ଦିଲ୍ଲୀରେ ଥିବା କୁଖ୍ୟାତ ଅପରାଧୀଙ୍କ ପାଇଁ ଅକ୍ଟୋବର ମାସ ଥିଲା କାଳର ମାସ । ଦିଲ୍ଲୀ ପୋଲିସ୍‌ ଅକ୍ଟୋବର ମାସରେ ଅପରାଧୀଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଅକ୍ଟୋବର ୧ରୁ ୨୭ ମଧ୍ୟରେ ଦିଲ୍ଲୀ ପୋଲିସ୍‌ ୧୦ଟି ଏନକାଉଣ୍ଟର କରିଛି । ଯେଉଁଥିରେ ପାଞ୍ଚ ଜଣ କୁଖ୍ୟାତ ଅପରାଧିଙ୍କ ମୃତ୍ୟୁ ହୋଇଛି । ଏହି ଏନକାଉଣ୍ଟରରେ ଏକ ଡଜନରୁ ଅଧିକ ଅପରାଧୀ ଆହତ ହୋଇଥିଲେ । ପୋଲିସ ଦିଲ୍ଲୀରୁ ହରିୟାଣା, ରାଜସ୍ଥାନରୁ ବିହାର ପର୍ଯ୍ୟନ୍ତ ଲମ୍ବିଥିବା ଅପରାଧ ନେଟଓ୍ବାର୍କକୁ ବଡ଼ ଝଟକା ଦେଇଛି ।

ଜଣେ ପୋଲିସ ଅଧିକାରୀ କହିଛନ୍ତି ଯେ, ଏହି ଅପରେସନ୍‌ ମାଧ୍ୟମରେ ସକ୍ରିୟ ଗ୍ୟାଙ୍ଗ୍ ଏବଂ ଅପରାଧୀଙ୍କୁ ଗୋଟିଏ ପରେ ଗୋଟିଏ ଅପରାଧୀଙ୍କୁ ଟାର୍ଗେଟ କରାଯାଇଥିଲା । ସେ କହିଛନ୍ତି, 'ଏପରି ଅନେକ ଅପରାଧୀ ଅଛନ୍ତି ଯେଉଁମାନେ ସୋସିଆଲ ମିଡିଆରେ ଅସ୍ତ୍ରଶସ୍ତ୍ର ପ୍ରଦର୍ଶନ କରିବା, ଭିଡିଓ ମାଧ୍ୟମରେ ଶତ୍ରୁଙ୍କୁ ଭୟଭୀତ କରିବା କିମ୍ବା ବିଦେଶୀ ଗ୍ୟାଙ୍ଗଷ୍ଟରଙ୍କ ପାଇଁ କାମ କରିବାର ଇତିହାସ ରହିଛି । ଏଭଳି ଅପରାଧୀଙ୍କ ପାଖରେ ପହଞ୍ଚିବା ପାଇଁ ପୋଲିସ୍‌ ଜୋରଦାର ଅପରେସନ୍‌ ଜାରି ରଖିଛି ।

୧ ଅକ୍ଟୋବରରୁ ଦକ୍ଷିଣ ଦିଲ୍ଲୀରୁ ଏହି ସିରିଜ୍‌ ଏନକାଉଣ୍ଟର ଆରମ୍ଭ ହୋଇଥିଲା । ଦକ୍ଷିଣ ଦିଲ୍ଲୀର ଜୈତପୁର-କାଳିନ୍ଦି କୁଞ୍ଜ ରୋଡରେ ପୋଲିସ ଏବଂ ଅପରାଧୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା । ଏହି ଏନକାଉଣ୍ଟରରେ ରୋହିତ ଗୋଦ୍ରା-ଗୋଲଡି ବ୍ରାର-ବୀରେନ୍ଦ୍ର ଚରଣ ଗ୍ୟାଙ୍ଗର ଦୁଇ ଜଣ ସୁଟର ରାହୁଲ ଏବଂ ସାହିଲଙ୍କୁ ଗିରଫ କରାଯାଇଥିଲା । ଉଭୟଙ୍କ ଉପରେ ଜଣେ ସୋସିଆଲ ମିଡିଆ ଇନ୍‌ଫ୍ଲ୍ୟୁନ୍ସରଙ୍କୁ ହତ୍ୟା କରିବା ପାଇଁ ଡିଲ୍‌ କରିଥିବାର ଅଭିଯୋଗ ହୋଇଥିଲା । ରାହୁଲ ଏକ ଟ୍ରିପଲ୍‌ ମର୍ଡର କେସ୍‌ରେ ମୋଷ୍ଟ ଓ୍ବାଣ୍ଟେଡ୍‌ ଥିଲା ।

ଅଧିକ ପଢ଼ନ୍ତୁ: 'କାର ନଥିଲେ ବିବାହ ପାଇଁ ପୁଅଙ୍କୁ ଝିଅ ଦେଉନାହାନ୍ତି ଲୋକେ'

