ବ୍ରହ୍ମପୁର: ଦୁଇ ଜଣ ଅଭ୍ୟାସଗତ ଅପରାଧୀଙ୍କୁ ଗିରଫ କରିବାରେ ସଫଳ ହୋଇଛି ବ୍ରହ୍ମପୁର ଟାଉନ୍ ଥାନା ପୋଲିସ । ଗାନ୍ଧୀନଗରରୁ ଏକ ଚୋରି ମାମଲାରେ ପୋଲିସ ଶମ୍ଭୁ ମୂଳି ଏବଂ ସାଗର ମୂଳି ଦୁଇ ଭାଇଙ୍କୁ ଗଣେଶ ନଗରରୁ ଗିରଫ କରିଛି ।

ଉଭୟ ଗତ ୧୯ ତାରିଖରେ ଗାନ୍ଧୀନଗରର ବଳରାମ ପଣ୍ଡାଙ୍କ ଘରୁ ଚୋରି କରିଥିଲେ । ଏକ ଲକ୍ଷ ନଗଦ ଟଙ୍କା ସହ ମୋବାଇଲ୍ ଫୋନ୍‍, ଶାଢ଼ୀ ଚୋରି କରି ନେଇଥିଲେ । ଆଉ ଚୋରି ଲକ୍ଷେ ଟଙ୍କାକୁ ଦୁହେଁ ଦୁହିଁଙ୍କ ମଧ୍ୟରେ ବାଣ୍ଟି ଦେଇ ମଦ ପିଇବା ସହ ବ୍ରାଉନ୍ ସୁଗାର ଖାଇଥିଲେ ।

ଏଥିସହ ପଢ଼ନ୍ତୁ: ସାଟେଲାଇଟ୍ ସର୍ଭେରୁ ଧରାପଡ଼ୁଛି ସତ; ରାସ୍ତା ଓ ନଦୀକୁ ଜମି ଦର୍ଶାଇ କରିଛନ୍ତି ପଞ୍ଜୀକରଣ

ଚୋରି ନେଇ ଅଭିଯୋଗ ପରେ ବ୍ରହ୍ମପୁର ଟାଉନ୍ ଥାନା ପୋଲିସ ଛାନଭିନ୍ ଆରମ୍ଭ କରିଥିଲା । ସିସିଟିଭି ଫୁଟେଜ୍ ଆଧାରରେ ପୋଲିସ ଶମ୍ଭୁ ଓ ସାଗରଙ୍କ ଠିକଣା ପାଇବା ପରେ ନଜର ରଖିଥିଲା । ମଙ୍ଗଳବାର ଉଭୟ ଘରେ ଥିବା ବେଳେ ପୋଲିସ ଦୁଇ ଭାଇଙ୍କୁ ଗିରଫ କରିଛି ।

ଗିରଫ ଦୁଇ ଭାଇଙ୍କ ଠାରୁ ପୋଲିସ ୨୦ ହଜାର ୫୦୦ ଟଙ୍କା ସହ ଲୁଟ୍‌ରେ ବ୍ୟବହୃତ ରଡ୍ ଏବଂ ଲୁଟ୍ କରିଥିବା ବ୍ୟାଗ ଓ ଅନ୍ୟ ସାମଗ୍ରୀ ଜବତ କରିଛି । ଦୁଇ ଜଣଙ୍କୁ ପୋଲିସ କୋର୍ଟ ଚାଲାଣ କରିଛି ।

ଏଥିସହ ପଢ଼ନ୍ତୁ: ଅଜିତ ପାୱାରଙ୍କ ମୃତ୍ୟୁ ଖବର ମାଆ ଜାଣିବେନି ବୋଲି କାଟିଦେଲେ TV କେବୁଲ୍; ମୋବାଇଲ୍ କରିଦେଲେ ଫ୍ଲାଇଟ୍ ମୋଡ୍

ଗିରଫ ଶମ୍ଭୁ ନାଁରେ ଚୋରି, ସଂଘବଦ୍ଧ ଅପରାଧ ଭଳି ୩୩ଟି ମାମଲା ରହିଛି । ବ୍ରହ୍ମପୁରେ ୨୦୧୮ରୁ ବିଭିନ୍ନ ଅପରାଧରେ ସକ୍ରିୟ ରହିଛି ଶମ୍ଭୁ । ସେହିଭଳି ସାଗର ମଧ୍ୟ ଅସଦାଚରଣ, ନିଶା ଦ୍ରବ୍ୟ ଚାଲାଣ ସହ ଚୋରି ଭଳି ୩୮ଟି ମାମଲାରେ ସମ୍ପୃକ୍ତ ।