Tuition Teacher Assault / ଗୁରୁ ନାଁରେ କଳଙ୍କ; ଟ୍ୟୁସନ ବାହାନାରେ ହୋଟେଲରେ ରଖି ଛାତ୍ରଙ୍କୁ ଯୌନ ନିର୍ଯାତନା

ବରଗଡ଼: ଭଲ ପାଠ ପଢିବା ପାଇଁ ଅଭିଭାବକ ପିଲାକୁ ଟ୍ୟୁସନ ପଢାନ୍ତି । ସ୍କୁଲ ପରେ ଟ୍ୟୁସନରେ ଶିକ୍ଷକଙ୍କ ପାଖରେ ପଢନ୍ତି ପିଲା । ଏଇଠି ହିଁ ବିନା ସଙ୍କୋଚରେ ନିଜର ଡାଉଟ୍ କ୍ଲିଅର କରନ୍ତି । ହେଲେ ଏଠି ଟ୍ୟୁସନ ଶିକ୍ଷକ ଯାହା କରିଛନ୍ତି, ତାକୁ ନେଇ ଏବେ ଅଭିଭାବକ ଚିନ୍ତାରେ ପଢିଛନ୍ତି । ପାଠ ପଢାଇବା ବାହାନାରେ ଜଣେ ଦଶମ ଶ୍ରେଣୀ ଛାତ୍ରକୁ ଯୌନ ନିର୍ଯାତନା ଦେଇଛନ୍ତି ଶିକ୍ଷକ । ଗୁରୁ ଶିଷ୍ୟ କଳଙ୍କରେ ଲଗାଇଛନ୍ତି ଦାଗ । ଟ୍ୟୁସନ ପଠାଇବା ବାହାନାରେ ଛାତ୍ର ଜଣକୁ ହୋଟେଲକୁ ନେଇ ନିର୍ଯାତନା ଦେଇଥିବା ଅଭିଯୋଗ ହୋଇଛି ।

ବରଗଡ ବରଡୋଲରୁ ଆସିଛି ଏପରି ଅଭିଯୋଗ । ଛାତ୍ରଙ୍କୁ ଟ୍ୟୁସନ୍ ପଢାଇବା ବାହାନାରେ ଯୌନ ନିର୍ଯାତନା ଦିଆଯାଇଥିବା ଅଭିଯୋଗ କରିଛନ୍ତି ପରିବାର ଲୋକେ । ବରଡୋଲରେ ଥିବା ଏକ ଘରୋଇ କଲେଜର ପ୍ରିନ୍ସିପାଲ୍ ଦେବଦତ୍ତ ପ୍ରଧାନ ଏଭଳି କାଣ୍ଡ ଭିଆଇଥିବା ଅଭିଯୋଗ ଆସିଛି । ଏହାପରେ ଏବେ ପରିବାର ଲୋକେ ପୋଲିସ ନିକଟରେ ଅଭିଯୋଗ କରିଛନ୍ତି । ପୋଲିସ ଘଟଣାର ତଦନ୍ତ କରୁଛି ।

• କଣ ପୂରା ଘଟଣା ?

ଛାତ୍ରଙ୍କ ବଡ଼ବାପାଙ୍କ କହିବା ଅନୁସାରେ, ତାଙ୍କ ପୁତୁରା ଦଶମ ଶ୍ରେଣୀରେ ପାଠ ପଢେ । ସେପ୍ଟେମ୍ବର ୧୨ ତାରିଖ ଅପରାହ୍ନ ସମୟରେ ପୁଅଟି ଟ୍ୟୁସନ ପଢିବା ପାଇଁ ଘରୁ ବାହାରିଥିଲା । ହେଲେ ଅଭିଯୁକ୍ତ ଶିକ୍ଷକ ବରଗଡ଼ରେ ଅଧିକ ପାଠ ପଢିବା ସାମଗ୍ରୀ ଥିବା କହି ତାର ସତ୍ୟାନନ୍ଦ କୋଚିଂ ସେଣ୍ଟରକୁ ଆଣିଥିଲା । ଏହାପରେ ସେଠାରୁ ଆଉ ପାଠ ପଢିବା କହି ଏକ ହୋଟେଲକୁ ନେଇଥିଲା । ଏପରିକି ପରିବାର ଲୋକଙ୍କୁ ପାଠ ପଢ଼ାଇବା ପାଇଁ ରାତିରେ ରହିବାକୁ ପଡ଼ିବ ବୋଲି କହିଥିଲା । ହେଲେ ପାଠ ପଢିବା ଥିଲା ମାତ୍ର ବାହାନା । ସେଠାରେ ଅନଲାଇନରୁ ଛାତ୍ରକୁ ଅଶ୍ଳୀଳ ଭିଡିଓ ଦେଖାଇଥିଲା ।

ପଢନ୍ତୁ ଏହି ଖବର: ଶିକ୍ଷକଙ୍କ ଏ କି ନିର୍ମମତା ! କୁନି ଛାତ୍ରର ଆଖିକୁ ବିଧା ମାରିଲେ...

• କେମିତି ମୁକୁଳିଥିଲେ ଛାତ୍ର ?

ଛାତ୍ରକୁ ଯୌନ ନିର୍ଯାତନା ଦେବା ପରେ କୌଶଳକ୍ରମେ ଛାତ୍ର ଜଣଙ୍କ ପରିବାର ଲୋକଙ୍କୁ ମେସେଜ କରିଥିଲା । ଏହାପରେ ପୋଲିସ ସହାୟତାରେ ପରିବାର ଲୋକେ ଛାତ୍ରକୁ ଉଦ୍ଧାର କରିଥିଲେ । ହୋଟେଲକୁ ଯିବା ବାଟରେ ପିସିଆରର ସହଯୋଗ ମଧ୍ୟ ନେଇଥିଲେ । ଅଭିଯୁକ୍ତ ପ୍ରିନ୍ସିପାଲ୍ ବା ବିଜ୍ଞାନ ଶିକ୍ଷକ ଦେବଦତ୍ତ ପ୍ରଧାନକୁ ଗିରଫ କରି ଅଧିକ ତଦନ୍ତ କରୁଛି ଟାଉନ ଥାନା ପୋଲିସ । ଅଭିଯୁକ୍ତ ଉପରେ ଦୃଢ଼ କାର୍ଯ୍ୟନୁଷ୍ଠାନ ପାଇଁ ଦାବି କରିଛନ୍ତି ପରିବାର ଲୋକେ ।