ନୂଆଦିଲ୍ଲୀ: ପୂର୍ବ ଦିଲ୍ଲୀର ଗଗନ ବିହାରରେ ଘଟିଥିବା ହତ୍ୟାକାଣ୍ଡ ଏବେ ଚାରିଆଡ଼େ ଚହଳ ପକାଇଛି । କ୍ରାଇମ୍ ୱେବ୍ ସିରିଜ୍ ଦେଖି ସ୍ଵାମୀ ପାଲଟିଯାଇଛି ହତ୍ୟାକାରୀ । ପୂରା ଫିଲ୍ମ ଷ୍ଟାଇଲରେ ନିଜ ସ୍ତ୍ରୀକୁ ହତ୍ୟା କରିଛି, ଆଉ ଟଙ୍କା ଧରି ନେପାଳ ଚାଲିଯିବାକୁ ପୂରା ପ୍ଲାନ କରିଥିଲେ । ହେଲେ ଦିଲ୍ଲୀ ପୋଲିସ ତାଙ୍କୁ ଚାରି ଦିନ ପରେ ମଥୁରା ରେଳ ଷ୍ଟେସନ ନିକଟରୁ ଗିରଫ କରିଛି । ୬୨ ବର୍ଷୀୟ ଆଇଟି ଇଞ୍ଜିନିୟର କମଲ ସିଂହ ତାଙ୍କ ପତ୍ନୀ କୋମଲ ସିଂହଙ୍କୁ କାହିଁକି ହତ୍ୟା କଲେ ତାକୁ ନେଇ ବିଶେଷ ଆଲୋଚନା ହେଉଛି ।
- ସମ୍ପର୍କ ଭାଙ୍ଗିଥିଲା, ତଥାପି ଗୋଟିଏ ଛାତ ତଳେ ରହୁଥିଲେ
ପୋଲିସର କହିବା ଅନୁଯାୟୀ, କମଲ ଏବଂ କୋମଲଙ୍କ ବୈବାହିକ ଜୀବନ ଗତ ୧ ବର୍ଷ ଧରି ଅତ୍ୟନ୍ତ ତିକ୍ତ ହୋଇସାରିଥିଲା । କମଲ ମୁମ୍ବାଇ ଯାତ୍ରା ସମୟରେ ଅନ୍ୟ ଜଣେ ମହିଳାଙ୍କ ସହିତ ସମ୍ପର୍କରେ ଥିଲେ । ପରବର୍ତ୍ତୀ ସମୟରେ ସେ ତାଙ୍କ ସ୍ତ୍ରୀଙ୍କଠାରୁ ଅଲଗା ଭାବରେ ରହିବା ଆରମ୍ଭ କରିଥିଲେ । ଏମିତି କମଲ ଓ କୋମଲଙ୍କ ପ୍ରେମ କାହାଣୀର ଦି ଏଣ୍ଡ ହୋଇଥିଲା । ସ୍ଵାମୀ-ସ୍ତ୍ରୀ ଗୋଟିଏ ଛାତ ତଳେ ତ ରହୁଥିଲେ, ହେଲେ ଦୁଇଜଣଙ୍କ ମଧ୍ୟରେ ସମ୍ପର୍କ ଭାଙ୍ଗିସାରିଥିଲା । ଏପରିକି ଦୁହେଁ ବିଦ୍ୟୁତ ବିଲ୍ ବି ଅଲଗା ଦେଉଥିଲେ ।
- ସମ୍ପତ୍ତିକୁ ନେଇ ବି ହେଉଥିଲା ଝଗଡ଼ା
ତଦନ୍ତରୁ ଜଣାପଡ଼ିଲା ଯେ କମଲ ଜଗତପୁରୀରେ ଏକ ସମ୍ପତ୍ତି କିଣିବାକୁ ଚାହୁଁଥିଲେ । ସେ ତାଙ୍କ ପିତାଙ୍କ ନାମରେ ପଞ୍ଜିକୃତ ସମ୍ପତ୍ତି ଚାହୁଁଥିଲେ, କିନ୍ତୁ ଏହି ସମ୍ପତ୍ତିର କିଛି ଅଂଶ କୋମଲ ନିଜ ନାଁରେ ଚାହୁଁଥିଲେ । ଏହି ପ୍ରସଙ୍ଗକୁ ନେଇ ମଧ୍ୟ ସେମାନଙ୍କର ପ୍ରାୟତଃ ଝଗଡ଼ା ହେଉଥିଲା । ପୋଲିସର କହିବା ଅନୁଯାୟୀ, ଏହି ବିବାଦ ପରେ କମଲ ଜୁଲାଇ ମାସରେ ତାଙ୍କ ସ୍ତ୍ରୀଙ୍କୁ ହତ୍ୟା କରିବାକୁ ଯୋଜନା କରିଥିଲେ । ସେ ହରିନଗର ଅଞ୍ଚଳରୁ ଏକ ଖଣ୍ଡା କିଣି ଲୁଚାଇ ରଖିଥିଲେ ।
