Stock Market Crash / ଗୁରୁବାର ସେୟାର ମାର୍କେଟରେ ବଡ଼ କ୍ରାସ୍‌, ୧୨୦୦ ପଏଣ୍ଟ ହ୍ରାସ ପାଇଲା ସେନ୍‌ସେକ୍ସ

ସେୟାର ବଜାରରେ ଅଶୁଭ ଗୁରୁବାର । ଆଜି ବଜାର ଖୋଲିବା ମାତ୍ର ବଜାରରେ ଦେଖିବାକୁ ମିଳିଛି ବଡ଼ କ୍ରାସ୍‌ । କାରବାର ଆରମ୍ଭରୁ ସେନ୍‌ସେକ୍ସ ୭୦୦ ପଏଣ୍ଟରୁ ଅଧିକ ଖସିଥିବା ବେଳେ ନିଫ୍ଟି ମଧ୍ୟ ୨୦୦ ପଏଣ୍ଟରୁ ଅଧିକ ତଳକୁ ଯାଇଥିଲା । ତେବେ ଦିନ ବଢ଼ିବା ସହିତ ସେନ୍ସେକ୍ସ ୧୨୦୦ ପଏଣ୍ଟରୁ ଅଧିକ ଖସିଥିବା ବେଳେ ନିଫ୍ଟି ମଧ୍ୟ ୨୩,୦୦୦ ସ୍ତର ନିକଟକୁ ଆସିଥିଲା ।

ଗୁରୁବାର ସେନ୍ସେକ୍ସ ଏହାର ପୂର୍ବଦିନର ୭୪,୮୨୮ ପଏଣ୍ଟ ସ୍ତର ତୁଳନାରେ ହ୍ରାସ ସହ ୭୪,୨୭୨ ପଏଣ୍ଟରେ ଖୋଲିଥିଲା । କାରବାର ଆରମ୍ଭ ହେବାର ମାତ୍ର କିଛି ମିନିଟ୍‌ ମଧ୍ୟରେ ସୂଚକାଙ୍କ ୭୦୦ ପଏଣ୍ଟରୁ ଅଧିକ ଖସି ୭୪,୧୨୦ ପଏଣ୍ଟ ନିକଟକୁ ପହଞ୍ଚିଥିଲା ।

ସେହିପରି ଏନଏସଇ ନିଫ୍ଟି ମଧ୍ୟ ହ୍ରାସ ସହିତ ଦିନର କାରବାର ଆରମ୍ଭ କରିଥିଲା । ପୂର୍ବଦିନର ୨୩,୪୪୬ ପଏଣ୍ଟ ତୁଳନାରେ ନିଫ୍ଟି ୨୩,୨୨୧ ପଏଣ୍ଟରେ ଖୋଲିଥିଲା । ପରେ ଏହା ୨୩,୨୦୫ ପଏଣ୍ଟ ନିକଟକୁ ଖସିଯାଇଥିଲା ।

ଦିନ ୨ଟା ସମୟରେ ବଜାରରେ ଆହୁରି ହ୍ରାସ ଦେଖିବାକୁ ମିଳିଥିଲା । ସେନ୍ସେକ୍ସ ପ୍ରାୟ ୧୨୦୦ ପଏଣ୍ଟ ହ୍ରାସ ପାଇ ୭୩,୫୮୨ ପଏଣ୍ଟରେ ପହଞ୍ଚିଥିବା ବେଳେ ନିଫ୍ଟି ୩୭୫ ପଏଣ୍ଟ ଖସି ୨୩,୦୪୮ ପଏଣ୍ଟ ସ୍ତରକୁ ଆସିଥିଲା ।

ଏଥି ସହ ପଢନ୍ତୁ: ୧୫୦୦ ପଏଣ୍ଟ ଖସିଲା ସେନସେକ୍ସ, ଗୋଟିଏ ଦିନରେ ନିବେଶକଙ୍କ ଉଡ଼ିଗଲା ୧୧ ଲକ୍ଷ କୋଟି

ତେବେ ସେୟାର ବଜାରରେ ଦେଖାଯାଇଥିବା ହ୍ରାସ ମଧ୍ୟରେ ବଡ଼ ବଡ଼ କମ୍ପାନୀର ସେୟାର ମଧ୍ୟ ପ୍ରଭାବିତ ହୋଇଥିଲା । ଲାର୍ଜ କ୍ୟାପ୍‌ ସେୟାର ମଧ୍ୟରେ ବାଜାଜ୍‌ ଫାଇନାନ୍ସ ପ୍ରାୟ ୫ ପ୍ରତିଶତ, ଆକ୍ସିସ୍‌ ବ୍ୟାଙ୍କ ୩.୭୦ ପ୍ରତିଶତ, ବାଜାଜ୍‌ ଫିନସର୍ଭ ୩.୫୦ ପ୍ରତିଶତ ଏବଂ କୋଟକ୍‌ ବ୍ୟାଙ୍କ ପ୍ରାୟ ୨ ପ୍ରତିଶତ ହ୍ରାସ ପାଇଥିଲା ।
ସେହିପରି ମିଡ୍‌କ୍ୟାପ୍ ବର୍ଗରେ ପଲିସି ବଜାରର ସେୟାର ପ୍ରାୟ ୧୦ ପ୍ରତିଶତ, ଏମଏଫଏସଏଲ୍ ୯.୧୦ ପ୍ରତିଶତ, AU ବ୍ୟାଙ୍କ ୫ ପ୍ରତିଶତ, IDFC ଫର୍ଷ୍ଟ ବ୍ୟାଙ୍କ ୩.୩୦ ପ୍ରତିଶତ ଏବଂ ୟେସ୍ ବ୍ୟାଙ୍କ ୨.୬୦ ପ୍ରତିଶତ ହ୍ରାସ ପାଇଥିଲା ।

NSE IPO ନେଇ ନିବେଶକଙ୍କ ଚିନ୍ତା

ଏପଟେ ସେୟାର ବଜାରରେ ଏଭଳି ଭାରି ହ୍ରାସ ମଧ୍ୟରେ NSEର IPO ଲିଷ୍ଟିଂକୁ ନେଇ ନିବେଶକଙ୍କ ମଧ୍ୟରେ ଚିନ୍ତା ବଢ଼ିଛି । ପ୍ରାୟ ୨୨,୫୬୧.୫୭ କୋଟି ଟଙ୍କା ଆକାରର ଏହି ଆଇପିଓ ସେପ୍ଟେମ୍ବର ୧୭ରୁ ୨୧ ତାରିଖ ପର୍ଯ୍ୟନ୍ତ ଖୋଲା ରହିଥିଲା ଏବଂ ଏହାକୁ ନିବେଶକଙ୍କ ପକ୍ଷରୁ ଭଲ ପ୍ରତିକ୍ରିୟା ମିଳିଥିଲା । କିନ୍ତୁ NSE ଆଜି ୧୮୦୦ ଟଙ୍କାରେ ମାର୍କେଟରେ ଲିଷ୍ଟିଂ ହୋଇଥିଲା ।