Bhubaneswar Crime / ରାଜଧାନୀରେ କ୍ରାଇମକୁ ରୋକିବାକୁ ପୋଲିସର ନୂଆ ପଦକ୍ଷେପ, ଗାଡ଼ି ବଦଳରେ ବସ୍ତିରେ ହେବ ଫୁଟ୍ ପାଟ୍ରୋଲିଂ

କ୍ରାଇମ୍ କଣ୍ଟ୍ରୋଲ ପାଇଁ ପୋଲିସର ନୂଆ ଫଣ୍ଡା I ଗାଡ଼ିରେ ନୁହେଁ ଚାଲି ଚାଲି ହେବ ପାଟ୍ରୋଲିଂ I ବସ୍ତିରେ କ୍ରାଇମ୍ ବଢୁଥିବା ବେଳେ ତାକୁ ରୋକିବା ପାଇଁ କମିଶନରେଟ ପୋଲିସର ବ୍ଲୁ ପ୍ରିଣ୍ଟ । ସନ୍ଦିଗ୍ଧ ସ୍ଥାନ ଓ ବସ୍ତି ଅଞ୍ଚଳରେ ଜୋରଦାର୍ ହେବ ଫୁଟ ପାଟ୍ରୋଲିଂ । ସେପଟେ ଧଉଳି ମର୍ଡର କେସରେ ୨ ଅଭିଯୁକ୍ତଙ୍କୁ ରିମାଣ୍ଡରେ ଆଣି ବନ୍ଧୁକ ଲିଙ୍କ ଖୋଜୁଛି ପୋଲିସ । ହତ୍ୟାକାଣ୍ଡ ଘଟଣାରେ ପୋଲିସ ହାତରେ ବନ୍ଧୁକ କାରବାରର ବଡ଼ ସୁରାଗ ମିଳିଛି । ମୁଖ୍ୟ ଅଭିଯୁକ୍ତ ଚିତ୍ରସେନ ଗଜେନ୍ଦ୍ରଙ୍କ ଘରୁ ଜବତ ହୋଇଛି ଅଫୁଟା ଗୁଳି ।

ରାତି ବଢ଼ିଲେ କ୍ରିମିନାଲଙ୍କ ତାତି ବଢୁଛି, ରାଜଧାନୀରେ ଦିନକୁ ଦିନ ବଢୁଛି କ୍ରିମିନାଲ୍ ଉତ୍ପାତ । କେଉଁଠି ବନ୍ଧୁକ ଗର୍ଜିଲାଣି ତ ପୁଣି କେଉଁଠି ଯାଉଛି ଜୀବନ, ରାଜଧାନୀରେ ଗୋଟିଏ ପରେ ଗୋଟିଏ ୫ଟି ହତ୍ୟାକାଣ୍ଡ ପରେ ଅପରାଧ ରୋକିବାକୁ କମିଶନରେଟ୍ ପୋଲିସ ଏଭଳି ପଦକ୍ଷେଫ ଗ୍ରହଣ କରିଛି । ଫୁଟ୍ ପାଟ୍ରୋଲିଂ ସହ ପିସିଆର୍ ପାଟ୍ରୋଲିଂକୁ ମଧ୍ୟ ଜୋରଦାର କରାଯାଇଛି । ବିଭିନ୍ନ ବସ୍ତି ସହ ସହରର ସମ୍ବେଦନଶୀଳ ଅଞ୍ଚଳରେ ପଇଁତରା ମାରୁଛନ୍ତି ପୋଲିସର ଦକ୍ଷ ଅଧିକାରୀ ।

ଗତ ୫ ତାରିଖ ରାତିରେ ଭୋଜିଭାତ ଆୟୋଜନ ଭିତରେ ଫୁଟିଥିଲା ଗୁଳି । ବନ୍ଧୁକ ପାଇଁ ସେଲିବ୍ରେସନ ଚାଲିଥିବା ବେଳେ ସେହି ବନ୍ଧୁକ ଫୁଟି ତପୁ ନାୟକର ଚାଲିଗଲା ଜୀବନ । ଏହି ଘଟଣାରେ ୮ ଜଣଙ୍କୁ ଗିରଫ କରିଥିଲା ଧଉଳି ଥାନା ପୋଲିସ ଏବଂ କ୍ରାଇମ ସ୍ପଟ୍‌ରୁ ଜବତ ହୋଇଥିଲା ବନ୍ଧୁକ । ଆଜି ସେହି ବନ୍ଧୁକ ଡିଲ୍ ଓ ରୁଟ୍ ମ୍ୟାପ୍ ସମ୍ପର୍କରେ ଜାଣିବା ପାଇଁ ମୁଖ୍ୟ ଅଭିଯୁକ୍ତ ଚିତ୍ରସେନ ଗଜେନ୍ଦ୍ର ଓ ଉମେଶ ପଟ୍ଟନାୟକଙ୍କୁ ୨ ଦିନିଆ ରିମାଣ୍ଡରେ ଆଣିଛି ଧଉଳି ଥାନା ପୋଲିସ ।

ଗତ କିଛି ସପ୍ତାହ ଭିତରେ ଖଣ୍ଡଗିରି, ଧଉଳି ଓ ଲକ୍ଷ୍ମୀସାଗର ଅଞ୍ଚଳରେ ଗୁଳିକାଣ୍ଡ ଘଟି ବନ୍ଧୁକ ଜବତ ହେବା ପରେ, ଏଥିରେ ବସ୍ତିରେ ରହୁଥିବା ପିଲାଙ୍କ ବେଶୀ ସମ୍ପୃକ୍ତି ଥିବା ଘଟଣା ପୋଲିସ ପାଇଁ ମୁଣ୍ଡବିନ୍ଧାର କାରଣ ପାଲଟିଛି । ସେମାନଙ୍କ ପାଖକୁ କେଉଁଠୁ ଆସୁଛି ବନ୍ଧୁକ ? ତେଣୁ ବନ୍ଧୁକ ବେପାରୀଙ୍କ ଲିଙ୍କ୍ ଏବଂ ଆର୍ମସ୍ ସିଣ୍ଡିକେଟ୍ ସମ୍ପର୍କରେ ଜାଣିବା ପାଇଁ ପୋଲିସ ଆରମ୍ଭ କରିଛି ବ୍ୟାପକ ଖୋଳତାଡ଼ । ସହରର ଛାତି ଉପରେ ଅପରାଧୀ ହଲ୍ଲାବୋଲ ଡାକରା ଦେଉଥିବାବେଳେ ତାଙ୍କୁ ମାତ୍ ଦେବାକୁ ଆରମ୍ଭ ହୋଇଛି ଥାନାୱାରୀ ଫୁଟ୍ ପାଟ୍ରୋଲିଂ ।