ନୂଆଦିଲ୍ଲୀ: ପାର୍ଟି ନାଁରେ ହୋଟେଲ୍‌କୁ ଡାକିଲେ, ଥଣ୍ଡାରେ ନିଶା ମିଶାଇ ପିଆଇଲେ । ତା'ପରେ ଅଶ୍ଳୀଳ ଭିଡିଓ ସୁଟ୍ କରି କଲେ ବ୍ଲାକମେଲ୍ । ମାସେ ଧରି ଦିଲ୍ଲୀରେ ବ୍ଲାକମେଲ୍ ଜରିଆରେ ଦୁଷ୍କର୍ମର ଶିକାର ହୋଇଛନ୍ତି ଜଣେ ୧୮ ବର୍ଷୀୟ ଡାକ୍ତରୀ ଛାତ୍ରୀ । ଏନେଇ ଦିଲ୍ଲୀ ପୋଲିସରେ ମାମଲା ହୋଇଥିବା ବେଳେ ଅଭିଯୁକ୍ତ ଫେରାର୍ ରହିଛି ।

ସୂଚନା ଅନୁସାରେ, MBBS ଛାତ୍ରୀ ଜଣଙ୍କୁ ୨୦ ବର୍ଷୀୟ ଯୁବକ ଜଣଙ୍କ ଉତ୍ତରପଶ୍ଚିମ ଦିଲ୍ଲୀର ଆଦର୍ଶ ନଗରର ଏକ ହୋଟେଲ ରୁମକୁ ପାର୍ଟି ବାହାନାରେ ଡାକିଥିଲେ । ସେଠାରେ ଉକ୍ତ ଯୁବକଙ୍କ ସହ ଆଉ ୨ ଜଣ ସହଯୋଗୀ ଥିଲେ । ପାନୀୟରେ କିଛି ନିଶା ପଦାର୍ଥ ମିଶାଇ ଯୁବତୀଙ୍କୁ ପିଇବାକୁ ଦେଇଥିଲେ ।

ଏଥିସହ ପଢ଼ନ୍ତୁ: ଆମେରିକାରେ ଭାରତୀୟ ବଂଶୋଦ୍ଭବ ମୋଟେଲ୍ ମ୍ୟାନେଜରଙ୍କୁ ହତ୍ୟା

ଉକ୍ତ ପାନୀୟ ପିଇବା ପରେ ଅଚେତ ହୋଇ ଯାଇଥିଲେ ଯୁବତୀ । ଏହା ପରେ ହୋଟେଲ୍ ରୁମର ନିବୁଜ କୋଠରୀରେ ଯୁବକ, ଯୁବତୀଙ୍କ ସହ ସମ୍ପର୍କ ରଖିଥିଲେ । ଯାହାର ଭିଡିଓ ସୁଟ୍ କରିଥିଲେ ଅନ୍ୟ ୨ ସହଯୋଗୀ ।

ଆଉ ଉକ୍ତ ଭିଡିଓକୁ ଦେଖାଇ ବାରମ୍ବାର ଯୁବତୀଙ୍କୁ ବ୍ଲାକମେଲ୍ କରି ଚାଲିଥିଲେ ଯୁବକ ଜଣଙ୍କ । ପ୍ରାୟ ମାସେ ଧରି ଯୁବତୀଙ୍କୁ ଦୁଷ୍କର୍ମ କରିବା ସହ ମାଡ଼ ବି ମାରିଥିବା ପୋଲିସର ଅଭିଯୋଗ ହୋଇଛି । ସେପ୍ଟେମ୍ବରରେ ଏ ଘଟଣା ଘଟିଥିବା ବେଳେ ଏବେ ସାମ୍ନାକୁ ଆସିଛି ।

ପୀଡ଼ିତାଙ୍କ ଅଭିଯୋଗ ଅନୁସାରେ, "ଯୁବକଙ୍କୁ ସହଯୋଗ ନ କଲେ ସେ ଭିଡିଓ ଭାଇରାଲ୍ କରିବା ସହ ସୋସିଆଲ୍ ମିଡିଆରେ ଅପଲୋଡ୍ କରିବାର ଧମକ ଦେଇଥିଲା ।" ଏନେଇ ପୋଲିସ ଗତ ଶୁକ୍ରବାର ମାମଲା ରୁଜୁ କରିବା ସହ ଫେରାର୍ ଥିବା ଯୁବକଙ୍କୁ ଖୋଜୁଛି ।

