Silver Rate / ସୁନା ଶସ୍ତା ଭିତରେ ଦିନକରେ ୧୨ ହଜାର ମହଙ୍ଗା ହେଲା ରୁପା, ଭାଙ୍ଗିଲା ସବୁ ରେକର୍ଡ

ନୂଆଦିଲ୍ଲୀ: ରୁପା ଭାଙ୍ଗିଲା ସବୁ ରେକର୍ଡ । ପ୍ରଥମଥର ପାଇଁ ଅଢ଼େଇ ଲକ୍ଷ ଡେଇଁଲା ଦର । ଡିସେମ୍ବର ୨୯ ସୋମବାର ରୁପା ଦର ସର୍ବକାଳୀନ ରେକର୍ଡ ଭାଙ୍ଗିଛି । ସୋମବାର ରୁପା ଦର ପ୍ରାୟ ୬ ପ୍ରତିଶତ ବଢ଼ିଛି । ଫଳରେ କେଜି ପିଛା ରୁପା ଦର ୨ ଲକ୍ଷ ୫୪ ହଜାର ୧୭୪ ଟଙ୍କାରେ ପହଞ୍ଚିଛି ।

ଅର୍ଥାତ୍ ଗୋଟିଏ ଦିନରେ ରୁପା ଦାମ କେଜି ପିଛା ୧୨ ହଜାର ପର୍ଯ୍ୟନ୍ତ ବୃଦ୍ଧି ପାଇଛି । ବିଗତ ସପ୍ତାହକରେ ରୁପା ଦରମ ପ୍ରାୟ ୧୫ ପ୍ରତିଶତ ବଢ଼ିଛି । ଏହା ପୂର୍ବରୁ ଶୁକ୍ରବାର କେଜି ପିଛା ରୁପା ଦର ୨ ଲକ୍ଷ ୪୨ ହଜାର ଟଙ୍କା ରହିଥିଲା ।

ଏଥିସହ ପଢ଼ନ୍ତୁ: ପ୍ଲାଟଫର୍ମ ବନାମ ପାର୍ଟନର; ଡିସେମ୍ବର ୩୧ରେ ଦେଶରେ ଗିଗ୍ ୱାର୍କରଙ୍କ ବିରୋଧ ପ୍ରଦର୍ଶନ

କାହିଁକି ବଢ଼ୁଛି ରୁପା ଦର ?

ରୁପା ଦର ଦ୍ରୁତଗତିରେ ବଢ଼ିବା ପଛରେ ଅନେକ କାରଣ ରହିଛି । ସବୁଠୁ ବଡ଼ କାରଣ ହେଉଛି- ବିଗତ ୭ ବର୍ଷ ହେଲା ଦୁନିଆରେ ରୁପା ଯୋଗାଣ ହ୍ରାସ ପାଇଛି । ଯେତେବେଳେ କି ସମାନ ସମୟରେ ରୁପାର ଚାହିଦା ବଢ଼ି ଚାଲିଛି ।

ଏବେ ସୋଲାର୍ ପ୍ୟାନେଲ୍ ତିଆରି, ବିଦ୍ୟୁତ୍ ଚାଳିତ ବ୍ୟାଟେରି ଗାଡ଼ି, ମୋବାଇଲ୍, ଲାପଟପ୍ ଭଳି ଇଲୋକ୍ଟ୍ରୋନିକ୍ସ ସାମଗ୍ରୀରେ ରୁପାର ବହୁଳ ବ୍ୟବହାର ହେଉଛି । ଅକ୍ଷୟ ଶକ୍ତି ଓ ନୂଆ ଟେକ୍ନୋଲୋଜିରେ ରୁପାର ଚାହିଦା ଦରକୁ ବଢ଼ାଇ ଦେଇଛି ।

ଆହୁରି ବଢ଼ିବ କି ରୁପା ?

ବଜାର ବିଶେଷଜ୍ଞଙ୍କ ଅନୁସାରେ, ଆଗକୁ ରୁପା ଦାମ ଖସିବାର ସମ୍ଭାବନା ବହୁତ କମ୍ । ରୁପାର ଚମକ ଆହୁରି ବଢ଼ିପାରେ । ଆଗାମୀ ଦିନରେ ରୁପା ଦର କେଜି ପିଛା ୨ ଲକ୍ଷ ୭୫ ହଜାର ଛୁଇଁପାରେ । ବିଦେଶୀ ବଜାରରେ ରୁପାର ଚାହିଦା ଏଭଳି ରହିଲେ ୨୦୨୬ରେ ରୁପାରେ ନିବେଶକାରୀଙ୍କୁ ଲାଭ ମିଳିପାରେ ।

ଏଥିସହ ପଢ଼ନ୍ତୁ: ରାଷ୍ଟ୍ରପତିଙ୍କ ପରେ ମାନିଲେ ବିଦେଶ ମନ୍ତ୍ରୀ; ଅପରେସନ୍ ସିନ୍ଦୂରରେ ପାକିସ୍ତାନ ଏୟାରବେସ୍ ଉପରେ ହୋଇଥିଲା ଆଟାକ୍

ରୁପା କିଣିବେ ନା ଅପେକ୍ଷା କରିବେ ?

ସାଧାରଣ ଲୋକଙ୍କ ମନରେ ପ୍ରଶ୍ନ ଏବେ ରୁପା କିଣିବେ ନା ଘରେ ଥିବା ରୁପାକୁ ବିକ୍ରି କରି ଲାଭ ପାଇବେ । ବିଶେଷଜ୍ଞଙ୍କ ଅନୁସାରେ, "ଯଦି ଆପଣ ବହୁ ପୂର୍ବରୁ ରୁପା କିଣିଛନ୍ତି, ତାହେଲେ ଏବେ ବିକ୍ରି କରି ଭଲ ଆୟ କରିପାରିବେ । କିନ୍ତୁ ଆପଣ ଯଦି ଏବେ ରୁପାରେ ନିବେଶ କଥା ଭାବୁଛନ୍ତି, ତାହେଲେ ଟିକେ ଅଟକିଯିବା ଭଲ ହେବ । କାରଣ ରୁପା ଦର ଦ୍ରୁତଗତିରେ ଉପରକୁ ଉଠିଛି । ଦୀର୍ଘକାଳୀନ ନିବେଶରେ ଭଲ ଆୟ ଦେବ ।"