- ୱେବ୍ ସିରିଜ୍ ଦେଖିବା ପରେ ଷଡ଼ଯନ୍ତ୍ର
କମଲ ସିଂହ ଲୋକପ୍ରିୟ ଅପରାଧ ଧାରାବାହିକ "ଦି ଷ୍ଟେୟାରକେସ୍" ଦେଖୁଥିଲେ । ଧାରାବାହିକର କାହାଣୀ ଜଣେ ସ୍ତ୍ରୀଙ୍କୁ ହତ୍ୟା କରାଯିବା ଉପରେ ରହିଥିଲା, ଯେଉଁଥିରେ ହତ୍ୟାରେ ବ୍ୟବହୃତ ଅସ୍ତ୍ର କେବେବି ଉଦ୍ଧାର ହୋଇପାରେନାହିଁ । ପୋଲିସ କହିଛି ଯେ କମଲ ତାଙ୍କ ବିରୁଦ୍ଧରେ ପ୍ରମାଣକୁ ଦୁର୍ବଳ କରିବା ପାଇଁ ହତ୍ୟା ଅସ୍ତ୍ରକୁ ସେହିପରି ନଷ୍ଟ କରିବାକୁ ଯୋଜନା କରିଥିଲେ।
ଜୁଲାଇ ୩୦ ତାରିଖ ଅପରାହ୍ନରେ ଘରେ କେବଳ କମଲ ଏବଂ କୋମଲ ଉପସ୍ଥିତ ଥିଲେ । ପୁଅ ଲାଇବ୍ରେରୀ ଯାଇଥିଲା, ଝିଅ ଅଫିସରେ ଥିଲା । ପ୍ରାୟ ୧୨.୪୫ଟା ସମୟରେ ହତ୍ୟାକାରୀ ସ୍ଵାମୀ ବାଲକୋନିରେ କୋମଲ କପଡା ଶୁଖାଉଥିବା ସମୟରେ ସେଠାରେ ପହଞ୍ଚିଥିଲେ। ପୋଲିସ ଅଭିଯୋଗ କରିଛି ଯେ ସେ ତାଙ୍କ ମୁଣ୍ଡକୁ ପଛରୁ ଖଣ୍ଡାରେ ଆକ୍ରମଣ କରିଥିଲେ। ଆକ୍ରମଣ ପରେ କୋମଲ ତାଙ୍କ ଜୀବନ ବଞ୍ଚାଇବା ପାଇଁ ରୋଷେଇ ଘରକୁ ଦୌଡ଼ିଥିଲେ । ଏହାପରେ କମଲ୍ ତାଙ୍କୁ କଇଁଚିରେ ମଧ୍ୟ ଆକ୍ରମଣ କରିଥିଲେ । ପୋଷ୍ଟମର୍ଟମ ରିପୋର୍ଟରେ ତାଙ୍କ ଶରୀରରେ ୧୦ରୁ ଅଧିକ ଗୁରୁତର କ୍ଷତ ଚିହ୍ନ ମିଳିଛି। କମଲ ମାତ୍ର ୧୦ ମିନିଟ୍ ମଧ୍ୟରେ ସ୍ତ୍ରୀକୁ ହତ୍ୟା କରିଥିବା ପୋଲିସ କହିଛି ।
ଅପରାଧ ପରେ, ଅଭିଯୁକ୍ତ ରକ୍ତ ଲାଗିଥିବା ପୋଷାକ ଏବଂ ଅସ୍ତ୍ରଶସ୍ତ୍ରକୁ ଏକ ବ୍ୟାଗରେ ରଖିଥିଲା । ତା'ପରେ ସେ ପ୍ରାୟ ୧୫ ମିନିଟ୍ ପର୍ଯ୍ୟନ୍ତ ଗାଧୋଇଥିଲା ଏବଂ ତା'ପରେ ସ୍କୁଟରରେ ଘରୁ ବାହାରି ଯାଇଥିଲା । ରାସ୍ତାରେ ସେ ହତ୍ୟା ଅସ୍ତ୍ର ଥିବା ବ୍ୟାଗକୁ ଏକ ନିର୍ଜନ ଅଞ୍ଚଳରେ ଫୋପାଡ଼ି ଦେଇଥିଲା । ପୋଲିସର କହିବା ଅନୁଯାୟୀ, ସେ ଦୁଇଟି ବ୍ୟାଙ୍କରୁ ପ୍ରାୟ ୭ ଲକ୍ଷ ଟଙ୍କା ଉଠାଇଥିଲା । ସେ ପୂର୍ବରୁ ତାଙ୍କ ଘରୁ ପ୍ରାୟ ୫ ଲକ୍ଷ ଆଣିସାରିଥିଲା । ତା ପାଖରେ ମୋଟ ପ୍ରାୟ ୧୨ ଲକ୍ଷ ୭୫ ହଜାର ଟଙ୍କା ନଗଦ ଥିଲା ।
