Defence Budget / ପ୍ରତିରକ୍ଷା ମନ୍ତ୍ରଣାଳୟ ଉପରେ 'ଅପରେସନ ସିନ୍ଦୂର'ର ପ୍ରଭାବ; ୧୫% ବଢିଲା ବଜେଟ୍

କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଦେଶର ଆର୍ଥିକ ବର୍ଷ ୨୦୨୬-୨୭ ଲାଗି ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିଛନ୍ତି । ପ୍ରତିରକ୍ଷା ମନ୍ତ୍ରଣାଳୟକୁ ଏହି ବଜେଟ୍‌ରେ ରେକର୍ଡ ଭାବେ ୧୫ ପ୍ରତିଶତ ଅଧିକ ଅର୍ଥ ପ୍ରଦାନ କରାଯାଇଛି । ବଜେଟ୍ ଆବଣ୍ଟନରେ ପାକିସ୍ତାନ ବିରୋଧରେ ହୋଇଥିବା ଅପରେସନ ସିନ୍ଦୂରର ପ୍ରଭାବ ଦେଖିବାକୁ ମିଳିଛି । ଫଳରେ ଶତ୍ରୁକୁ ଉଚିତ ଶିକ୍ଷା ଦେବା ଲାଗି ସରକାର ପ୍ରତିରକ୍ଷା ବିଭାଗକୁ ଅଧିକ ଶକ୍ତିଶାଳୀ କରିବା ପାଇଁ ଅଧିକ ବଜେଟ୍ ପ୍ରଦାନ କରିଛନ୍ତି । ଚଳିତ ଥର ବଜେଟ୍‌ରେ ପ୍ରତିରକ୍ଷା ବିଭାଗକୁ ୭.୮୫ ଲକ୍ଷ କୋଟି ଟଙ୍କା ଆବଣ୍ଟନ ହୋଇଛି ।

ପ୍ରତିରକ୍ଷା ବିଭାଗକୁ ପ୍ରଦାନ କରାଯାଇଥିବା ମୋଟ ୭.୮୫ ଲକ୍ଷ କୋଟି ଟଙ୍କା ମଧ୍ୟରେ କ୍ୟାପିଟାଲ ବଜେଟ୍‌ ୨.୧୯ ଲକ୍ଷ କୋଟି ଟଙ୍କା ରହିଛି । ଏହି କ୍ୟାପିଟାଲ ବଜେଟ୍‌ରେ ମଧ୍ୟ ୨୨ ପ୍ରତିଶତ ବୃଦ୍ଧି ଘଟିଛି । ଭାରତର ତିନି ସେନା ବଳକୁ ଆହୁରି ଅଧିକ ସଶକ୍ତ କରିବା ଲାଗି ଆଗାମୀ ଦିନରେ ଅତ୍ୟାଧୁନିକ ଅସ୍ତ୍ରଶସ୍ତ୍ର କ୍ରୟ କରାଯିବ । ଆଧୁନିକ ମାରଣାସ୍ତ୍ର ଦ୍ବାରା ଶତ୍ରୁକୁ ଥରହର କରିବେ ଭାରତୀୟ ସେନା ।

ଗତବର୍ଷ କେତେ ଥିଲା ପ୍ରତିରକ୍ଷା ବଜେଟ୍ ?