ଏଥିସହ ପଢ଼ନ୍ତୁ: ବଚସାକୁ ନେଇ ପ୍ରଥମେ ବଡ଼ ଭାଇକୁ ଆକ୍ରମଣ, ସାନ ଭାଇକୁ ହତ୍ୟା

ମାମଲା ସହ ଜଡ଼ିତ ଦିଲ୍ଲୀ ପୋଲିସର ବରିଷ୍ଠ ଅଧିକାରୀ କହିଛନ୍ତି, "ପୀଡ଼ିତା ଡାକ୍ତରୀ ଛାତ୍ର ଓ ଅଭିଯୁକ୍ତ ଯୁବକ ଉଭୟ ହରିୟାଣା ଜିନ୍ଦ ଅଞ୍ଚଳର । ପୀଡ଼ିତା ଏବେ ଦିଲ୍ଲୀର ଏକ ହଷ୍ଟେଲରେ ରହୁଥିବା ବେଳେ ଏନେଇ ଗତ ଗୁରୁବାର ଅଭିଯୋଗ କରିଛନ୍ତି ।"

ସେହିଭଳି ଅଭିଯୁକ୍ତ ଜଣଙ୍କ ଜିନ୍ଦର ହୋଇଥିବା ବେଳେ ସେ ଉତ୍ତର ଦିଲ୍ଲୀରେ ରହି କମ୍ପିଟେଟିଭ୍ ପରୀକ୍ଷା ପାଇଁ ପ୍ରସ୍ତୁତ ହେଉଥିଲେ । ସେପ୍ଟେମ୍ବର ୯ରେ ଅଭିଯୁକ୍ତ ଜଣଙ୍କ ୨ ସହଯୋଗୀଙ୍କ ସହ ହୋଟେଲ ରୁମକୁ ଯୁବତୀଙ୍କୁ ଡାକିଥିଲେ । ଅଭିଯୁକ୍ତଙ୍କୁ ସହଯୋଗ କରିଥିବା ୨ ଯୁବକ ମଧ୍ୟ ଜିନ୍ଦର । କିନ୍ତୁ ଏଯାଏଁ ସେମାନଙ୍କ ପରିଚୟ ମିଳିପାରି ନାହିଁ ।

ଅକ୍ଟୋବର ୨ରେ ପରିବାର ଲୋକଙ୍କୁ ଜଣାଇବା ପରେ ଯୁବତୀ ଏତଲା ଦେଇଥିଲେ । ପୋଲିସ ଭାରତୀୟ ନ୍ୟାୟ ସଂହିତାର ସେକ୍ସନ୍ ୬୪ (୧)ରେ ପୀଡ଼ିତାଙ୍କ ବୟାନ ରେକର୍ଡ କରିଛି । ପୀଡ଼ିତାଙ୍କ କାଉନସେଲିଂ କରା ଯାଉଥିବା ବେଳେ ଦିଲ୍ଲୀ ପୋଲିସର ଏକାଧିକ ଟିମ୍ ବିଭିନ୍ନ ସ୍ଥାନରେ ରେଡ୍ କରିଛନ୍ତି ।

ଏହା ପୂର୍ବରୁ ଅଗଷ୍ଟରେ ଉତ୍ତର ଦିଲ୍ଲୀର ସିଭିଲ୍ ଲାଇନ୍ ଅଞ୍ଚଳରେ ସମାନ ଘଟଣା ଘଟିଥିଲା । ଜଣେ ୨୪ ବର୍ଷୀୟ ମହିଳାଙ୍କୁ ୪ ଜଣ ଗଣଦୁଷ୍କର୍ମ କରିଥିବା ଅଭିଯୋଗ ହୋଇଥିଲା । ଉକ୍ତ ମାମଲାରେ ଜଣେ ଟିଭି କଳାକାର ବି ବନ୍ଧା ହୋଇଥିଲେ । ପୀଡ଼ିତା ଅଭିଯୋଗ କରିଥିଲେ, "ସେ ଏକ ପାର୍ଟିକୁ ଯାଇଥିବା ବେଳେ ତାଙ୍କ ପାନୀୟରେ ନିଶା ମିଶାଇ ତାଙ୍କୁ ଦୁଷ୍କର୍ମ କରାଯାଇଛି ।"