- ପୁଅ କବାଟ ଖୋଲି ଦେଖିଥିଲା ଭୟଙ୍କର ଦୃଶ୍ୟ
କମଲଙ୍କ ୨୬ ବର୍ଷୀୟ ପୁଅ ଗୌରବ ସିଂହ ସାରା ଦିନ ନୋଏଡାର ଏକ ଲାଇବ୍ରେରୀରେ ପାଠ ପଢ଼ୁଥିଲା । ଡାକ୍ତରୀ ପିଜି ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ ହେଉଥିବା ଗୌରବ ଦିନସାରା ତାଙ୍କ ମାଆଙ୍କୁ ଅନେକ ଥର ଫୋନ୍ କରିଥିଲେ, କିନ୍ତୁ କୌଣସି ଉତ୍ତର ପାଇନଥିଲେ । ସେ ରାତି ପ୍ରାୟ ୯:୧୫ରେ ଘରେ ପହଞ୍ଚି ଆଉ ଏକ ଚାବି ସାହାଯ୍ୟରେ କବାଟ ଖୋଲିଥିଲେ । ଭିତରକୁ ପଶିବା ପରେ, ସେ ତାଙ୍କ ମାଆଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବାର ଦେଖିଲେ । ପାଖରେ କଇଁଚି ମିଳିଥିଲା, କିନ୍ତୁ କଥିତ ହତ୍ୟାର ମୁଖ୍ୟ ଅସ୍ତ୍ର ଖଣ୍ଡା ନିଖୋଜ ଥିଲା ।
- ମଥୁରାରେ ଧରାପଡ଼ିଲା ହତ୍ୟାକାରୀ ସ୍ଵାମୀ
ଦିଲ୍ଲୀ ପୋଲିସ ସିସିଟିଭି ଫୁଟେଜ୍, ଇଲେକ୍ଟ୍ରୋନିକ୍ ପ୍ରମାଣ ଆଧାରରରେ ଅଭିଯୁକ୍ତକୁ ଖୋଜିବା ଆରମ୍ଭ କରିଥିଲା । ପୋଲିସର କହିବା ଅନୁଯାୟୀ ସେ ପ୍ରଥମେ ଗୋରଖପୁର ଅଭିମୁଖେ ଯାତ୍ରା କରିଥିଲା ଏବଂ ନେପାଳ ପଳାଇଯାଇବାର ଯୋଜନା ରଖିଥିଲା । ପରେ ସେ ତା ମୋବାଇଲ୍ ଫୋନ୍ ବନ୍ଦ କରି ମଥୁରା ଅଭିମୁଖେ ଚାଲିଯାଇଥିଲା । ଅଗଷ୍ଟ ୨ ତାରିଖରେ ପୋଲିସ ତାକୁ ମଥୁରା ରେଳ ଷ୍ଟେସନ ନିକଟରୁ ଗିରଫ କରିଥିବା କହିଛି ।
- ଏପର୍ଯ୍ୟନ୍ତ ମିଳିନାହିଁ ହତ୍ୟା ଅସ୍ତ୍ର
ଗିରଫ ସମୟରେ ଅଭିଯୁକ୍ତଠାରୁ ₹୧୨.୭୫ ଲକ୍ଷ ନଗଦ ଟଙ୍କା ଜବତ କରାଯାଇଥିଲା । ଅପରାଧରେ ବ୍ୟବହୃତ ସ୍କୁଟରକୁ ବି ପୋଲିସ ଜବତ କରାଯାଇଛି । ମାତ୍ର ଏପର୍ଯ୍ୟନ୍ତ ହତ୍ୟାରେ ବ୍ୟବହୃତ ଖଣ୍ଡାଟି ପୋଲିସ ଜବତ କରିନାହିଁ । ଦିଲ୍ଲୀ ପୋଲିସ କହିଛି ଯେ ପଚରାଉଚରା ସମୟରେ ଅଭିଯୁକ୍ତ ହତ୍ୟା ଷଡ଼ଯନ୍ତ୍ର, ପାରିବାରିକ ବିବାଦ ବିଷୟରେ ନିଜେ ସ୍ଵୀକାର କରିଛି । ପୋଲିସ ବର୍ତ୍ତମାନ ହତ୍ୟାକାଣ୍ଡରେ ବ୍ୟବହୃତ ଅସ୍ତ୍ରଶସ୍ତ୍ର ଖୋଜୁଥିବାବେଳେ ମାମଲାର ସମସ୍ତ ଦିଗକୁ ଦୃଷ୍ଟିରେ ରଖି ତଦନ୍ତ କରୁଛି ।
