କଟକ: ଐତିହାସିକ ବାଲିଯାତ୍ରା କଟକ-୨୦୨୫ରେ ଲୋକଙ୍କୁ ସଚେତନ କରୁଛି ପରିବହନ ବିଭାଗ । ଏଥିପାଇଁ ବାଲିଯାତ୍ରା ପଡ଼ିଆରେ ଆଞ୍ଚଳିକ ପରିବହନ କାର୍ଯ୍ୟାଳୟ, କଟକ ପକ୍ଷରୁ ଏକ ଷ୍ଟଲ ଖୋଲା ଯାଇଛି । ଯେଉଁଥିରେ ଜନତାଙ୍କୁ ସଡ଼କ ସୁରକ୍ଷା ନିୟମ ନେଇ ସଚେତନ କରାଯାଉଛି ।

ପରିବହନ ବିଭାଗର ପ୍ରବେଶ ପଥରେ ଲେଖା ଯାଇଛି, "ଐତିହାସିକ ବାଲିଯାତ୍ରା ବୁଲିବାକୁ ଆସିଛନ୍ତି, ସଡ଼କ ସୁରକ୍ଷା ନିୟମ ମାନୁଛନ୍ତି ତ ?" ପ୍ରବେଶ ପଥର ଦୁଇ ପାର୍ଶ୍ଵରେ ସଡ଼କ ସୁରକ୍ଷା ସମ୍ପର୍କିତ ବିଭିନ୍ନ ପୋଷ୍ଟର ରଖା ଯାଇଛି । ଯେଉଁଥିରେ ହେମଲେଟ୍ ପିନ୍ଧିଲେ କିଭଳି ଜୀବନ ବଞ୍ଚାଇ ଦିଆଯାଇ ପାରିବ ସେନେଇ ସଚେତନ କରାଯାଉଛି । ଅନ୍ୟ ପାର୍ଶ୍ଵରେ ସିଟ୍ ବେଲ୍ଟ ପିନ୍ଧିବାକୁ ଗୁରୁତ୍ଵ ଦିଆଯାଇଛି ।

ଏଥିସହ ପଢ଼ନ୍ତୁ: ଐତିହାସିକ ବାଲିଯାତ୍ରା କଟକ-୨୦୨୫ର ଦ୍ଵିତୀୟ ଦିନରେ କ'ଣ ରହିଛି କାର୍ଯ୍ୟକ୍ରମ ଜାଣନ୍ତୁ...

ଷ୍ଟଲ ଭିତରେ ସେଲ୍ଫି ପଏଣ୍ଟ ସହ ସ୍ପିନିଂ ବୋର୍ଡ ରହିଛି । ଯେଉଁଥିରେ ସଡ଼କ ସୁରକ୍ଷାର ବିଭିନ୍ନ ନିୟମ ଉଲ୍ଲେଖ ରହିଛି । ପରିବହନ ବିଭାଗର ଷ୍ଟଲରେ ସଡ଼କ ସୁରକ୍ଷା ସମ୍ପର୍କିତ ବିଭିନ୍ନ ଚିହ୍ନକୁ ରଖା ଯାଇଛି । କାର୍ ଚାଳନା ସିମୁଲେଟର ରହିଛି । ପରିବହନ ବିଭାଗର ଏହି ଷ୍ଟଲକୁ ବିଭାଗର ପ୍ରମୁଖ ସଚିବ ଉଷା ପାଢ଼ୀ ଉଦ୍‌ଘାଟନ କରିଛନ୍ତି ।

ପରିବହନ ବିଭାଗର ପ୍ରମୁଖ ସଚିବ ଉଷା ପାଢ଼ୀ କହିଛନ୍ତି, "ସଡ଼କ ସୁରକ୍ଷା ବହୁତ ଗୁରୁତ୍ଵପୂର୍ଣ୍ଣ ପ୍ରସଙ୍ଗ । ସଡ଼କ ଦୁର୍ଘଟଣା ଯୋଗୁଁ ଲୋକେ ମରୁଛନ୍ତି । ସଡ଼କ ସୁରକ୍ଷା ସଚେତନତା ହେଲେ ଜୀବନ ବଞ୍ଚି ପାରିବ । ବିଭାଗ ନେଇଥିବା ବିଭିନ୍ନ ପଦକ୍ଷେପକୁ ଆମେ ଷ୍ଟଲରେ ପ୍ରଦର୍ଶନ କରିଛୁ ।"

ସେ ଆହୁରି କହିଛନ୍ତି, "ରାଜ୍ୟ ସରକାର ଟ୍ରାଫିକ୍ ଫାଇନ୍ ନେଇ ୱାନ୍ ଟାଇମ୍ ସେଟଲମେଣ୍ଟ ସ୍କିମ୍ ଆରମ୍ଭ କରିଛନ୍ତି । ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କୁ ଏବେ ସୁଯୋଗ ଦିଆଯାଇଛି । ଜରିମାନାର ଅଧା ଟଙ୍କା ଦେବାକୁ ପଡ଼ୁଛି । ସେନେଇ ମଧ୍ୟ ଆମେ ସଚେତନ କରାଉଛୁ ।"

ଏଥିସହ ପଢ଼ନ୍ତୁ: ବାଲିଯାତ୍ରା ଆମ ଓଡ଼ିଶାର କଳା ସଂସ୍କୃତି ଏବଂ ଧାର୍ମିକ ଭାବନା ସହ ଜଡ଼ିତ: ମୁଖ୍ୟମନ୍ତ୍ରୀ

ଦେଶରେ ସଡ଼କ ଦୁର୍ଘଟଣାଜନିତ ମୃତ୍ୟୁରେ ଓଡ଼ିଶା ୧୪ ତମ ସ୍ଥାନରେ ରହିଛି । ଏହା ଉପରେ ରୋକ୍ ଲଗାଇବା ପାଇଁ ବିଭିନ୍ନ ପ୍ରକାରର ପଦକ୍ଷେପ ନେଉଛି ପରିବହନ ବିଭାଗ । ଜନସାଧାରଣଙ୍କୁ ସଚେତନ କରିବା ପାଇଁ ବିଭିନ୍ନ ପ୍ରକାରର କାର୍ଯ୍ୟକ୍ରମ ହାତକୁ ନେଉଛି ବିଭାଗ ।

ଶୂନ ମୃତ୍ୟୁ ପାଇଁ ସାପ୍ତାହିକ କାର୍ଯ୍ୟକ୍ରମ ମଧ୍ୟ କରାଯାଉଛି । ଷ୍ଟଲ ଉଦ୍‌ଘାଟନୀ କାର୍ଯ୍ୟକ୍ରମରେ ପରିବହନ କମିଶନରଙ୍କ ସହ କଟକ ଜିଲ୍ଲାପାଳ, କଟକ ଡିସିପି ଓ ଗ୍ରାମାଞ୍ଚଳ ଏସପି ଏବଂ ପରିବହନ ବିଭାଗ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ ।