କିଛି ବର୍ଷ ପୂର୍ବରୁ ଭାରତର ସବୁଠୁ ଧନୀ ତାଲିକାରେ ଅଧିକାଂଶ ନାମ ବଡ଼ ବଡ଼ ବ୍ଯବସାୟୀଙ୍କର ରହୁଥିଲା । ମାତ୍ର ଏବେ ଚିତ୍ର ବଦଳିଛି । ନୂଆ ପିଢିର ଷ୍ଟାର୍ଟଅପ୍ ପ୍ରତିଷ୍ଠାତା ଖୁବ କମ ବୟସରେ ଏହି ସଫଳତାର ଅଧିକାରୀ ହୋଇପାରିଛନ୍ତି । କମ ବୟସରେ ନିଜେ ରୋଜଗାରକ୍ଷମ ହେବାସହ ହଜାର ହଜାର ଲୋକଙ୍କୁ ନିଯୁକ୍ତି ପ୍ରଦାନ କରିପାରୁଛନ୍ତି । ଏହି ଧାରାରେ ଆଉ ଜଣେ ସଫଳ ନାମ ହେଉଛନ୍ତି କୈବଲ୍ୟ ବୋହରା । ଯିଏକି ଟେକ୍ନୋଲୋଜିର ବ୍ୟବହାର କରି ଏମିତି ଏକ ଆପ୍ ଆଣିଛନ୍ତି ଯେ କ୍ରମାଗତ ଭାବେ ସଫଳତାର ପାହାଚ ଚଢି ଚାଲିଛନ୍ତି ।
କ୍ଵିକ୍ କମର୍ସ ପ୍ଲାଟଫର୍ମ ଜେପ୍ଟୋ (Zepto)ର ସହ ପ୍ରତିଷ୍ଠାତା ହେଉଛନ୍ତି କୈବଲ୍ୟ ବୋହରା, ଯିଏକି ଆଜି ଭାରତର ଜଣେ ସର୍ବକନିଷ୍ଠ ଟେକ୍ କୋଟିପତି ଭାବେ ଜଣାଶୁଣା । ସେ ବହୁ କମ ବୟସରେ କମ୍ପାନୀ ତିଆରି କରିଥିଲେ ଓ ଭାରତରେ ରୋଷେଇ ସାମଗ୍ରୀ କିଣିବାର ଧାରାକୁ ପରିବର୍ତ୍ତନ କରିଛନ୍ତି । ଜେପ୍ଟୋ କୌଣସି ଟେକ୍ କମ୍ପାନୀ ନୁହେଁ, ମାତ୍ର ଏହି ଆପଟି ସମ୍ପୂର୍ଣ୍ଣ ଭାବେ ଟେକ୍ ଉପରେ ଆଧାରିତ । ଏହି କମ୍ପାନୀରେ କୃତ୍ରିମ ବୁଦ୍ଧିମତା ବା AIର ବହୁଳ ବ୍ୟବହାର ହୋଇଛି ।
- ଅଧାରୁ ଛାଡ଼ିଦେଇଥିଲେ କଲେଜ ପାଠପଢା
କୈବଲ୍ୟ ବୋହରା ଓ ତାଙ୍କର ବନ୍ଧୁ ଆଦିତ ପଲିଚା ଛୋଟବେଳୁ ପରସ୍ପରକୁ ଜାଣିଥିଲେ । ଉଭୟ ଆମେରିକାର ଷ୍ଟେନଫୋର୍ଡ ବିଶ୍ଵବିଦ୍ୟାଳୟରେ ପାଠ ପଢିଥିଲେ, ମାତ୍ର ଅଧାରୁ ପାଠ ଛାଡ଼ିବାକୁ ନିଷ୍ପତ୍ତି ନେଇଥିଲେ । ସେମାନେ ବିଶ୍ଵାସ କରିଥିଲେ ଯେ ଯଦି ଏହି ବିଚାରଧାରାଟି ସଠିକ୍ ତେବେ ଏଥିରେ ବିଳମ୍ବ କରିବା ପରିବର୍ତ୍ତେ ତତକ୍ଷଣାତ ଏହା ଉପରେ କାମ କରିବା ଉଚିତ । କୈବଲ୍ୟଙ୍କ ମୋଟ ସମ୍ପତ୍ତିର ମୂଲ୍ୟ ୪୪୮୦ କୋଟି ଟଙ୍କା ବୋଲି କୁହାଯାଉଛି ।
