ଗୁଣ୍ଡା ମାଫିଆଙ୍କ ପରେ ଏବେ ଚୋର ତସ୍କରଙ୍କୁ ସାବାଡ କରିବା ପାଇଁ କମିଶନରେଟ ପୋଲିସ ଆପଣାଇଛି ‘ବୁଲଡୋଜର ଅସ୍ତ୍ର’। ଆଉ ପୋଲିସର ଏହି ବୁଲଡୋଜର ଆକ୍ସନ ଦେଖି ଭୟରେ ଥାନାରେ ଆତ୍ମସର୍ମପଣ କରିଛନ୍ତି ଫେରାର୍ ଅଭିଯୁକ୍ତ ।

କମିଶନରେଟ ପୋଲିସର ଜବରଦସ୍ତ ଆକ୍ସନରେ ଅପରାଧୀଙ୍କ ରିଆକ୍ସନ । ବୁଲଡୋଜର ଚଢିବା ପରେ ଦୀର୍ଘ ଦିନ ଧରି ପୋଲିସ ଆଖିରେ ଧୂଳି ଦେଇ ଫେରାର ଥିବା ଦୁର୍ଦ୍ଦାନ୍ତ ଅଭିଯୁକ୍ତ ଶେଷରେ ଥାନାରେ ଆତ୍ମସମର୍ପଣ କରିଛି । ସେକ୍ ହମିଦ ଓ ସେକ୍ ରମଜାନ। ଯେଉଁମାନଙ୍କ ଟେର ପାଉନଥିଲା ପୋଲିସ । ଏମାନଙ୍କ କାରନାମା ଶୁଣିଲେ ଆପଣ ବି ଆଶ୍ଚର୍ଯ୍ୟ ହେବେ । ରାଜଧାନୀର ସ୍ମାର୍ଟ ସିଟିରେ ଲାଗିଥିବା ସ୍ମାର୍ଟ ଲାଇଟ୍ ସବୁକୁ ଖୋଲି ଚୋରାରେ ବିକ୍ରି କରୁଥିଲା ଏହି ଗ୍ୟାଙ୍ଗ । ଜନପଥରୁ ବାଣୀ ବିହାର ସବୁଠି ଲାଗିଥିବା ଲକ୍ଷାଧିକ ଟଙ୍କାର ଇଲେକ୍ଟ୍ରିପୋଲ୍ ଚୋରି ଘଟଣାର ମାଷ୍ଟରମାଇଣ୍ଡ ଥିଲେ ଏମାନେ । ଚୋରି କରିବା ପରେ ଶ୍ରୀୟା ଛକ ନିକଟରେ ଥିବା ସେକ୍ ରମଜାନର କବାଡ଼ିଆ ଦୋକାନରେ ଏସବୁକୁ ଖଣ୍ଡ ଖଣ୍ଡ କରି କାଟି ବିକ୍ରି କରାଯାଉଥିଲା ।

ପୂର୍ବରୁ ଏହି ବଡ଼ ଚୋରି ଘଟଣାରେ ଖାରବେଳ ନଗର ଥାନା ପୋଲିସ ଛାନଭିନ୍ କରି ସେକ ଯାଇବୁରକୁ ଗିରଫ କରିଥିଲା । ହେଲେ ସେକ୍ ହମିଦ ଓ ସେକ୍ ରମଜାନ୍ ଫେରାର୍ ହୋଇଯାଇଥିଲେ । ଆଜି ସେମାନଙ୍କ ଆଡ୍ଡା, ଦୋକାନ ଆଉ ବସ୍ତିରେ ଥିବା ଘର ଉପରେ ଯେତେବେଳେ ପୋଲିସ ବୁଲଡୋଜର ଚଢାଇଲା, ସେତେବେଳେ ଭୟରେ ଥାନାକୁ ଦୌଡ଼ି ଆସି ନିଜେ ଧରାଦେଲେ ଫେରାର୍ ଅଭିଯୁକ୍ତ । ଅପରାଧୀଙ୍କ ବିରୋଧରେ ପୋଲିସର ଏହି କଡ଼ା ଆକ୍ସନକୁ ଜୋରଦାର ସମର୍ଥିନ କରିଛନ୍ତି ବସ୍ତି ବାସିନ୍ଦା ।

କମିଶନରେଟ ପୋଲିସର ଏହି ବୁଲଡୋଜର ଷ୍ଟ୍ରାଟେଜି ଏବେ ଅପରାଧୀଙ୍କ ଭିତରେ ଛନକା ପଶାଇ ଦେଇଛି । ଯେଉଁ ଅଭିଯୁକ୍ତଙ୍କୁ ଖୋଜିବାକୁ ପୋଲିସକୁ ନାକେଦମ ହେବାକୁ ପଡ଼ୁଥିଲା, ବୁଲଡୋଜର ଗର୍ଜନ ଶୁଣି ସେମାନେ ଏବେ ନିଜେ ଆସି ଥାନାରେ ଆତ୍ମସମର୍ପଣ କରୁଛନ୍ତି ।