RBI New Rules / ଡିଜିଟାଲ୍ ପେମେଣ୍ଟରେ ସାଇବର ଠକେଇ ରୋକିବାକୁ RBIର ନୂଆ ନିୟମ

ମୁମ୍ବାଇ: ଅନଲାଇନ୍ ପେମେଣ୍ଟ ଓ ଡିଜିଟାଲ୍ କାରବାର ବଢ଼ିବା ସହ ସାଇବର ଠକେଇ ମାମଲା ମଧ୍ୟ ବଢ଼ୁଛି । ଲୋକଙ୍କ ବ୍ୟାଙ୍କ ଖାତା ଓ ଟଙ୍କାକୁ ସୁରକ୍ଷିତ ରଖିବା ପାଇଁ ଏବେ ଡିଜିଟାଲ୍ ପେମେଣ୍ଟ ବ୍ୟବସ୍ଥାର ସୁରକ୍ଷାକୁ ଆହୁରି କଡ଼ାକଡ଼ି କରିଛି ଭାରତୀୟ ରିଜର୍ଭ ବ୍ୟାଙ୍କ (RBI)।

ନୂଆ ନିୟମ ଅନୁସାରେ, ନନ୍-ବ୍ୟାଙ୍କ ପେମେଣ୍ଟ ସିଷ୍ଟମ୍ ଅପରେଟରମାନଙ୍କୁ ସାଇବର ଆକ୍ରମଣ, ଗୁରୁତ୍ୱପୂର୍ଣ୍ଣ ସିଷ୍ଟମ୍ ବନ୍ଦ ହେବା କିମ୍ବା ପେମେଣ୍ଟ ସେଟଲମେଣ୍ଟରେ ବିଳମ୍ବ ଭଳି ଅସାଧାରଣ ଘଟଣା ବିଷୟରେ ୬ ଘଣ୍ଟା ମଧ୍ୟରେ RBIକୁ ଜଣାଇବାକୁ ପଡ଼ିବ । ଏହାଦ୍ୱାରା ଏଭଳି ଘଟଣା ଉପରେ ଶୀଘ୍ର ନଜର ରଖିବା ଓ ଆବଶ୍ୟକ ପଦକ୍ଷେପ ନେବା ସହଜ ହୋଇ ପାରିବ ।

କେଉଁ ସଂସ୍ଥା ଉପରେ ଲାଗୁ ହେବ ଏହି ନିୟମ ?

RBIର ନୂଆ ନିର୍ଦ୍ଦେଶ ଅନୁସାରେ, ଏହି ନିୟମ ଅନୁମୋଦିତ ନନ୍-ବ୍ୟାଙ୍କ ପେମେଣ୍ଟ ସିଷ୍ଟମ୍ ଅପରେଟର (PSO)ଙ୍କ ପାଇଁ ଲାଗୁ ହେବ । ଏଥିରେ ନ୍ୟାସନାଲ ପେମେଣ୍ଟସ୍ କର୍ପୋରେସନ୍ ଅଫ୍ ଇଣ୍ଡିଆ (NPCI) ସହ କାର୍ଡ ନେଟୱର୍କ କମ୍ପାନୀ, ପେମେଣ୍ଟ ଏଗ୍ରିଗେଟର, ପ୍ରିପେଡ୍ ପେମେଣ୍ଟ ଇନଷ୍ଟ୍ରୁମେଣ୍ଟ (PPI) ଜାରି କରୁଥିବା ସଂସ୍ଥା, ହ୍ୱାଇଟ୍ ଲେବଲ୍ ATM ଅପରେଟର ଆଦି ରହିଛନ୍ତି ।

ଏଥିସହ ପଢ଼ନ୍ତୁ: ଆସନ୍ତା ସପ୍ତାହରେ ୩ ଦିନ ବନ୍ଦ ରହିବ ବ୍ୟାଙ୍କ, ଜାଣନ୍ତୁ କେଉଁ ଦିନ ଓ କେଉଁ ସହରରେ ରହିବ ଛୁଟି 

ବଡ଼ ଓ ମଧ୍ୟମ ଧରଣର ପେମେଣ୍ଟ ଅପରେଟରଙ୍କ ପାଇଁ ଏହି ନିୟମ RBIର ଅଫିସିଆଲ୍ ୱେବସାଇଟ୍‌ରେ ପ୍ରକାଶ ପାଇବା ଦିନଠାରୁ ଲାଗୁ ହୋଇଛି । ଛୋଟ ପେମେଣ୍ଟ ଅପରେଟରଙ୍କ ପାଇଁ ୧ ଏପ୍ରିଲ ୨୦୨୮ରୁ ଏହା ଲାଗୁ କରାଯିବ ।

ଗ୍ରାହକଙ୍କ ସୁରକ୍ଷାକୁ ଗୁରୁତ୍ୱ

ନୂଆ ନିୟମରେ ଗ୍ରାହକଙ୍କ ସୁରକ୍ଷା ଉପରେ ମଧ୍ୟ ଗୁରୁତ୍ୱ ଦିଆଯାଇଛି । ପେମେଣ୍ଟ ସଂସ୍ଥାଗୁଡ଼ିକୁ ସନ୍ଦେହଜନକ କାରବାର ଉପରେ ନଜର ରଖିବା, ଗ୍ରାହକଙ୍କୁ ଠକେଇ ସମ୍ପର୍କିତ କାରବାର ଜଣାଇବାର ସୁବିଧା ଦେବା ଏବଂ ଅନଧିକୃତ କାରବାରର ଅଭିଯୋଗ ଉପରେ ଶୀଘ୍ର ପଦକ୍ଷେପ ନେବା ପାଇଁ ବ୍ୟବସ୍ଥା କରିବାକୁ କୁହାଯାଇଛି । ଏଥିପାଇଁ ୨୪ ଘଣ୍ଟା ସେବା ମଧ୍ୟ ରଖିବାକୁ ହେବ ।

ସୂଚନାଯୋଗ୍ୟ, ଆରବିଆଇର ୬ ଘଣ୍ଟା ମଧ୍ୟରେ ରିପୋର୍ଟ ଦେବା ନିୟମଟି ପେମେଣ୍ଟ ସଂସ୍ଥାଗୁଡ଼ିକ ପାଇଁ । ଏହା ଗ୍ରାହକଙ୍କ ପାଇଁ ଠକେଇ ଅଭିଯୋଗ କରିବାର ୬ ଘଣ୍ଟାର ସମୟସୀମା ନୁହେଁ ।