ନୂଆଦିଲ୍ଲୀ: ପାର୍ବଣ ଋତୁର ଠିକ୍ ପୂର୍ବରୁ ସାଧାରଣ ଜନତାଙ୍କ ଉପରେ ମହଙ୍ଗା ମାଡ଼ । ବର୍ତ୍ତମାନର ଦୈନନ୍ଦିନ ଜୀବନର ବ୍ୟବହୃତ ବୈଦ୍ୟୁତିକ ସାମଗ୍ରୀ ବୃଦ୍ଧି ପାଇବାକୁ ଯାଉଛି । ଏୟାର କଣ୍ଡିସନର (ଏସି), ଏଲଇଡି ଟିଭି, ୱାଶିଂ ମେସିନ ଓ ଫ୍ରିଜ ଭଳି ଅନେକ ଆବଶ୍ୟକୀୟ ଇଲେକ୍ଟ୍ରୋନିକ୍ସ ଉତ୍ପାଦର ଦାମରେ ବୃଦ୍ଧି ଘଟିବ । ଇଲେକ୍ଟ୍ରୋନିକ୍ କମ୍ପାନୀଗୁଡ଼ିକ ଅକ୍ଟୋବର ପହିଲାରୁ ଏହି ଜିନିଷଗୁଡ଼ିକ ଉପରେ ୫ରୁ ୮ ପ୍ରତିଶତ ଦାମ ବୃଦ୍ଧି କରିବାକୁ ଯାଉଛନ୍ତି । ଏହା ତୃତୀୟ ଥର ପାଇଁ ଦାମ ବଢିବାକୁ ଯାଉଛି ।
ଏୟାର କଣ୍ଡିସନରର ଦାମ ୫ରୁ ୮ ପ୍ରତିଶତ ବୃଦ୍ଧି ପାଇବାର ସମ୍ଭାବନା ଥିବାବେଳେ ଅନ୍ୟ କିଛି ଇଲେକ୍ଟ୍ରୋନିକ୍ସ କମ୍ପାନୀଗୁଡ଼ିକ ୱାଶିଂ ମେସିନ, ରେଫ୍ରିଜିରେଟର ଓ ଏଲଇଡି ଟିଭି ଦାମ ଉପରେ ୩ରୁ ୪ ପ୍ରତିଶତ ଦାମ ବୃଦ୍ଧି ଘଟାଇପାରନ୍ତି । ଅନେକ କମ୍ପାନୀର କହିବା ଅନୁସାରେ, ଦାମ ବଢିଲେ ଗ୍ରାହକଙ୍କ ଉପରେ ପ୍ରଭାବ ପଡିପାରେ । ସେପଟେ ଅନ୍ୟ କିଛି କମ୍ପାନୀଗୁଡ଼ିକ କହିଛନ୍ତି ଯେ ଏହି ମହଙ୍ଗା ମାଡ଼ ଗ୍ରାହକଙ୍କ ଉପରେ ସୀମିତ ରହିପାରେ, କାରଣ ପୂର୍ବରୁ ଡିଲର ଓ ଡିଷ୍ଟ୍ରିବ୍ୟୁଟରମାନଙ୍କ ନିକଟରେ ପୁରୁଣା ପ୍ରଡକ୍ଟ ରହିଛି । ଏଗୁଡ଼ିକୁ ସେମାନେ ପୁରୁଣା ଦାମରେ ହିଁ ବିକ୍ରି କରିପାରନ୍ତି ।
- କେଉଁ କମ୍ପାନୀ ଦାମ ବୃଦ୍ଧି କରିବ ?
