣା ପଡିବା ପରେ ହିଜବୁଲ୍ଲାରେ ଗତ ଫେବୃଆରୀରେ ପେଜର ଅର୍ଡର କରାଯାଇଥିଲା । ଏହାକୁ ଏପରି ଡିଜାଇନ କରି ଏଥିରେ ବିଷାକ୍ତ ବିସ୍ଫୋରକ ରଖାଯାଇଥିଲା ଯେ, ଏହାକୁ ଆଣିବା ବେଳେ କିଛି ଆଭାସ ମିଳିନଥିଲା । ଏହାପରେ ଏଥିରେ ରଖାଯାଇଥିବା ବିସ୍ଫୋରକକୁ ରେଡିଓ ସିଗନାଲ ଦ୍ବାରା ଟ୍ରିଗର କରାଯାଇଥାଏ । ଯାହାଦ୍ବାରା ଏକାବେଳେ ସମସ୍ତ ପେଜର ବ୍ଲାଷ୍ଟ କରିଥାଏ । ତେବେ ଏହି ସପ୍ଲାଏ ପଏଜନ ପଦ୍ଧତିରେ ଅନେକ ବଡବଡ କମ୍ପାନୀ ସାମିଲ ଥାଆନ୍ତି ।
ତେବେ ପ୍ରକୃତରେ ଏହି ଘଟଣା ପଛରେ ଇସ୍ରାଏଲର ହାତ ଥିବା ସନ୍ଦେହ କରାଯାଉଥିବା ବେଳେ ଏହାକୁ ନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ ।

ପ୍ରଧାନମନ୍ତ୍ରୀ ଜନଜାତି ଉନ୍ନତ ଗ୍ରାମ ଅଭିଯାନକୁ କ୍ୟାବିନେଟ୍ ମଞ୍ଜୁରୀ

by Swayangprajna Mishra

Modi government's mega plan for tribal welfare

ଅର୍ଗସ ବ୍ୟୁରୋ : ଆଦିବାସୀଙ୍କ ଉନ୍ନତି ଉପରେ ମୋଦି ସରକାରଙ୍କ ଫୋକସ୍ । ଆଦିବାସୀ ବହୁଳ ଅଞ୍ଚଳରେ ବିକାଶ ମୂଳକ କାମକୁ ଗତି ଦେବାକୁ ଆରମ୍ଭ ହେଉଛି ବଡ଼ ଯୋଜନା । ପ୍ରଧାନମନ୍ତ୍ରୀ ଜନଜାତି ଉନ୍ନତ ଗ୍ରାମ ଅଭିଯାନକୁ ମିଳିଛି ମୋଦି କ୍ୟାବିନେଟର ମଞ୍ଜୁରୀ। ଆଦିବାସୀଙ୍କ ସାମାଜିକ ଓ ଆର୍ଥିକ ସ୍ଥିତିରେ ସୁଧାର ପାଇଁ ମୋଟ 79,156 କୋଟିର ବ୍ୟୟବରାଦ କରାଯାଇଛି। ଆଦିବାସୀ ବହୁଳ ଗାଁ ଏବଂ ଆକାଂକ୍ଷୀ ଜିଲ୍ଲାଗୁଡ଼ିକରେ ଆଦିବାସୀ ସମ୍ପ୍ରଦାୟ ଓ ପରିବାରଙ୍କ ସାମାଜିକ ଓ ଆର୍ଥିକ ସ୍ଥିତିରେ ଉନ୍ନତି ପାଇଁ ବହୁ ପଦକ୍ଷେପ ନିଆଯିବ। ଗତ ବଜେଟରେ ଘୋଷଣା ଅନୁସାରେ ଦେଶର 63,000 ଗାଁର 5 କୋଟିରୁ ଅଧିକ ଆଦିବାସୀ ଏହି ଯୋଜନାରୁ ଲାଭବାନ ହେବେ। ଦେଶର ମୋଟ 549ଟି ଜିଲ୍ଲାର 2,740ଟି ବ୍ଲକରେ ଥିବା ଆଦିବାସୀ ବହୁଳ ଗାଁରେ ଯୋଜନା କାର୍ଯ୍ୟକାରୀ କରାଯିବ।

