Argus News - ରାଜଧାନୀରେ ବିଭତ୍ସ ହତ୍ୟାକାଣ୍ଡ, ସ୍ତ୍ରୀର ରକ୍ତରେ ହୋଲି ଖେଳିଲା ସୈତାନ ସ୍ୱାମୀ

ପୁଣି ରକ୍ତ ରଞ୍ଜିତ ହେଲା ରାଜଧାନୀ । ଭୁବନେଶ୍ୱର ଏୟାରଫିଲ୍ଡ ଥାନା ଅଞ୍ଚଳରେ ଘଟିଛି ଏକ ଚାଞ୍ଚଲ୍ୟକର ହତ୍ୟାକାଣ୍ଡ । ସାମାନ୍ୟ କଳି ଝଗଡ଼ାରୁ ଜଣେ ଅବସରପ୍ରାପ୍ତ ସରକାରୀ ଅଧିକାରୀ ନିଜ ଧର୍ମପତ୍ନୀଙ୍କୁ ପରିବା କଟା ଛୁରୀରେ ତଣ୍ଟି କାଟି ଅତି ନିର୍ମମ ଭାବେ ହତ୍ୟା କରିଛନ୍ତି । ହତ୍ୟା ପରେ ସ୍ୱାମୀ ନିଜେ ଥାନାରେ ଆତ୍ମସମର୍ପଣ କରିଛନ୍ତି । କାହିଁକି ଜଣେ ଶିକ୍ଷିତ ବ୍ୟକ୍ତି ପାଲଟିଗଲେ ଜଲ୍ଲାଦ ? ମାନସିକ ଚାପ ନା ରହିଛି ଅନ୍ୟ କିଛି ରହସ୍ୟ ?

ଘର ସାରା ପଡ଼ିଛି ରକ୍ତର ଛିଟା । ଚାରିଆଡ଼େ ବିଛାଡ଼ି ହୋଇ ପଡ଼ିଛି ସ୍ମୃତିର ସାମଗ୍ରୀ । ଏହି ଘରେ ହସ ଖୁସିରେ ରହୁଥିଲେ ଅବସରପ୍ରାପ୍ତ ଅଧିକାରୀ ଦେବରାଜ ଷଡ଼ଙ୍ଗୀ ଓ ତାଙ୍କ ପତ୍ନୀ ପ୍ରିୟମ୍ବଦା । କିନ୍ତୁ କେହି ଜାଣି ନଥିଲେ ଯେଉଁ ହାତ ସାଥୀ ହୋଇ ଚାଲିବାର ପ୍ରତିଶ୍ରୁତି ଦେଇଥିଲା, ସେଇ ହାତ ଦିନେ ଛୁରୀ ଧରିବ । ପରିବା କଟା ଛୁରୀରେ ଦେବରାଜ ନିଜ ସ୍ତ୍ରୀର ତଣ୍ଟି କାଟି ରକ୍ତର ହୋଲି ଖେଳିଛନ୍ତି ।

ଦୁଇ ବର୍ଷ ତଳେ ଦେବରାଜ ଚାକିରିରୁ ଅବସର ନେଇଥିଲେ । ଏକମାତ୍ର ଝିଅର ବାହାଘର ସରିଥିଲା । ସ୍ବସ୍ତିନଗର ଅଞ୍ଚଳରେ ରହୁଥିଲେ ସ୍ବାମୀ-ସ୍ତ୍ରୀ । ତେବେ ଦେବରାଜ ଦୀର୍ଘ ଦିନ ହେବ ମାନସିକ ଚାପରେ ରହୁଥିଲେ । ବିଭିନ୍ନ ରୋଗରେ ଦେହ ଅସୁସ୍ଥ ଥିବା କାରଣରୁ ଦେବରାଜଙ୍କ ମାନସିକ ସ୍ଥିତି ଭଲ ନଥିବା କହିଛନ୍ତି ଝିଅ ।

ଘଟଣା ପରେ ଅଭିଯୁକ୍ତ ସ୍ୱାମୀ ଦେବରାଜ ନିଜେ ଥାନାରେ ପହଞ୍ଚି ନିଜ ପାପ ସ୍ୱୀକାର କରିଛନ୍ତି । ସାଇଣ୍ଟିଫିକ୍ ଟିମ୍ ଘଟଣାସ୍ଥଳରୁ ରକ୍ତ ଭିଜା ଛୁରୀ ଓ ରକ୍ତ ନମୁନା ସଂଗ୍ରହ କରିଛି । ପୋଲିସ ମୃତଦେହକୁ ଜବତ କରି କ୍ୟାପିଟାଲ ହସ୍ପିଟାଲକୁ ବ୍ୟବଚ୍ଛେଦ ପାଇଁ ପଠାଇଛି । ତେବେ ପ୍ରଶ୍ନ ଉଠୁଛି, କେବଳ ମାନସିକ ବିକୃତି ପାଇଁ ଏତେ ବଡ଼ କାଣ୍ଡ ଘଟିଲା ନା ଏହା ପଛରେ ରହିଛି କିଛି ପାରିବାରିକ ଶତ୍ରୁତା ?