ଆଉ କିଛି ଦିନ ପରେ ଶେଷ ହେବାକୁ ଯାଉଛି ଜୁନ୍‌ ମାସ । ଆରମ୍ଭ ହେବ ଜୁଲାଇ ମାସ । ପ୍ରତି ମାସ ପରି ପରବର୍ତ୍ତୀ ମାସରେ ମଧ୍ୟ ଅନେକ ବଡ଼ ପରିବର୍ତ୍ତନ ହେବ । ଏଥିରେ LPG ସିଲିଣ୍ଡର ମୂଲ୍ୟରେ ପରିବର୍ତ୍ତନ ଏବଂ କ୍ରେଡିଟ୍ କାର୍ଡ ନିୟମରେ ପରିବର୍ତ୍ତନ ରହିଛି । ଏହା ବ୍ୟତୀତ, କାର କିଣିବାକୁ ଆଗ୍ରହୀ ଥିବା ବ୍ୟକ୍ତିମାନଙ୍କୁ ମଧ୍ୟ ବଡ଼ ଝଟକା ମିଳିପାରେ । ଆସନ୍ତୁ ଜାଣିବା ଏମିତି ୫ଟି ପରିବର୍ତ୍ତନ ବିଷୟରେ, ଯାହା ଜୁଲାଇ ମାସରୁ ଲାଗୁ ହୋଇପାରେ ।

ପ୍ରଥମ ପରିବର୍ତ୍ତନ: LPG ସିଲିଣ୍ଡର ମୂଲ୍ୟରେ ପରିବର୍ତ୍ତନ

ପ୍ରତି ମାସର ପ୍ରଥମ ଦିନରେ ସାରା ଦେଶର ଲୋକମାନେ LPG ସିଲିଣ୍ଡର ମୂଲ୍ୟରେ ପରିବର୍ତ୍ତନ ଉପରେ ନଜର ରଖିଥାନ୍ତି । କାରଣ ଏହି ସମସ୍ୟା ସିଧାସଳଖ ପରିବାରର ରୋଷେଇ ବଜେଟ୍ ଉପରେ ପ୍ରଭାବ ପକାଏ । ଆମେରିକା-ଇରାନ ଯୁଦ୍ଧ ଯୋଗୁଁ LPG ମୂଲ୍ୟ ବାରମ୍ବାର ବୃଦ୍ଧି ପାଇଥିଲା । ଜୁନ୍ ୧ ତାରିଖରେ ବାଣିଜ୍ୟିକ LPG ସିଲିଣ୍ଡର ମୂଲ୍ୟ ୫୩.୫୦ ଟଙ୍କା ମହଙ୍ଗା ହୋଇଥିଲା । କିନ୍ତୁ ୧୪ କିଲୋଗ୍ରାମ LPG ସିଲିଣ୍ଡରର ମୂଲ୍ୟ ସ୍ଥିର ରହିଛି ।

ଦ୍ୱିତୀୟ ପରିବର୍ତ୍ତନ: ATF ମୂଲ୍ୟ ସଂଶୋଧନ

ଜୁଲାଇ ୧ରୁ ଏୟାର ଟର୍ବାଇନ୍‌ ଇନ୍ଧନ(ATF)ର ମୂଲ୍ୟରେ ପରିବର୍ତ୍ତନ ହୋଇପାରେ । ତୈଳ କମ୍ପାନୀଗୁଡ଼ିକ ପ୍ରତି ମାସର ପ୍ରଥମ ଦିନରେ ATF ମୂଲ୍ୟ ସଂଶୋଧନ କରନ୍ତି । ଏହି ମୂଲ୍ୟ ବୃଦ୍ଧି ଦ୍ୱାରା ବିମାନ ଯାତ୍ରା ଖର୍ଚ୍ଚ ବୃଦ୍ଧି ପାଏ ।

ତୃତୀୟ ପରିବର୍ତ୍ତନ: HDFC କ୍ରେଡିଟ୍ କାର୍ଡ ନିୟମ

HDFC ବ୍ୟାଙ୍କର Regalia Gold କ୍ରେଡିଟ୍ କାର୍ଡ ବ୍ୟବହାରକାରୀଙ୍କ ପାଇଁ ଜୁଲାଇ ୧ରୁ ନୂଆ ନିୟମ ଲାଗୁ ହେବ। ଘରୋଇ ବିମାନବନ୍ଦର ଲାଉଞ୍ଜର ମାଗଣା ସୁବିଧା ପାଇବାକୁ ହେଲେ, ପୂର୍ବ ତ୍ରୟମାସିକରେ ଅତିକମରେ ୬୦ ହଜାର ଟଙ୍କା ଖର୍ଚ୍ଚ କରିଥିବା ଆବଶ୍ୟକ ହେବ ।

ଚତୁର୍ଥ ପରିବର୍ତ୍ତନ: ମାଗଣା ଆଧାର ଅପଡେଟ୍

୧ ଜୁଲାଇରୁ UIDAI ଆଧାର କାର୍ଡ ବ୍ୟବହାରକାରୀଙ୍କୁ ଆଶ୍ୱସ୍ତି ପ୍ରଦାନ କରୁଛି । ନିୟାମକ ଦ୍ୱାରା ଜାରି କରାଯାଇଥିବା ଏକ ବିଜ୍ଞପ୍ତି ଅନୁଯାୟୀ, ଯଦି ଆପଣଙ୍କ ଆଧାର କାର୍ଡରେ ଆପଣଙ୍କ ଇମେଲ୍ ଆଇଡି ଅପଡେଟ୍ ହୋଇନାହିଁ, ତେବେ ଏହା ୧ ଜୁଲାଇରୁ ମାଗଣା ହେବ । UIDAI ଡିସେମ୍ବର ପର୍ଯ୍ୟନ୍ତ ଛଅ ମାସ ପାଇଁ ଆଧାରରେ ଆପଣଙ୍କ ଇମେଲ୍ ଠିକଣା ଅପଡେଟ୍ କରିବା ପାଇଁ ମାଗଣା ସେବା ପ୍ରଦାନ କରୁଛି । ପୂର୍ବରୁ, ଏହି କାର୍ଯ୍ୟ ପାଇଁ ୭୫ ଟଙ୍କା ଦେବାକୁ ପଡ଼ୁଥିଲା ।

ପଞ୍ଚମ ପରିବର୍ତ୍ତନ: ଗାଡ଼ି କିଣିବା ମହଙ୍ଗା ହେବ

ଜୁଲାଇ ୧ରୁ କେତେକ ଅଟୋମୋବାଇଲ୍ କମ୍ପାନୀ ନିଜ ଗାଡ଼ିର ଦାମ ବଢ଼ାଇବାକୁ ଯାଉଛନ୍ତି । Kia ନିଜ କାର୍ ମୂଲ୍ୟରେ ୨ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିବାକୁ ଘୋଷଣା କରିଥିବାବେଳେ, Tata Motors ମଧ୍ୟ ICE ଓ EV ମଡେଲର ଦାମ ୧.୫ ପ୍ରତିଶତ ପର୍ଯ୍ୟନ୍ତ ବଢ଼ାଇପାରେ ।