2011 ଜନଗଣନା ଅନୁସାରେ ଦେଶରେ ମୋଟ 705ଟି ଆଦିବାସୀ ସମ୍ପ୍ରଦାୟ ରହିଛନ୍ତି ଏବଂ ଆଦିବାସୀଙ୍କ ମୋଟ ଜନସଂଖ୍ୟା 10 କୋଟି 45 ଲକ୍ଷ, ଯେଉଁମାନେ ଉପାନ୍ତ ଓ ଦୁର୍ଗମ ଅଞ୍ଚଳରେ ରହନ୍ତି। ପ୍ରଧାନମନ୍ତ୍ରୀ ଜନଜାତି ଉନ୍ନତ ଗ୍ରାମ ଅଭିଯାନ ମାଧ୍ୟମରେ ଭାରତ ସରକାରଙ୍କ 17ଟି ମନ୍ତ୍ରାଳୟ କାମ କରିବେ। ଆଗାମୀ 5 ବର୍ଷ ପାଇଁ ମୁଖ୍ୟତଃ 4ଟି ଲକ୍ଷ୍ୟ ହାସଲ ପାଇଁ ଯୋଜନା ପ୍ରସ୍ତୁତ ହୋଇଛି।

ଅଧିକ ପଢନ୍ତୁ : ସାରା ଦେଶରେ ଏକାସାଙ୍ଗରେ ହେବ ଲୋକସଭା ଓ ବିଧାନସଭା ନିର୍ବାଚନ

1 . ଭିତ୍ତିଭୂମି ନିର୍ମାଣ – ଆଦିବାସୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କା ଘର, ଜଳଜୀବନ ମିଶନ ଅଧୀନରେ ଟ୍ୟାପ୍ ଯୋଗେ ପାନୀୟ ଜଳ ଯୋଗାଣ ସହ ଆୟୁଷ୍ମାନ ଭାରତ କାର୍ଡ ଯୋଗାଇ ଦିଆଯିବ। ଆଦିବାସୀ ବହୁଳ ଗାଁ ଗୁଡ଼ିକୁ ସବୁଦିନିଆ ରାସ୍ତା ସହ ମୋବାଇଲ୍ ଓ ଇଣ୍ଟରନେଟ୍ ସଂଯୋଗର ବ୍ୟବସ୍ଥା ରହିବ। ଜାତୀୟ ସ୍ବାସ୍ଥ୍ୟ ମିଶନ, ସମଗ୍ର ଶିକ୍ଷା ଓ ପୋଷଣ ଯୋଜନାରେ ସ୍ବାସ୍ଥ୍ୟ, ଶିକ୍ଷା ଭିତ୍ତିଭୂମିର ବିକାଶ କରାଯିବ।
2. ଆର୍ଥିକ ସଶକ୍ତୀକରଣ – ଦଶମ ଓ ଦ୍ବାଦଶ ପାସ୍ କରୁଥିବା ଆଦିବାସୀ ଛାତ୍ରଛାତ୍ରୀଙ୍କୁ ସ୍କିଲ୍ ଇଣ୍ଡିଆ ମିଶନ ଅଧୀନରେ ଦିଆଯିବ ଦକ୍ଷତା ବିକାଶ ତାଲିମ। ବହୁମୁଖୀ ଆଦିବାସୀ ବଜାର କେନ୍ଦ୍ର ମାଧ୍ୟମରେ ଆଦିବାସୀଙ୍କ ଉତ୍ପାଦର ମାର୍କେଟିଂ ପାଇଁ ସହାୟତା, ଆଦିବାସୀ ବହୁଳ ଅଞ୍ଚଳରେ ପର୍ଯ୍ୟଟନ, କୃଷି, ପଶୁ ଓ ମତ୍ସ୍ୟପାଳନ ଦିଗରେ ସହାୟତା ଦିଆଯିବ।
3 . ଶିକ୍ଷା – ଆଦିବାସୀ ପିଲାଙ୍କୁ ସ୍କୁଲ ଓ କଲେଜ ସ୍ତରରେ ଗୁଣାତ୍ମକ ଶିକ୍ଷା ପ୍ରଦାନର ବ୍ୟବସ୍ଥା ସହ ସମଗ୍ର ଶିକ୍ଷା ଅଭିଯାନ ଅଧୀନରେ ଜିଲ୍ଲା ଓ ବ୍ଲକ୍ ସ୍ତରରେ ଜନଜାତି ହଷ୍ଟେଲ୍ ପ୍ରତିଷ୍ଠା କରାଯିବ।
4. ସ୍ବାସ୍ଥ୍ୟ – ଜାତୀୟ ସ୍ବାସ୍ଥ୍ୟ ମିଶନ ଅଧୀନରେ ଆଦିବାସୀ ବହୁଳ ଅଞ୍ଚଳରେ ସ୍ବାସ୍ଥ୍ୟ ସେବା ଯୋଗାଇ ଦିଆଯିବ। ଅପହଞ୍ଚ ଅଞ୍ଚଳ ଗୁଡ଼ିକ ପାଇଁ ମୋବାଇଲ୍ ହେଲ୍ଥ ୟୁନିଟର ବ୍ୟବସ୍ଥା କରାଯିବ।
ନୀତି ଆୟୋଗ ଦ୍ବାରା ଚିହ୍ନଟ ତଥା କେନ୍ଦ୍ର ସରକାରଙ୍କ ଆକାଂକ୍ଷୀ ଜିଲ୍ଲା ତାଲିକାରେ ଥିବା ରାଜ୍ୟର 10 ଜିଲ୍ଲାରେ ଏହି ଯୋଜନାରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯିବ।