ପୋଲିସ କହିଛି ଯେ ଏହି ଗ୍ୟାଙ୍ଗ ବିଦେଶରେ ରହୁଥିବା ରୋହିତ ଗୋଦ୍ରାଙ୍କ ନିର୍ଦ୍ଦେଶରେ କାର୍ଯ୍ୟ କରୁଥିଲା । ଏହାପରେ ୩ ଅକ୍ଟୋବରରେ ସମାନ ସିଣ୍ଡିକେଟର ଆଉ ଦୁଇ ଜଣ ଗ୍ୟାଙ୍ଗଷ୍ଟର ଆକାଶ ରାଜପୁତ ଓ ମହିପାଳଙ୍କୁ କପାସେରାରେ ପୋଲିସ ଗିରଫ କରିଥିଲା । ଉଭୟ ରାଜସ୍ଥାନର ବାସିନ୍ଦା ଥିଲେ ଏବଂ ତିନୋଟି ରାଜ୍ୟରେ ବଟି ଆଦାୟ, ଅପହରଣ ଏବଂ ଗୁଳିକାଣ୍ଡ ମାମଲାରେ ୱାଣ୍ଟେଡ୍ ଥିଲେ । ଆକାଶ ଉପରେ ୨୦ ହଜାର ଟଙ୍କାର ପୁରସ୍କାର ରାଶି ଥିଲା ।

ସେହିପରି ୭ ଅକ୍ଟୋବରରେ ଦିଲ୍ଲୀ ଏବଂ ଗୁରୁଗ୍ରାମ ପୋଲିସ ମିଳିତ ଭାବରେ ଏକ ବଡ଼ ଅପରେସନ୍ କରିଥିଲେ । କୁଖ୍ୟାତ ନେପାଳୀ ଅପରାଧୀ ଭୀମ ମହା ବାହାଦୁର ଜୋରା ଆସ୍ଥା କୁଞ୍ଜ ପାର୍କ ନିକଟରେ ଏକ ଏନକାଉଣ୍ଟରରେ ନିହତ ହୋଇଥିଲା । ଜୋରା ୨୦୨୪ ମେ' ମାସରେ ଜଙ୍ଗପୁରାରେ ଜଣେ ଡାକ୍ତରଙ୍କ ହତ୍ୟା ଏବଂ ଅନ୍ୟାନ୍ୟ ଅନେକ ଜଘନ୍ୟ ଅପରାଧ ପାଇଁ ୱାଣ୍ଟେଡ୍ ଥିଲା । ପୋଲିସର ସୂଚନା ଅନୁଯାୟୀ, ଯେତେବେଳେ ପୋଲିସ୍‌ର ଏକ ଟିମ୍‌ ତାଙ୍କୁ ଧରିବାକୁ ପହଞ୍ଚିଲା, ସେ ପ୍ରଥମେ ପୋଲିସ୍‌ ଉପରକୁ ଗୁଳି ଚଳାଇଥିଲା । ପୋଲିସ୍‌ର ପାଲଟା ଗୁଳିରେ ଶେଷରେ ତା'ର ମୃତ୍ୟୁ ହୋଇଥିଲା ।

ସେହିପରି ୯ ଅକ୍ଟୋବରରେ ରୋହିଣୀରେ ଆଉ ଏକ ଏନକାଉଣ୍ଟରରେ ହମଜା ନାମକ ଜଣେ ଅପରାଧୀ ଗିରଫ ହୋଇଥିଲା। ସେ ଉତ୍ତର ପ୍ରଦେଶର ମିରଟରେ ତାଙ୍କ ବନ୍ଧୁ ଆଦିଲଙ୍କୁ ହତ୍ୟା କରିବା ପରେ ଫେରାର୍ ଥିଲା । ସେ ହତ୍ୟାର ଏକ ଭିଡିଓ ସୋସିଆଲ ମିଡିଆରେ ଅପଲୋଡ୍ କରିଥିଲା। ତା'ର ଗୋଡରେ ଗୁଳି ବାଜିଥିଲା ​​ଏବଂ ପରେ ତାକୁ ଗିରଫ କରାଯାଇଥିଲା।

୧୦ ଅକ୍ଟୋବରରେ ନରେଲା ଶିଳ୍ପାଞ୍ଚଳରେ ଏକ ଏନକାଉଣ୍ଟରରେ ପୋଲିସ ଅଫତାବ ଆଲମ ଓରଫ ଅତି ନାମକ ଜଣେ ଅପରାଧୀଙ୍କୁ ଆହତ କରି ଗିରଫ କରିଥିଲା। ଅତି ପୋଲିସ ଉପରେ ଦୁଇ ରାଉଣ୍ଡ ଗୁଳି ଚଳାଇଥିଲା । ସେ ଚୋରି, ଛିନତାଇ ଏବଂ ହତ୍ୟା ଭଳି ଅନେକ ମାମଲାରେ ୱାଣ୍ଟେଡ୍ ଥିଲା । ୨୨ ଅକ୍ଟୋବରରେ ଦ୍ୱାରକାରେ ଆଉ ଏକ ଏନକାଉଣ୍ଟର ହୋଇଥିଲା । ଏଠାରେ, ଉତ୍ତମ ନଗର ହତ୍ୟା ମାମଲାରେ ୱାଣ୍ଟେଡ୍ ଥିବା ହ୍ରିତିକ୍ ଓରଫ ଡ୍ୟାନ୍ସର ଉପରେ ପୋଲିସ ଗୁଳି ଚଳାଇଥିଲା ।
ଏହି ଏନକାଉଣ୍ଟରରେ ଇନ୍ସପେକ୍ଟର ସୁଭାଷ ଚାନ୍ଦ ମଧ୍ୟ ଆହତ ହୋଇଥିଲେ । ତାଙ୍କ ହାତରେ ଗୁଳି ବାଜିଥିଲା। ଘଟଣାସ୍ଥଳରୁ ଏକ ପିସ୍ତଲ ଏବଂ ଅନେକ କାର୍ଟ୍ରିଜ୍ ଜବତ କରାଯାଇଥିଲା ।

