ସ୍ୱାମୀ, ସ୍ତ୍ରୀ ବୁଲିବା କଥା ଆପଣ ଶୁଣିଥିବେ, କିନ୍ତୁ ସ୍ୱାମୀ-ସ୍ତ୍ରୀ ମିଶି ଲୁଟ୍ କରିବା କଥା ବୋଧ ହୁଏ ପ୍ରଥମ । ରାଜଧାନୀରେ କମିଶନରେଟ୍ ପୋଲିସର ନିଦ ହଜାଇ ଦେଇଥିବା ଜଣେ ଦୁର୍ଦ୍ଦାନ୍ତ ଲୁଟେରା ଓ ତାଙ୍କ ପତ୍ନୀଙ୍କୁ ଗିରଫ କରିଛି ଚନ୍ଦ୍ରଶେଖରପୁର ଥାନା ପୋଲିସ । ସିସିଟିଭିକୁ ଚକ୍‌ମା ଦେବାକୁ ଏହି ଦମ୍ପତି ଆପଣାଉଥିଲେ ଅଭିନବ କୌଶଳ । ତେବେ କିଭଳି ଧରାପଡ଼ିଲେ ଏହି ହାଇପ୍ରୋଫାଇଲ୍ ଲୁଟେରା ?

ବେକରେ ଟାଟୁ ଆଉ ମୁହଁ ତଳକୁ କରି ଛିଡ଼ା ହୋଇଥିବା ଏହି ଯୁବକ ଜଣକ ହେଉଛନ୍ତି ଦୁର୍ଦ୍ଦାନ୍ତ ଲୁଟେରା ରାକେଶ ରାଉତ। ଦୀର୍ଘ ଦିନ ଧରି ଭୁବନେଶ୍ୱରର ଚନ୍ଦ୍ରଶେଖରପୁର ଅଞ୍ଚଳରେ ଆଖିପିଛୁଳାକେ ସୁନା ଚେନ୍ ଓ ମୋବାଇଲ୍ ଲୁଟ୍ କରି ପୋଲିସର ବିପି ବଢ଼ାଇ ଦେଇଥିଲେ ରାକେଶ। ଆଉ ତାଙ୍କୁ ଏହି ଅପରାଧରେ ସହଯୋଗ କରୁଥିଲେ ତାଙ୍କ ପତ୍ନୀ। ସ୍ୱାମୀ ଲୁଟ୍ କରୁଥିବା ବେଳେ ସ୍ତ୍ରୀ ସାଜୁଥିଲେ ସହଯୋଗୀ ।

ଲୁଟ୍ କରିବା ପାଇଁ ରାକେଶ ଏକ ଦାମୀ ‘ସ୍ପିଡ୍ ବାଇକ୍’ କିଣିଥିଲେ । ଏହି ଦମ୍ପତି ପ୍ରତିଦିନ ଲୁଟ୍ ଉଦ୍ଦେଶ୍ୟରେ ଘରୁ ବାହାରିବା ବେଳେ ବ୍ୟାଗ୍‌ରେ ୨-୩ ସେଟ୍ ପୋଷାକ ଓ ଶାଢ଼ୀ ନେଇ ଯାଉଥିଲେ । ରାସ୍ତାରେ ଏକୁଟିଆ ମହିଳାଙ୍କୁ ଟାର୍ଗେଟ୍ କରିବା ପରେ ରାକେଶ ଚେନ୍ ଝାମ୍ପି ନେଉଥିଲେ । ଗତ ୨୫ ତାରିଖରେ ଜଣେ ଶିକ୍ଷୟିତ୍ରୀଙ୍କୁ ଲୁଟ୍ କରିବା ପରେ ପୋଲିସ ନିକଟରେ ଅଭିଯୋଗ ହୋଇଥିଲା ।

ପୋଲିସ ସିସିଟିଭି ଓ ବାଇକ୍ ନମ୍ବରକୁ ଟ୍ରାକ୍ କରି ଜାଣିବାକୁ ପାଇଥିଲା ଯେ ଏହି ଦମ୍ପତି ପୁରୀରେ ଅଛନ୍ତି । କିନ୍ତୁ ପରେ ସେମାନଙ୍କ ଲୋକେସନ୍ ନୟାପଲ୍ଲୀ ଦେଖାଇବା ପରେ ପୋଲିସ ଏକ ପଡ଼ିଆରେ ଚଢ଼ାଉ କରି ଉଭୟଙ୍କୁ ମାଡ଼ି ବସିଥିଲା । ସେଠାରେ ସେମାନେ କାର୍ ଭିତରେ ମଦ ପିଉଥିବା ସମୟରେ ଗିରଫ ହୋଇଥିଲେ । ସେମାନଙ୍କ ଠାରୁ ଗୋଟିଏ କାର୍, ବାଇକ୍ ଏବଂ ୮ଟି ସୁନା ଚେନ୍ ଜବତ ହୋଇଛି । ଏଥିସହ ଲୁଟ୍ ସୁନା କିଣୁଥିବା ଜଣେ ସୁନା ଦୋକାନୀଙ୍କୁ ମଧ୍ୟ ପୋଲିସ ଜେଲ୍ ପଠାଇଛି ।

ଜବତ ହୋଇଥିବା ସମସ୍ତ ଅଳଙ୍କାରକୁ ପୋଲିସ ଲୁଟ୍‌ର ଶିକାର ହୋଇଥିବା ମହିଳାମାନଙ୍କୁ ଫେରସ୍ତ କରିଛି । ରାଜଧାନୀରେ ଏହି ଲୁଟେରା ଦମ୍ପତିଙ୍କ ଗିରଫଦାରୀ ପରେ ସାଧାରଣ ଲୋକେ ଆଶ୍ୱସ୍ତି ପ୍ରକାଶ କରିଛନ୍ତି ।