ସାରା ଦେଶରେ ଏକାସାଙ୍ଗରେ ହେବ ଲୋକସଭା ଓ ବିଧାନସଭା ନିର୍ବାଚନ

by Manini Pattanayak

Lok Sabha and Assembly elections will be held simultaneously across the country

ନୂଆଦିଲ୍ଲୀ : ଦେଶରେ ଏକା ସାଙ୍ଗରେ ହେବ ଲୋକସଭା ଓ ବିଧାନସଭା ନିର୍ବାଚନ। ଏ ନେଇ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଗଠିତ କମିଟିର ପ୍ରସ୍ତାବକୁ ମିଳିଛି ମୋଦି କ୍ୟାବିନେଟର ମଞ୍ଜୁରୀ। ସଂସଦର ଆଗାମୀ ଶୀତ ଅଧିବେଶନରେ ଏ ନେଇ ବିଲ୍ ଆସିବ। ଏକକ ନିର୍ବାଚନ ପ୍ରସ୍ତାବକୁ ଦେଶର 32ଟି ରାଜନୈତିକ ଦଳ ସମର୍ଥନ କରିଥିବାବେଳେ 15ଟି ଦଳ ବିରୋଧ କରିଛନ୍ତି। ଆଉ 15ଟି ଦଳ କୌଣସି ଉତ୍ତର ରଖିନାହାନ୍ତି। ଖୁବଶୀଘ୍ର ଦେଶରେ ବଦଳିବାକୁ ଯାଉଛି ନିର୍ବାଚନର ବୁନିଆଦି ଢାଞ୍ଚା । ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଗଠିତ କମିଟିର ପ୍ରସ୍ତାବକୁ ଆଇନରେ ପରିଣତ କରିବାକୁ ଆଗକୁ ବଢ଼ିଲେ ମୋଦି ସରକାର । ପ୍ରସ୍ତାବକୁ କେନ୍ଦ୍ର କ୍ୟାବିନେଟର ମଞ୍ଜୁରୀ ମିଳିଛି । ସଂସଦର ଆଗାମୀ ଶୀତ ଅଧିବେଶନରେ ଏକକ ନିର୍ବାଚନ ନେଇ ବିଲ୍ ଆଣିବାକୁ ଲକ୍ଷ୍ୟ ରଖିଛନ୍ତି ମୋଦି ସରକାର। ପୂର୍ବରୁ ୱାନ ନେସନ ୱାନ ଇଲେକସନ ପ୍ରସ୍ତାବ ଉପରେ ରାମନାଥ କୋବିନ୍ଦ କମିଟି ପକ୍ଷରୁ ନିଆଯାଇଥିଲା 62ଟି ରାଜନୈତିକ ଦଳର ମତାମତ । ପ୍ରସ୍ତାବକୁ 32ଟି ରାଜନୈତିକ ଦଳ ସମର୍ଥନ କରିଥିବା, 15ଟି ଦଳ ବିରୋଧ କରିଥିଲେ । ଏବଂ 15ଟି ରାଜନୈତିକ ଦଳ ପ୍ରସ୍ତାବକୁ ନେଇ କୌଣସି ଉତ୍ତର ରଖିନାହାନ୍ତି ।

