ଭୁବନେଶ୍ଵର: ଭିଡ଼ରୁ ମିଳିବ ମୁକ୍ତି । ଆଉ ଟ୍ରାଫିକ୍‌ରେ ଛିଡ଼ା ହେବାକୁ ପଡ଼ିବନି । ଟ୍ରାଫିକ୍ ସମସ୍ୟା ଦୂର କରିବା ପାଇଁ ରାଜଧାନୀ ଭୁବନେଶ୍ଵରରେ ନିର୍ମାଣ ହେବ ନୂଆ କରି ୧୮ରୁ ୨୦ଟି ରାସ୍ତା । ଏନେଇ ସୂଚନା ଦେଇଛନ୍ତି ପୂର୍ତ୍ତ ବିଭାଗ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ ।

ପୂର୍ତ୍ତ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ କହିଛନ୍ତି, "ରାସ୍ତା ମରାମତି ପଲିସି ପ୍ରସ୍ତୁତ କରାଯାଇଛି । ଭୁବନେଶ୍ଵରର ବର୍ଦ୍ଧିତ ଟ୍ରାଫିକ୍ ଦୃଷ୍ଟିରୁ ନିଆଯାଇଥିବା ପ୍ରକଳ୍ପର ସମୀକ୍ଷା କରାଯାଇଛି । କେଉଁ ପ୍ରକଳ୍ପ କେଉଁଠି ଅଟକିଛି ସେନେଇ ଆଲୋଚନା ହୋଇଛି । ପ୍ରକଳ୍ପ ଶୀଘ୍ର ସାରିବାକୁ ନିଷ୍ପତ୍ତି ନିଆଯାଇଛି ।"

ଏଥିସହ ପଢ଼ନ୍ତୁ: ବରଗଡ଼ରୁ ଆରମ୍ଭ ହେବ ଖରିଫ ଧାନ କିଣା, ୨୦ ହଜାର ୫୦୦ କୋଟି କୃଷି ଋଣ ନେଇଛନ୍ତି ଚାଷୀ

ମନ୍ତ୍ରୀ କହିଛନ୍ତି, "ଭିଡ଼କୁ ଲକ୍ଷ୍ୟରେ ରଖି ଜୟଦେବ ବିହାର-ନନ୍ଦନକାନନରୁ ଆରମ୍ଭ କରି ଦୁଇ ପାର୍ଶ୍ଵ ରାସ୍ତା ସହ କଟକୁ ଯୋଡ଼ୁଥିବା ରାସ୍ତା, ଏମ୍ସକୁ ଯୋଡ଼ୁଥିବା ଖଣ୍ଡଗିରି-ଜାଗମରା ରାସ୍ତାରେ ଏଲିଭିଟେଡ୍ କରିଡର କରାଯିବ । କଳ୍ପନାରେ ହେବ ଏଲିଭିଟେଡ୍ କରିଡର । ଭୁବନେଶ୍ଵରରେ ୧୮ରୁ ୨୦ଟି ନୂଆ ରାସ୍ତା ନିର୍ମାଣ କରାଯିବ ।"

ଭୁବନେଶ୍ଵର ଏଜି ଛକରୁ ହଟିବ ଟ୍ରାଫିକ୍ ପୋଷ୍ଟ । ତିଆରି ହେବ ୨ ଥାକିଆ ରାସ୍ତା । ମାଟି ତଳେ ଓ ମାଟି ଉପରେ ଦୁଇ ଥାକିଅ ରାସ୍ତା ନିର୍ମାଣ କରାଯିବ ବୋଲି କହିଛନ୍ତି ପୂର୍ତ୍ତ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ । ଏଲିଭେଟେଡ୍ କରିଡର୍ ପାଇଁ ଯୋଜନା କରିଛି ପୂର୍ତ୍ତ ବିଭାଗ । ଏନେଇ ପ୍ରାରମ୍ଭିକ ଡିପିଆର୍ ପ୍ରସ୍ତୁତ ହୋଇଥିବା ବେଳେ ସମୀକ୍ଷା କରିଛନ୍ତି ପୂର୍ତ୍ତ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ । ପୁରୀର ବିଭିନ୍ନ ରାସ୍ତା ସହ ଅନ୍ୟ ପ୍ରକଳ୍ପ କାର୍ଯ୍ୟ ତ୍ଵରାନ୍ଵିତ ପାଇଁ ଆଲୋଚନା କରାଯାଇଛି ।

ଏଥିସହ ପଢ଼ନ୍ତୁ: କାଲି ଆସିବ ନୂଆପଡ଼ା ଉପନିର୍ବାଚନ ଜନାଦେଶ; ସକାଳ ୮ରୁ ୧୪ଟି ଟେବୁଲ୍‌ରେ ଭୋଟ୍ ଗଣତି

ପୂର୍ତ୍ତ ବିଭାଗର ସମସ୍ତ କାର୍ଯ୍ୟ ପେପରଲେସ୍ ହେବ । ଏଥିପାଇଁ ପ୍ରକ୍ରିୟା ଆରମ୍ଭ ହୋଇଥିବା କହିଛନ୍ତି ପୂର୍ତ୍ତ ମନ୍ତ୍ରୀ । କାଗଜପତ୍ରରେ ଆଉ କାମ ହେବ ନାହିଁ । ଏଥିପାଇଁ ଓଡ଼ିଶା ବ୍ରିଜ୍ କନଷ୍ଟ୍ରକ୍ସନ୍ କର୍ପୋରେସନ୍‌ର ସମସ୍ତ କାର୍ଯ୍ୟ ଅନଲାଇନ୍ ମାଧ୍ୟମରେ ହେବ । କୌଣସି କାଗଜ ଫାଇଲ୍ ବ୍ୟବହାର କରାଯିବ ନାହିଁ । ନିଷ୍ପତ୍ତି ହୋଇଛି, ଡିସେମ୍ବର ୩୧ ସୁଦ୍ଧା ସମସ୍ତ ଡିଭିଜନ ପର୍ଯ୍ୟନ୍ତ ଯାହା ବି ଫାଇଲ୍ ଯିବ ଅନଲାଇନ୍ କରାଯିବ ।