ଏହାର ପରଦିନ ଅର୍ଥାତ ୨୩ ଅକ୍ଟୋବରରେ ଦିଲ୍ଲୀରେ ସବୁଠାରୁ ବଡ଼ ଏନକାଉଣ୍ଟର ହୋଇଥିଲା। ରାତି ପ୍ରାୟ ୨:୨୦ ସମୟରେ ରୋହିଣୀ ଅଞ୍ଚଳରେ ପୋଲିସ ଏନକାଉଣ୍ଟରରେ ବିହାରର ଚାରି ଜଣ ଗ୍ୟାଙ୍ଗଷ୍ଟର ରଞ୍ଜନ ପାଠକ, ବିମଲେଶ ମାହାତୋ, ମନୀଷ ପାଠକ ଏବଂ ଅମନ ଠାକୁର ନିହତ ହୋଇଥିଲେ। ସେମାନେ ସମସ୍ତେ ସିଗମା ଗ୍ୟାଙ୍ଗର ସଦସ୍ୟ ଥିଲେ।

ବିହାରରେ ଅନେକ ହତ୍ୟା ମାମଲାରେ ଏହି ଚାରି ଜଣ ମୋଷ୍ଟ ୱାଣ୍ଟେଡ୍ ଥିଲେ । ବିହାର ପୋଲିସର ଇନପୁଟ୍ ଆଧାରରେ, ଦିଲ୍ଲୀ ଏବଂ ବିହାର ପୋଲିସର ଏକ ମିଳିତ ଟିମ୍‌ ଏହି ଅପରେସନ୍ କରିଥିଲେ । ଅଭିଯୁକ୍ତମାନେ ପ୍ରଥମେ ପୋଲିସ୍‌ ଉପରକୁ ଗୁଳି ଚଳାଇଥିଲେ ଏବଂ ପୋଲିସ୍‌ର ପାଲଟା ଗୁଳିରେ ସମସ୍ତ ଚାରି ଜଣଙ୍କର ମୃତ୍ୟୁ ହୋଇଥିଲା ।

ଏହା ପରେ ୨୫ ଅକ୍ଟୋବରରେ ରାଜଧାନୀରେ ଦୁଇଟି ଏନକାଉଣ୍ଟର ହୋଇଥିଲା । ପ୍ରଥମଟି ମେହରୌଲିରେ ହୋଇଥିଲା, ଯେଉଁଠାରେ କନିଷ୍କ ଓରଫ କୋକ୍ ନାମକ ଜଣେ ଅସ୍ତ୍ର ଯୋଗାଣକାରୀ ପୋଲିସ ଗୁଳିରେ ଆହତ ହୋଇଥିଲେ। ପୋଲିସ ଘଟଣାସ୍ଥଳରୁ ଦୁଇଟି ପିସ୍ତଲ ଜବତ କରିଥିଲା । ସେହି ରାତିରେ, ପଶ୍ଚିମ ଦିଲ୍ଲୀର ନାଙ୍ଗଲୋଇ ଅଞ୍ଚଳରେ ଏକ ଏନକାଉଣ୍ଟରରେ ଫିରୋଜ, କାମରାନ ଏବଂ ଓସାଫ ନାମକ ତିନି ଜଣ ଅପରାଧୀଙ୍କୁ ଗିରଫ କରାଯାଇଥିଲା ।

ସେହିପରି ୨୬ ଅକ୍ଟୋବରରେ ବଦରପୁରରେ ଏକ ଏନକାଉଣ୍ଟର ହୋଇଥିଲା । ପୋଲିସ ୱାଣ୍ଟେଡ୍ ଡକାୟତ ହିମାଂଶୁକୁ ଗୋଡରେ ଗୁଳି ବାଜିବା ପରେ ଗିରଫ କରିଥିଲା। ସେ ଏକ ପିଜା ଡେଲିଭରି ବୟଙ୍କଠାରୁ ହୋଇଥିବା ଡକାୟତି ଘଟଣାରେ ଫେରାର ଥିଲା । ୨୭ ଅକ୍ଟୋବରରେ ଦିଲ୍ଲୀରେ ଚଳିତ ମାସର ଦଶମ ଏନକାଉଣ୍ଟର କରାଯାଇଥିଲା ।