ଚଳିତବର୍ଷ ମାର୍ଚ୍ଚ 14ରେ ରାଷ୍ଟ୍ରପତିଙ୍କୁ 18ହଜାର ପୃଷ୍ଠାର ରିପୋର୍ଟ ହସ୍ତାନ୍ତର କରିଥିଲା ଏକକ ନିର୍ବାଚନ କମିଟି । ମୋଦି 1.0 ସମୟରୁ ଦେଶରେ ଏକକ ନିର୍ବାଚନକୁ ନେଇ ମନ୍ଥନ ଆରମ୍ଭ କରିଥିଲେ ସରକାର । ଯାହା ଏବେ ଚୁଡ଼ାନ୍ତ ରୂପ ନେବାକୁ ଯାଉଛି । ଏହାଫଳରେ ନିର୍ବାଚନ କମିସନ ଉପରେ ଚାପ କମିବା ସହ ଆର୍ଥିକ ବ୍ୟୟ ବି କମିବ । ପ୍ରସ୍ତାବକୁ ଦେଶବାସୀ ସ୍ବାଗତ କରୁଥିବାବେଳେ ଭାରତ ପରି ବିଶାଳ ଦେଶରେ ଏପରି ଆଇନ ଅବାସ୍ତବ ବୋଲି କହିଛି କଂଗ୍ରେସ । ପୂର୍ବରୁ 1999ରେ ଲ' କମିଶନ 170ତମ ରିପୋର୍ଟରେ ପ୍ରତି 5 ବର୍ଷ ଅନ୍ତରରେ ଦେଶରେ ଏକକ ନିର୍ବାଚନ ପାଇଁ ସରକାରଙ୍କୁ ପ୍ରସ୍ତାବ ଦେଇଥିଲେ । 2015ରେ ସଂସଦୀୟ କମିଟି 79ତମ ରିପୋର୍ଟରେ ବି ଦେଶରେ ଦୁଇଟି ପର୍ଯ୍ୟାୟରେ ସବୁ ନିର୍ବାଚନ କରିବାକୁ ପ୍ରସ୍ତାବ ରଖିଥିଲା । ଏକକ ନିର୍ବାଚନକୁ ନେଇ ମୋଦି ସରକାର ପୂର୍ବତନ ରାଷ୍ଟ୍ରପତି କୋବିନ୍ଦଙ୍କ ଅଧ୍ୟକ୍ଷତାରେ ଗଠନ କରିଥିଲେ ଉଚ୍ଚସ୍ତରୀୟ କମିଟି । 2020 ସମ୍ବିଧାନ ଦିବସ ସମ୍ବୋଧନରେ ପିଏମ ମୋଦି ଗୋଟିଏ ଦେଶ, ଗୋଟିଏ ନିର୍ବାଚନ ସଂକଳ୍ପ ପୂରଣ କରିବାକୁ ଆହ୍ବାନ ଦେଇଥିଲେ ।

ଅଧିକ ପଢନ୍ତୁ ଭାରତ ଖବର

Download Argus News App

In Subhadra Yojana, one should apply after the age of 21 years

Download Mobile App