କୋଭିଡ ମହାମାରୀ ସମୟରେ ଲୋକେ ଘରୁ ବାହାରିବା ମୁସ୍କିଲ ହୋଇପଡ଼ିଥିଲା । ଉଭୟ ପ୍ରଥମେ ହ୍ଵାଟ୍ସଆପ୍ ଜରିଆରେ ରୋଷେଇ ସାମଗ୍ରୀ ଡେଲିଭରି କରିବା ଆରମ୍ଭ କରିଥିଲେ । ପରେ ସେମାନେ ଏହି ବ୍ଯବସାୟକୁ ବୃଦ୍ଧି କରିଥିଲେ । ୨୦୨୧ରେ ଜେପ୍ଟୋ ଲଞ୍ଚ କରିଥିଲେ । କୈବଲ୍ଯ ଆପରେ ଟେକ୍ନୋଲୋଜି ବିଭାଗକୁ ଦେଖିଥାନ୍ତି, ଏଥିଲାଗି ସହପ୍ରତିଷ୍ଠାତା ସହିତ ସେ ଏବେ ଜେପ୍ଟୋରେ ମୁଖ୍ଯ ଟେକ୍ନୋଲୋଜି ଅଫିସର ଅଛନ୍ତି ।
- ୧୦ ମିନିଟ ଡେଲିଭରି ବଦଳାଇଲା ଭାଗ୍ୟ
ଜେପ୍ଟୋ ଦାବି କରେ ଯେ ଏହା ମାତ୍ର ୧୦ ମିନିଟ୍ ଭିତରେ ଗ୍ରାହକଙ୍କ ନିକଟରେ ସେମାନଙ୍କ ଅର୍ଡର ପହଞ୍ଚାଇବ । ପ୍ରାରମ୍ଭରେ ଅନେକ ଏହାକୁ ଅସମ୍ଭବ ବୋଲି କହିଥିଲେ । ମାତ୍ର କମ୍ପାନୀ ସହରର ବିଭିନ୍ନ ସ୍ଥାନରେ ଛୋଟ ଛୋଟ ଷ୍ଟୋର ଚଲାଇଲେ ଓ ଏମିତି ଏକ ବ୍ଯବସ୍ଥା କଲେ ଯେ ସତରେ ଯେପରି ସେମାନେ ନିଜର ଦାବିକୁ ପୂରଣ କରିପାରିବେ । ଏହା ହିଁ ଜେପ୍ଟୋକୁ ସଫଳତା ଦେଇଥିଲା । ଆଜି ଜେପ୍ଟୋର ମୁକାବିଲା Blinkit, Swiggy Instamart, BigBasket, Amazon Fresh ସହ ହୋଇଥାଏ ।
ପଢନ୍ତୁ ଏହି ଖବର: ୨୬ ବର୍ଷୀୟ ଯୁବକଙ୍କ ଅସାଧାରଣ କାର୍ଯ୍ୟ: AI ଉପକରଣ ଗୋଟେ ଦିନରେ ୭୭ କୋଟି ପ୍ରିଣ୍ଟ- କୈବଲ୍ୟ କେମିତି ହେଲେ କୋଟିପତି ?
ଷ୍ଟାର୍ଟଅପ୍ ଫାଉଣ୍ଡରଙ୍କ ସମ୍ପତ୍ତି ସେମାନଙ୍କ ନିକଟରେ ରଖାଯାଉଥିବା ଟଙ୍କା ଉପରେ ନିର୍ଭର କରେ ନାହିଁ, ବରଂ ସେମାନଙ୍କ କମ୍ପାନୀର ମୂଲ୍ଯ ଓ ସେୟାରଗୁଡ଼ିକରୁ ଜଣାପଡ଼େ । ଯେତେବେଳେ ପୁଞ୍ଜିପତି କୌଣସି କମ୍ପାନୀରେ ଏକ ବଡ଼ ପୁଞ୍ଜି ଲଗାନ୍ତି, ଏହା ଧୀରେଧୀରେ ଆରବ ଡଲାର ପର୍ଯ୍ୟନ୍ତ ପହଞ୍ଚିଯାଏ । ଏହାଦ୍ଵାରା କମ୍ପାନୀର ପ୍ରତିଷ୍ଠାତା ମଧ୍ଯ ଆରବପତି ତାଲିକାରେ ସାମିଲ ହୋଇଥାନ୍ତି । କୈବଲ୍ଯ ବୋହରା ଏପରି ଭାବରେ ଏହି ତାଲିକାରେ ସାମିଲ ହୋଇଛନ୍ତି ।