ବ୍ଲୁ ଷ୍ଟାର, ଗୋଦରେଜ୍ ଆପ୍ଲାଏନ୍ସେସ, ହାୟର, ଡଇକିନ ଓ ସୁପର୍ ପ୍ଲାଷ୍ଟୋନିକ୍ସ ସମେତ ଅନେକ କମ୍ପାନୀ ବିଭିନ୍ନ ଶ୍ରେଣୀର ପ୍ରଡକ୍ଟଗୁଡ଼ିକ ଉପରେ ଦାମ ବୃଦ୍ଧି କରିବା ନେଇ ଘୋଷଣା କରିସାରିଛନ୍ତି । ସେହିପରି ହିତାଚି ବ୍ରାଣ୍ଡର ଏସି ବିକ୍ରି କରୁଥିବା ଏଲଜି ଓ ବୋଶ୍ ହୋମ କମ୍ଫର୍ଟ ମଧ୍ୟ ଏସିର ଦାମ ୫ ପ୍ରତିଶତ ବଢାଇବେ ବୋଲି ଘୋଷଣା କରିଛନ୍ତି । ପେନାସୋନିକ୍ କେତେ ଟଙ୍କା ବୃଦ୍ଧି କରିବ ସେ ନେଇ ଏବେ ବି ଆକଳନ କରୁଛି ।
କମ୍ପାନୀଗୁଡ଼ିକର କହିବାନୁସାରେ ତମ୍ବା, ଆଲୁମିନିୟମ, ଷ୍ଟିଲ୍, ପ୍ଲାଷ୍ଟିକ୍ ଓ କଞ୍ଚା ତେଲର ଦାମ ବୃଦ୍ଧି ପାଉଥିବାବେଳେ ଆମଦାନୀ ଖର୍ଚ୍ଚ ଓ ବିଦେଶୀ ମୁଦ୍ରାର ଦାମ ତଳ ଉପର ହେଉଥିବା ଦେଖି ଦାମଗୁଡ଼ିକୁ ବୃଦ୍ଧି କରାଯାଉଛି । ବ୍ଲୁ ଷ୍ଟାର ଏମଡି ବି. ତ୍ୟାଗରାଜନ କହିଛନ୍ତି ଯେ ଆମଦାନୀ ମୂଲ୍ୟ ବୃଦ୍ଧି ପାଉଥିବା ଯୋଗୁଁ ଏସି, ଡିପ୍ ଫ୍ରିଜରର ଦାମ ୫ରୁ ୮ ପ୍ରତିଶତ ବଢାଯାଇଛି । ସେ ଆହୁରି କହିଛନ୍ତି ଯେ ଏହାକୁ ମିଶାଇ ଚଳିତ ବର୍ଷ ମୋଟ ୩ଥର ଲାଗି କଞ୍ଚାମାଲ ଯେପରିକି ତମ୍ବା, ଷ୍ଟିଲ୍ ଆଲୁମିନିୟମ ଆଦିର ଦାମ ବୃଦ୍ଧି ପାଇଛି । ସେହିପରି ହାୟର ଇଣ୍ଡିଆର ଚେୟାରମ୍ଯାନ୍ ଏନ.ଏସ ସତୀଶ କହିଛନ୍ତି ଯେ ଅକ୍ଟୋବରରୁ ଏସିର ଦାମ ୫ ପ୍ରତିଶତ ବୃଦ୍ଧି ପାଇବ । ଅନ୍ୟ ଉତ୍ପାଦ ଯେପରିକି ଏଲଇଡି ଟିଭି, ୱାଶିଂ ମେସିନର ଦାମ ମଧ୍ୟ ୨-୩ ପ୍ରତିଶତ ବଢିବ ।
ପଢନ୍ତୁ ଏହି ଖବର: ଅକ୍ଟୋବର ସୁଦ୍ଧା ମିଳିବ ୫ ମାସର ବକେୟା ଭତ୍ତା; କାହାକୁ କେତେ ମିଳିବ?- ପାର୍ବଣ ଋତୁ ଉପରେ କଣ ପ୍ରଭାବ ପଡ଼ିବ ?
ବୈଦ୍ୟୁତିକ ଶିଳ୍ପ ଲାଗି ଏହି ଦରଦାମ ବୃଦ୍ଧି ଚିନ୍ତାର ବିଷୟ ହୋଇପାରେ । କାରଣ ଏହା ପାର୍ବଣ ଋତୁରେ ଗ୍ରାହକଙ୍କ ଚାହିଦାକୁ ସିଧାସଳଖ ପ୍ରଭାବିତ କରିପାରେ । ଭାରତୀୟ ଗ୍ରାହକମାନେ ବିଶେଷ କରି ପାର୍ବଣ ଋତୁରେ ଘରକୁ ନୂଆ ଜିନିଷ କିଣନ୍ତି । ଏହି ସମୟରେ ସମସ୍ତ ଆବଶ୍ୟକୀୟ ଜିନିଷ ପୂର୍ବାପେକ୍ଷା ଶସ୍ତା ହୋଇଥାଏ । ହେଲେ ଏବେ ଦାମ ବୃଦ୍ଧି ପାଇବା ପରେ ଏହା କିଛି ସ୍ତର ପର୍ଯ୍ୟନ୍ତ ଗ୍ରାହକଙ୍କ କ୍ରୟ ଉପରେ ପ୍ରଭାବ ପକାଇପାରେ ।
