ଯୁଦ୍ଧ ମାଡ଼ରେ ପୁଣି ଦୋହଲିଲା ସେୟାର ବଜାର ... ବମ୍ବେ ଷ୍ଟକ ଏକ୍ସଚେଞ୍ଜ ଖୋଲୁ ଖୋଲୁ ୧୯୫୩ ପଏଣ୍ଟ ଡାଉନ୍ । କ୍ରମାଗତ ତିନି ଦିନ ଧରି ବଢ଼ିବା ପରେ ଆଜି ବଜାରରେ ବଡ଼ ଧରଣର ହ୍ରାସ । ନିଫ୍ଟି ଖସିଲା ୪୫୩ ପଏଣ୍ଟ । 

ଭାରତୀୟ ସେୟାର ବଜାର ଉପରେ ଯୁଦ୍ଧ ମାଡ଼ । ପୁଣି ଖସିଲା ସେୟାର ବଜାର । କ୍ରମାଗତ ତିନି ଦିନ ଧରି ବଢ଼ିବା ପରେ ଆଜି ବଜାରରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି । ବଜାର ଖୋଲିବା ମାତ୍ରେ ସେନସେକ୍ସ ୧୯୫୩ ପଏଣ୍ଟ ହ୍ରାସ ପାଇଥିବାବେଳେ ନିଫ୍ଟି ୪୫୩ ପଏଣ୍ଟ ତଳକୁ ଖସିଛି ।

ଇରାନ ପକ୍ଷରୁ ଗଲ୍ଫ ବା ଉପସାଗରୀୟ ଅଞ୍ଚଳର ପ୍ରମୁଖ ଶକ୍ତି କେନ୍ଦ୍ରଗୁଡ଼ିକ ଉପରେ ଆକ୍ରମଣ ପରେ ଏଭଳି ସ୍ଥିତି ଉପୁଜିଛି । ଫଳରେ ଅଶୋଧିତ ତୈଳ ଦର ବ୍ୟାରେଲ ପିଛା ୧୧୦ ଡଲାରରୁ ଅଧିକ ହୋଇଯାଇଛି । ଆମେରିକାର ଫେଡେରାଲ୍ ରିଜର୍ଭ ସୁଧ ହାରରେ କୌଣସି ପରିବର୍ତ୍ତନ କରିନାହିଁ ।

ଫଳରେ ଆମେରିକୀୟ ବଣ୍ଡ୍ ଗୁଡ଼ିକ ନିବେଶକଙ୍କ ପାଇଁ ଆକର୍ଷଣୀୟ ରହିବ ଏବଂ ଭାରତୀୟ ସେୟାର ବଜାରରୁ ବିଦେଶୀ ନିବେଶକ ମାନେ ଆହୁରି ଅଧିକ ସେୟାର ବିକ୍ରି କରିବାର ସମ୍ଭାବନା ରହିଛି ।

ରିପୋର୍ଟ ଅନୁସାରେ, ଯୁଦ୍ଧ ପାଇଁ ହଠାତ ଅଶୋଦ୍ଧିତ ତୈଳ ଦର ବ୍ୟାରେଲ ପିଛା ୧୧୩ ଡଲାର ହୋଇଯାଇଛି । ଅନ୍ତର୍ଜାତୀୟ ବଜାରରେ ଅଶୋଦ୍ଧିତ ତୈଳର ଦାମ୍ ଆଗକୁ ଆହୁରି ବଢିପାରେ । ତେବେ ଏହାର ସିଧାସଳଖ ଏସିଆରେ ଥିବା ବିଭିନ୍ନ ଦେଶର ସେୟାର ବଜାର ଉପରେ ପଡିଛି । ଏପରିକି ଭାରତୀୟ ସେୟାର ବଜାର ଖୋଲୁ ଖୋଲୁ କ୍ରାଶ୍ କରିଯାଇଛି ।

ବିଏସଇ ସେନସେକ୍ସ ବୁଧବାର ୭୬,୭୦୪ ଅଙ୍କରେ ବନ୍ଦ ହୋଇଥିଲା । ଗୁରୁବାର ଏହା୭୪୭୫୦ଅଙ୍କରେ ଖୋଲିଥିଲା । ଏହାର କିଛି ମିନିଟ୍ ପରେ ଏହା ୭୪,୬୮୫ ଅଙ୍କକୁ ଖସି ଆସିଥିଲା । ଏପରିକି ନିଫ୍ଟି ମଧ୍ୟ ଖସିଛି । ବୁଧବାର ନିଫ୍ଟି ୨୩,୭୭୭ରେ ବନ୍ଦ ହୋଇଥିଲା । ଗୁରୁବାର ଏହା ୨୩,୧୯୭ରେ ଖୋଲିଛି ।

ବିଦେଶୀ ବଜାରରେ ହାହାକାର
ଭାରତୀୟ ସେୟାର ବଜାର ଖସିବା ନେଇ ବିଦେଶରୁ ସଙ୍କେତ ମିଳି ସାରିଥିଲା । ଇରାନ କତାର ସ୍ଥିତ ସବୁଠୁ ବଡ ଏଲଏନଜି ପ୍ଲାଣ୍ଟକୁ ଟାର୍ଗେଟ୍ କରିବା ପରେ ଗଲଫ୍ ଦେଶରେ ଅଶୋଦ୍ଧିତ ତୈଳ ଦର ବୃଦ୍ଧି ପାଇଛି । ଭାରତ ସମେତ ଜାପାନ, ଦକ୍ଷିଣ କୋରିଆ ଭଳି ଦେଶରେ ବଜାର କ୍ରାଶ୍ କରିଯାଇଛି ।

ଏଥିସହ ପଢ଼ନ୍ତୁ:  ୫ ମିନିଟ୍‌ରେ ୧୩ ଲକ୍ଷ କୋଟି ସ୍ଵାହା; ୨୪୦୦ ପଏଣ୍ଟ ଖସିଲା Sensex