Bhubaneswar Gang Violence / ଭୁବନେଶ୍ୱରରେ ବଢୁଛି 'ଭାଇଗିରି', ଦେଢ଼ ମାସରେ ହେଲାଣି ୨୫ରୁ ଅଧିକ ରକ୍ତାକ୍ତ ସଂଘର୍ଷ

ରାଜଧାନୀରେ ଅପରାଧୀଙ୍କ ଆତଙ୍କରାଜ । ସାମାନ୍ୟ ବଚସାରୁ ନେଇ ପ୍ରେମ ବ୍ୟାପାର । ସବୁଠି ଚାଲିଛି ମାରଣାସ୍ତ୍ରର ଖେଳ । ଗତକାଲି ବିଳମ୍ୱିତ ରାତିରେ ଓଲ୍ଡ ଟାଉନରେ ପୁଣି ବୁଲିଛି ତେଲେଙ୍ଗା କଟୁରୀ । ତେବେ ପ୍ରଶ୍ନ ଉଠୁଛି ଅପରାଧର ପେଣ୍ଠସ୍ଥଳୀ ସାଜୁଛି କି ଭୁବନେଶ୍ୱର ?

ରାଜଧାନୀ ଭୁବନେଶ୍ୱରରେ ପୁଣି ହଣାକଟା । ବିଳମ୍ୱିତ ରାତିରେ ବୁଲିଲା ତେଲେଙ୍ଗା କଟୁରୀ । ଦୋକାନ ବନ୍ଦ୍ କରି ଘରକୁ ଫେରୁଥିବା ବେଳେ ଦୋକାନୀଙ୍କୁ ଆକ୍ରମଣ କଲେ ଦୃର୍ବୁତ୍ତ । ଆହତ ଯୁବକ ହେଲେ ଉଦୟ କିରଣ । ରାମୁଲୁ ନାମକ ଯୁବକ ହାଣିଥିବା ଅଭିଯୋଗ ହୋଇଛି ।

ମୁଣ୍ଡ ଟେକୁଛି ଲୋକାଲ ଗ୍ୟାଙ୍ଗ୍ । କଥା କଥାରେ ଖଣ୍ଡା, କାତି, ଭୁଜାଲି ବୁଲାଇ ନିଜ ଦବ୍‌ଦବା ଜାହିର କରିବା ସହ କମିଶନରେଟ ପୋଲିସକୁ ଚ୍ୟାଲେଞ୍ଜ କରୁଛନ୍ତି ଅସାମାଜିକ ଯୁବକ । କେଉଁଠି ଲୁଟ୍ ପାଇଁ ତ କେଉଁଠି ଜମି, ପ୍ରେମ କିମ୍ବା ପୂର୍ବ ଶତ୍ରୁତା, ପୁଣି କେଉଁଠି ସାମାନ୍ୟ ବଚସାକୁ କେନ୍ଦ୍ର କରି ଆତଙ୍କ ଖେଳାଉଛନ୍ତି ଅପରାଧୀ । ବହୁ ଘଟଣାରେ ଜେଲ୍‌ ଫେରନ୍ତାଙ୍କ ସମ୍ପୃକ୍ତି ମଧ୍ୟ ସାମ୍ନାକୁ ଆସୁଛି । ଗତ ଦେଢ ମାସରେ ରାଜଧାନୀରେ ୨୫ରୁ ଅଧିକ ରକ୍ତାକ୍ତ ସଂଘର୍ଷ ଘଟିଥିବାରୁ ପୋଲିସ ପ୍ରତି ସହରବାସୀଙ୍କ ଭରସା ତୁଟିବାରେ ଲାଗିଛି ।

• ଜୁଲାଇ ୪ ବୁଦ୍ଧ ବିହାରରେ ପ୍ରେମ ବ୍ୟାପାରକୁ କେନ୍ଦ୍ର କରି ଖଣ୍ଡାଖାଇ ଆତଙ୍କରାଜ ଘଟଣାରେ ୧୦ ଜଣ ଗିରଫ

• ଜୁଲାଇ ୫ ସିଆରପି ଛକରେ ମହିଳା ଟ୍ରାଫିକ ପୋଲିସକୁ ଦୁର୍ବ୍ୟବହାର ଓ ଖଣ୍ଡା ଧମକ ଘଟଣାରେ ୨ ଜଣ ଗିରଫ ହୋଇଛନ୍ତି

• ଜୁନ୍ ୬ ମୂଳା ପଡ଼ିଆ ରାସ୍ତାରେ ଟଙ୍କା ନେଣଦେଣକୁ କେନ୍ଦ୍ର କରି ମରଣାନ୍ତକ ଆକ୍ରମଣ ଘଟଣାରେ ୨ ନାବାଳକ ଓ ୨ ଅଭିଯୁକ୍ତ କୋର୍ଟ ଚାଲାଣ

• ଜୁନ୍ ୨୩ ୟୁନିଟ-୩ ଶ୍ରୀୟା ଛକରେ ଗୁପଚୁପ୍ ଦୋକାନୀଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ ଘଟଣାରେ ଜଣେ ଗିରଫ, ମାରଣାସ୍ତ୍ର ଜବତ

• ଜୁନ୍ ୧୩ କେଳାସାହି ବସ୍ତି ମାତ୍ର ୨୫୦ ଟଙ୍କା ଧାରକୁ ନେଇ ଘରେ ଆକ୍ରମଣ ଘଟଣାରେ ଅଭିଯୁକ୍ତ ଗିରଫ

ଏଭଳି ରାଜଧାନୀରେ ଅପରାଧ ନିତିଦିନିଆ ହୋଇଯାଇଥିବାରୁ ସହରବାସୀ ଏବେ ନିଜକୁ ଅସୁରକ୍ଷିତ ମଣୁଛନ୍ତି । ଜେଲ ଫେରନ୍ତାଙ୍କ ଉପରେ କଡ଼ା ନଜର ରଖିବାକୁ ଦାବି ହୋଇଛି । ସେପଟେ ନୂତନ ଆଇନ ଭାରତୀୟ ନ୍ୟାୟ ସଂହିତା ବା BNS ର ଧାରା ୧୨୯ ଅଧୀନରେ ଅଧିକରୁ ଅଧିକ ବୁକ୍ କରିବାକୁ ଆଇନଜୀବୀ କହିଛନ୍ତି ।
ରାଜଧାନୀରେ ଅପରାଧୀଙ୍କ ଆତଙ୍କରାଜ ଦିନକୁ ଦିନ ବଢ଼ିବାରେ ଲାଗୁଛି । ପୋଲିସର କଡ଼ା ପ୍ରହରା ସତ୍ତ୍ବେ ବଢୁଛି ଅପରାଧ । ଅପରାଧର ପେଣ୍ଠସ୍ଥଳୀ ସାଜୁଛି କି ଭୁବନେଶ୍ୱର ?