ଭୁବନେଶ୍ଵର: ରାଜଧାନୀରେ ସେକ୍ସ ରାକେଟର ନୂଆ ତରିକା । ଚାକିରି ଦେବା ନାଁରେ ଡାକୁଛନ୍ତି ଦଲାଲ, ଦେହ ବ୍ୟବସାୟରେ ଲଗାଉଛନ୍ତି । ୟୁନିଟ-୪ରେ ଥିବା ଏକ ହୋଟେଲରୁ ପୋଲିସ ନାବାଳିକାଙ୍କୁ ଉଦ୍ଧାର କରିବା ପରେ ଏ ଘଟଣା ସାମ୍ନାକୁ ଆସିଛି । ହୋଟେଲର ସିସିଟିଭି ଫୁଟେଜ ଯାଞ୍ଚ ସହ ଦଲାଲକୁ ବାନ୍ଧି କୋର୍ଟ ଚାଲାଣ କରିଛି ଖାରବେଳ ନଗର ଥାନା ପୋଲିସ ।

ଜବ୍ ଅଫର୍ ନାଁରେ ନାବାଳିକାଙ୍କୁ ଫସାଉଛନ୍ତି ଦଲାଲ । ଇଣ୍ଟରଭ୍ୟୁ ନାଁରେ ପ୍ରଥମେ ହୋଟେଲ ରୁମକୁ ଡାକୁଛନ୍ତି । ଆଉ ଡରାଇ ଧମକାଇ ଜୋର ଜବରଦସ୍ତ ଦେହ ବ୍ୟବସାୟ ପାଇଁ ବାଧ୍ୟ କରାଉଛନ୍ତି । ସେକ୍ସ ରାକେଟ ଦଲାଲଙ୍କ କାରନାମାର ପର୍ଦ୍ଦାଫାସ୍ କରିଛି କମିଶନରେଟ ପୋଲିସ ।

ଏଥିସହ ପଢ଼ନ୍ତୁ: କଲେଜ ଲ୍ୟାବ୍‌ରୁ ରୁମ୍‌ ନମ୍ବର ୧୩କୁ ଆସୁଥିଲା ବିସ୍ଫୋରକ !

ଭୁବନେଶ୍ୱର ଖାରବେଳନଗର ଅଞ୍ଚଳରୁ ପୁଣି ଜଣେ ନାବାଳିକା ଉଦ୍ଧାର ପରେ ପୋଲିସ ସକ୍ରିୟ ହୋଇଛି । ନାବାଳିକାଙ୍କୁ ଏକ ହୋଟେଲକୁ ଡାକି ଦେହ ବ୍ୟବସାୟରେ ନିୟୋଜିତ କରିବାକୁ ଦଲାଲ ଯୋଜନା କରିଥିଲା । ଜଣେ ଗ୍ରାହକ ବି ହୋଟେଲ ରୁମକୁ ଆସି ନାବାଳିକାଙ୍କୁ ଅସଦାଚରଣ କରିଥିଲା । ନାବାଳିକା ଜଣଙ୍କ ନିଜର ସାଙ୍ଗକୁ ଜଣାଇବା ପରେ ପୋଲିସ ହୋଟେଲରେ ଅତର୍କିତ ଚଢ଼ାଉ କରି ନାବାଳିକାଙ୍କୁ ଉଦ୍ଧାର କରିଛି ।

ଉଦ୍ଧାର ନାବାଳିକାଙ୍କ ଘର ଢେଙ୍କାନାଳ କଙ୍କଡାହାଡ଼ ଅଞ୍ଚଳରେ । ୭ରୁ ୮ମାସ ହେବ କଟକରେ ଚାକିରି କରୁଥିଲେ । ସେଠାରୁ ଆସି ବରମୁଣ୍ଡାରେ ଅଞ୍ଚଳରେ ରହୁଥିବା ସମ୍ପର୍କୀୟ ଦାଦା ଘରେ ରହି ଚାକିରି ଖୋଜୁଥିଲେ । ୟୁନିଟ୍‌-୩ ମସଜିଦ୍‌ କଲୋନିର ମହେନ୍ଦ୍ର ପାତ୍ରଙ୍କ ସହ ପରିଚିତ ହୋଇଥିଲେ । ପରେ ନାବାଳିକାଙ୍କୁ ଚାକିରିର ପ୍ରତିଶ୍ରୁତି ଦେଇଥିଲେ ମହେନ୍ଦ୍ର ।

ଏଥିସହ ପଢ଼ନ୍ତୁ: ଟ୍ରାଫିକ ସମସ୍ୟା ଦୂର ପାଇଁ ଭୁବନେଶ୍ଵରରେ ୨୦ଟି ନୂଆ ରାସ୍ତା ନିର୍ମାଣ ପାଇଁ ଯୋଜନା

ବୁଧବାର ନାବାଳିକାଙ୍କୁ ଆଣି ୟୁନିଟ୍‌-୪ ଅଞ୍ଚଳରେ ଥିବା ଏକ ହୋଟେଲ୍‌ରେ ରଖିଥିଲା ଦଲାଲ । ରାତି ପ୍ରାୟ ୯ଟା ସମୟରେ ମହେନ୍ଦ୍ର ଜଣେ ବ୍ୟକ୍ତିଙ୍କୁ ହୋଟେଲ୍‌କୁ ଆଣିଥିଲା । ଉକ୍ତ ବ୍ୟକ୍ତି ସହ ଅନୈତିକ ସମ୍ପର୍କ ରଖିବାକୁ ନାବାଳିକାଙ୍କୁ ଚାପ ପକାଇଥିଲା । ଏହି ସମୟରେ ପୋଲିସ ରେଡ୍ କରି ନାବାଳିକାଙ୍କୁ ଉଦ୍ଧାର କରିବା ସହ ଦଲାଲ ମହେନ୍ଦ୍ରକୁ ନେଇ ଖୋଳତାଡ଼ ଆରମ୍ଭ କରିଛି ।

ଦୀପାବଳି ସମୟରେ ଲକ୍ଷ୍ମୀ ସାଗର ଅଞ୍ଚଳରୁ ସେକ୍ସ ରାକେଟ ଧରାପଡ଼ିବା ରାଜଧାନୀରେ ଚାଞ୍ଚଲ୍ୟ ସୃଷ୍ଟି କରିଥିଲା । କିଛି ଦିନ ପରେ ପୁଣି ରାଜଧାନୀର ୟୁନିଟ-୩ ଅଞ୍ଚଳରୁ ଏଭଳି ଘଟଣା କମିଶନରେଟ ପୋଲିସର ଚିନ୍ତା ବଢ଼ାଇଛି ।