Stock Market Crash / ସେୟାର ମାର୍କେଟରେ ବଡ଼ କ୍ରାସ୍‌, ଗୋଟିଏ ଦିନରେ ନିବେଶକଙ୍କ ୧୦ ଲକ୍ଷ କୋଟି ସ୍ୱାହା

ଗୁରୁବାର ଭାରତୀୟ ସେୟାର ବଜାରରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି । ସେନସେକ୍ସ ଓ ନିଫ୍ଟି ଉଭୟରେ ହ୍ରାସ ଯୋଗୁଁ ନିବେଶକମାନଙ୍କ ଚିନ୍ତା ବଢ଼ିଛି । ସପ୍ତାହର ଅସ୍ଥିର କାରବାର ଏବଂ ସେନ୍ସେକ୍ସର ସାପ୍ତାହିକ ଏକ୍ସପାୟାରି ମଧ୍ୟରେ ଗୁରୁବାର ବଜାର ଉପରେ ବିକ୍ରି ଚାପ ଆହୁରି ବଢ଼ିଥିଲା । ବିଏସଇ ସେନସେକ୍ସ ୧.୬୯ ପ୍ରତିଶତ ବା ୧,୨୩୧.୯୧ ପଏଣ୍ଟ ହ୍ରାସ ପାଇ ୭୧,୪୦୬.୭୯ ସ୍ତରକୁ ଖସିଥିଲା। ସେହିପରି ନିଫ୍ଟି-୫୦ରେ ୧.୮୨ ପ୍ରତିଶତ ବା ୪୧୩.୦୫ ପଏଣ୍ଟର ହ୍ରାସ ଦେଖାଯାଇଥିଲା। ଏହା ପରେ ନିଫ୍ଟି ପ୍ରାୟ ୨୨,୧୯୦ ସ୍ତରକୁ ଖସିଥିଲା ।

ନିବେଶକଙ୍କ ୧୦.୫୨ ଲକ୍ଷ କୋଟି ଟଙ୍କା କ୍ଷତି

ବଜାରରେ ଏହି ବଡ଼ ଧରଣର ବିକ୍ରି ଯୋଗୁଁ ନିବେଶକମାନେ ଭାରି କ୍ଷତି ସହିଛନ୍ତି । ତଥ୍ୟ ଅନୁସାରେ, ନିବେଶକଙ୍କ ସମ୍ପତ୍ତିରେ ପ୍ରାୟ ୧୦.୫୨ ଲକ୍ଷ କୋଟି ଟଙ୍କାର ହ୍ରାସ ଘଟିଛି ।

ବୁଧବାର ବଜାର ବନ୍ଦ ସମୟରେ ବିଏସଇରେ ତାଲିକାଭୁକ୍ତ ସମସ୍ତ କମ୍ପାନୀର ମୋଟ ମାର୍କେଟ କ୍ୟାପିଟାଲାଇଜେସନ୍ ପ୍ରାୟ ୪,୭୨,୩୫,୨୭୩.୩୯ କୋଟି ଟଙ୍କା ଥିଲା । ଗୁରୁବାର ଏହା ହ୍ରାସ ପାଇ ପ୍ରାୟ ୪,୬୧,୮୩,୬୫୯.୩୩ କୋଟି ଟଙ୍କାରେ ପହଞ୍ଚିଛି ।

ପୂରା ସପ୍ତାହ ବଜାରରେ ଚାପ

ଏହି ସପ୍ତାହ ଭାରତୀୟ ସେୟାର ବଜାର ପାଇଁ ଭଲ ରହିନାହିଁ । ସୋମବାର ବଜାର ଖୋଲିବା ସମୟରେ କିଛିଟା ସକାରାତ୍ମକ ଗତି ଦେଖାଯାଇଥିଲା । ମଙ୍ଗଳବାର ମଧ୍ୟ ବଜାରର ସ୍ଥିତି ମୋଟାମୋଟି ଠିକ୍ ଥିଲା। କିନ୍ତୁ ବୁଧବାରଠାରୁ ବଜାରରେ ବିକ୍ରି ଚାପ ବଢ଼ିଥିଲା। ଗୁରୁବାର ଏହି ଚାପ ଆହୁରି ତୀବ୍ର ହୋଇ ସେନ୍ସେକ୍ସ ଓ ନିଫ୍ଟି ଉଭୟ ଭାରି ହ୍ରାସ ପାଇଥିଲା ।

କାହିଁକି ଖସିଲା ସେୟର ବଜାର ?

ବଜାରର ଏହି ହ୍ରାସ ପଛରେ ଅନେକ କାରଣ ରହିଛି । ସେଥିମଧ୍ୟରୁ ଆରବିଆଇର ରେପୋ ରେଟ୍ ବୃଦ୍ଧିକୁ ଏକ ପ୍ରମୁଖ କାରଣ ଭାବେ ଦର୍ଶାଯାଉଛି । ବୁଧବାର ଆରବିଆଇର ତିନି ଦିନିଆ ବୈଠକ ଶେଷ ହୋଇଥିଲା ଏବଂ ରେପୋ ରେଟ୍‌ରେ ୦.୨୫ ପ୍ରତିଶତ ବୃଦ୍ଧି ଘୋଷଣା କରାଯାଇଥିଲା । ଏହାର ପ୍ରଭାବ ବଜାର ଉପରେ ପଡ଼ିଥିବା କୁହାଯାଉଛି ।

ଏହା ସହିତ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବଢ଼ିବା, ଭାରତୀୟ ଟଙ୍କାର ଦୁର୍ବଳ ପ୍ରଦର୍ଶନ ଏବଂ ଟଙ୍କା ଉପରେ ବଢ଼ୁଥିବା ଚାପ ମଧ୍ୟ ଭାରତୀୟ ସେୟର ବଜାର ପାଇଁ ଚିନ୍ତାର କାରଣ ପାଲଟିଛି ।

ଅନ୍ୟପଟେ ବିଦେଶୀ ନିବେଶକମାନେ ମଧ୍ୟ ଭାରତୀୟ ସେୟାର ବଜାରରୁ ଟଙ୍କା ପ୍ରତ୍ୟାହାର କରୁଥିବାରୁ ବଜାର ଉପରେ ବିକ୍ରି ଚାପ ବଢ଼ିଛି। ଏହି ସବୁ କାରଣ ମିଶି ଗୁରୁବାର ଦଲାଲ ଷ୍ଟ୍ରିଟ୍‌ରେ ବଡ଼ ଧରଣର ହ୍ରାସ ଦେଖାଯାଇଛି।