Sandwich Business / ୩୦ ହଜାର ଋଣ ନେଇଥିଲେ; ଅନଲାଇନରୁ ଶିଖି, ସାଣ୍ଡୱିଚ୍ ବିକି ମାସକୁ ୨୫ଲକ୍ଷ ରୋଜଗାର

ଭୋପାଳ: କୁହାଯାଏ କୌଣସି ବ୍ୟବସାୟ ଆରମ୍ଭ କରିବାକୁ ହେଲେ ବଡ଼ ଅର୍ଥରାଶିର ଆବଶ୍ୟକ । କିନ୍ତୁ ମଧ୍ୟପ୍ରଦେଶରେ ରହୁଥିବା ଅଭିଷେକ ସାହୁର କାହାଣୀ ଏହି ବିଚାରକୁ ବଦଳାଇ ଦେଇଛି । ମାତ୍ର ୩୦ ହଜାର ଟଙ୍କାରୁ ଆରମ୍ଭ କରିଥିବା ବ୍ୟବସାୟ ଆଜି ୨୫ ଲକ୍ଷରେ ପହଞ୍ଚିଛି । ରାସ୍ତାକଡ଼ରେ ସ୍ଵାଦିଷ୍ଟ ସାଣ୍ଡୱିଚ୍ ବିକି ଅଭିଷେକ ମାସକୁ ରୋଜଗାର କରୁଛନ୍ତି ଲକ୍ଷ ଲକ୍ଷ ଟଙ୍କା । ଯାହାକି ଅନେକ ଯୁବପିଢିଙ୍କୁ ପ୍ରେରଣା ଦେଇଛି ।

• କେଉଁଠୁ ଆରମ୍ଭ ହେଲା ତାଙ୍କ ଯାତ୍ରା ?

ଅଭିଷେକ ହେଉଛନ୍ତି ବିଦିଶା ଜିଲ୍ଲା ରାମପୁର ଗାଁର ଅଧିବାସୀ । ନିଜ ପରିବାର ସହିତ ସେ ଭୋପାଳରେ ରୁହନ୍ତି । ସେ ପ୍ରଥମରୁ ଇଣ୍ଟରନେଟ୍‌ କାଫେ ଖୋଲିଥିଲେ, କିନ୍ତୁ ମୋବାଇଲ ଓ ଅନଲାଇନ ସେବାର ବହୁଳ ବ୍ୟବହାର ପରେ ତାଙ୍କୁ ଏହାକୁ ବନ୍ଦ କରିବାକୁ ପଡ଼ିଥିଲା । ଏହି ବ୍ୟବସାୟ ବନ୍ଦ ହେବା ପରେ ସେ ନିରାଶ ହୋଇନଥିଲେ । ଏହାପରେ ବି ସେ ଚେଷ୍ଟା ଜାରି ରଖିଥିଲେ । ତାଙ୍କୁ ରୋଷେଇ କରିବା ମଧ୍ୟ ବେଶ ପସନ୍ଦ ଥିଲା । ଏଥିଲାଗି ସେ ୟୁଟ୍ୟୁବରୁ ରେସିପି ଶିଖୁଥିଲେ । ଏହାପରେ ଅଭିଷେକ ଷ୍ଟ୍ରିଟ୍ ଫୁଡ୍ ବିକିବା ଆରମ୍ଭ କରିଥିଲେ ।

• ରିଲ୍ ଭାଇରାଲ ପରେ ବଢିଲା ଭିଡ଼

ପ୍ରଥମରୁ ବ୍ୟବସାୟ ଛୋଟ ଥିଲା । ଏହାକୁ ବଢାଇବା ଲାଗି ଅଭିଷେକ ସୋସିଆଲ ମିଡିଆର ସହାୟତା ନେଇଥିଲେ । ଏହାପରେ ସେ ସାଣ୍ଡୱିଚ୍ ପ୍ରସ୍ତୁତ କରିବାର ଏକ ଛୋଟ ରିଲ୍ ପୋଷ୍ଟ କରିଥିଲେଓ କିଛି ସମୟ ପରେ ଏହି ରିଲ୍ ଭାଇରାଲ ହୋଇଥିଲା । ରିଲ୍ ଭାଇରାଲ ହେବାପରେ ଭୋପାଳର ବିଭିନ୍ନ ସ୍ଥାନରୁ ଅନେକ ଲୋକ ସାଣ୍ଡୱିଚ୍ କିଣିବା ଲାଗି ତାଙ୍କ ଦୋକାନରେ ପହଞ୍ଚିଥିଲେ । ଏବେ ତାଙ୍କ ଦୋକାନରେ ଅନେକ ଗ୍ରାହକଙ୍କ ଭିଡ଼ ଲାଗୁଛି ।

ପଢନ୍ତୁ ଏହି ଖବର: IT ଚାକିରି ଛାଡ଼ି କରୁଛନ୍ତି କ୍ଷୀର ବ୍ୟବସାୟ; ରୋଜଗାର ଶୁଣି ଉଡ଼ିବ ହୋସ୍

• ମାସକୁ ୨୫ ଲକ୍ଷ ଟଙ୍କା ରୋଜଗାର

ଅଭିଷେକଙ୍କ ଏକ ସାଧାରଣ ରିଲ୍ ତାଙ୍କ ଭାଗ୍ୟ ବଦଳାଇଦେଇଥିଲା । ଧୀରେଧୀରେ ତାଙ୍କ ରୋଜଗାର ବଢିଥିଲା । ଅଭିଷେକ କୁହନ୍ତି ଯେ ଦୋକାନ ଖୋଲିବା ଲାଗି ତାଙ୍କୁ ୩୦ ହଜାର ଟଙ୍କା ଖର୍ଚ୍ଚ କରିବାକୁ ପଡ଼ିଥିଲା, କିନ୍ତୁ ଏବେ ସେ ଲକ୍ଷ ଲକ୍ଷ ଟଙ୍କା ରୋଜଗାର କରୁଛନ୍ତି । ଦିନକୁ ସେ ୬୦୦ ସାଣ୍ଡୱିଚ୍ ବିକ୍ରି କରୁଛନ୍ତି । ସେ ସାଣ୍ଡୱିଚ୍ ବିକ୍ରି କରି ମାସକୁ ୨୫ ଲକ୍ଷ ଟଙ୍କା ରୋଜଗାର କରୁଥିବା କହିଛନ୍ତି ।