ଗତ ୨୦୨୫-୨୬ ବଜେଟ୍‌ରେ ପ୍ରତିରକ୍ଷା ବିଭାଗକୁ ୬.୮୧ ଲକ୍ଷ କୋଟି ଟଙ୍କା ପ୍ରଦାନ କରିଥିଲେ ସରକାର । ଏଥିରେ ୧.୮୦ ଲକ୍ଷ କୋଟି କ୍ୟାପିଟାଲ ବଜେଟ୍ (ପୁଞ୍ଜିଗତ ଖର୍ଚ୍ଚ) ପାଇଁ ଥିଲା । ଏଥର ସରକାର ପ୍ରତିରକ୍ଷା ବଜେଟ୍‌ରେ ୧୫ ପ୍ରତିଶତକୁ ବୃଦ୍ଧି କରିଛନ୍ତି । କାରଣ ସରକାର ଭାରତର ସୀମାକୁ ସୁରକ୍ଷିତ ରଖିବା ଦିଗରେ ତିଳେ ମାତ୍ର ଢିଲା କରିବାକୁ ଚାହୁଁନାହାଁନ୍ତି । ମୋଟାମୋଟି ଭାବେ କହିବାକୁ ଗଲେ, ବଜେଟ୍‌ ୨୦୨୬ରେ ପ୍ରତିରକ୍ଷା ମନ୍ତ୍ରଣାଳୟ ଉପରେ ଦିଆଯାଇଥିବା ଗୁରୁତ୍ବ ସଙ୍କେତ ଦେଉଛି ଯେ ସରକାର ନା ଯେ କେବଳ ବର୍ତ୍ତମାନର ବିପଦ ପ୍ରତି ସଜାଗ ଅଛନ୍ତି, ବରଂ ଭବିଷ୍ୟତରେ ଆମ ୩ ବଳକୁ ସଶକ୍ତ କରିବା ଲାଗି ଆଗୁଆ ପଦକ୍ଷେପ ଗ୍ରହଣ କରୁଛନ୍ତି ।

କେଉଁଠି ଖର୍ଚ୍ଚ ହେବ ଟଙ୍କା ?

୨୦୨୬ ବଜେଟରେ ପ୍ରତିରକ୍ଷା ମନ୍ତ୍ରଣାଳୟକୁ ଦିଆଯାଇଥିବା ବର୍ଦ୍ଧିତ ବଜେଟ୍ ଆଗାମୀ ପ୍ରମୁଖ ପ୍ରତିରକ୍ଷା ପ୍ରକଳ୍ପକୁ ସୁଦୃଢ଼ ​​କରିବ। ସରକାରଙ୍କ ସ୍ପଷ୍ଟ ଉଦ୍ଦେଶ୍ୟ ହେଉଛି ଦେଶର ତିନି ସଶସ୍ତ୍ର ବାହିନୀକୁ ଆଧୁନିକ ଅସ୍ତ୍ରଶସ୍ତ୍ର, ନୂତନ ପ୍ରଯୁକ୍ତିବିଦ୍ୟା ଏବଂ ଉନ୍ନତ ସୁରକ୍ଷା ବ୍ୟବସ୍ଥା ପ୍ରଦାନ କରିବା । ଏହି ନୂତନ ବଜେଟ୍ ବାୟୁସେନା, ନୌସେନା ଏବଂ ସ୍ଥଳସେନା ପାଇଁ ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି । ନୌସେନା ପାଇଁ ଅତିରିକ୍ତ ରାଫେଲ୍-ଏମ୍ ଯୁଦ୍ଧ ବିମାନ କ୍ରୟ ଏହି ବଜେଟର ଏକ ପ୍ରମୁଖ ଅଂଶ ହେବ ବୋଲି ଆଶା କରାଯାଉଛି । ଭାରତୀୟ ବାୟୁସେନା ପାଖରେ ପୂର୍ବରୁ ୩୬ଟି ରାଫେଲ୍ ବିମାନ ଅଛି ଏବଂ ଏବେ ନୌସେନା ପାଇଁ ୨୬ କିମ୍ବା ତା'ଠାରୁ ଅଧିକ ରାଫେଲ୍-ଏମ୍ ଜେଟ୍ କ୍ରୟ କରିବାର ଯୋଜନା ଅଛି । ଏହା ସାମୁଦ୍ରିକ ସୀମା ସୁରକ୍ଷାକୁ ଆହୁରି ସୁଦୃଢ଼ ​​କରିବ ଏବଂ ନୌସେନାର ବାୟୁ ଶକ୍ତିକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ ।

ଏଥିସହ ପଢନ୍ତୁ: କେନ୍ଦ୍ରୀୟ ବଜେଟ୍ ୨୦୨୬; ମହଙ୍ଗା ହେଲା ମଦ; ଶସ୍ତା ହେଲା ଟିଭି, ଫ୍ରିଜ୍