Bullet Bike Robbery / ସର୍ଭିସିଂ ସେଣ୍ଟରରୁ ଦାମୀ ବାଇକ୍‌ ଲୁଟ୍; ସ୍କୁଟି ଥୋଇ ବୁଲେଟ୍ ନେଇଗଲେ

ଭୁବନେଶ୍ଵର: ସହରରେ ବଢ଼ିବାରେ ଲାଗିଛି ଚୋରଙ୍କ ପ୍ରାଦୁର୍ଭାବ। ଆଖି ପିଛୁଳାକେ ବାଇକ୍‌ ଚୋରି କରି ନେଉଛନ୍ତି ଶାତିର ଚୋର । ଗୋଟିଏ ଚୋରା ସ୍କୁଟିରେ ଆସି ଶୋ'ରୁମ୍‌ ସମ୍ମୁଖରୁ ଏକ ଦାମୀ ରୟାଲ୍‌ ଇନ୍‌ଫିଲ୍ଡ ବାଇକ୍‌ ନେଇ ଚମ୍ପଟ ମାରିଛି ଚୋର । ଏହି ସମ୍ପୂର୍ଣ୍ଣ ଚୋରିର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି, ଯାହାର ଏକ୍ସକ୍ଲୁସିଭ୍‌ ଫୁଟେଜ୍‌ ଏବେ ଆମର ହସ୍ତଗତ ହୋଇଛି । ଏଭଳି ଏକ ଘଟଣା ଦେଖିବାକୁ ମିଳିଛି ରାଜଧାନୀ ଭୁବନେଶ୍ୱରର ରବି ଟକିଜ୍‌ ଛକ ନିକଟରେ ଥିବା ଏକ ଗାଡ଼ି ଶୋ'ରୁମ୍‌ ସମ୍ମୁଖରୁ ।

• ସ୍କୁଟି ବଦଳରେ ରୟାଲ୍‌ ଇନ୍‌ଫିଲ୍ଡ

ରବି ଟକିଜ୍‌ ଛକରୁ ସିସିଟିଭି ଫୁଟେଜ୍‌ ଭାଇରାଲ୍‌ ହେଉଛି । ଶୋ'ରୁମ୍‌ ବାହାରୁ ଆଖି ପିଛୁଳାକେ ଗାଡ଼ି ଉଠାଇ ନେଇ ଚମ୍ପଟ ମାରିଛି ଚୋର । ବାଇକ ସୋରୁମରୁ ନୂଆ ଗାଡି ଆଣି ସର୍ଭିସିଂ କରିବାକୁ ଆଣିଥିଲେ ବୁଲେଟ୍ ମାଲିକ । ହେଲେ ଏମିତି ଲୁଟର ଶିକାର ହେବେ ଜାଣିନଥିଲେ । ଏଥି ନେଇ ବଡ଼ଗଡ଼ ଥାନାରେ ଲିଖିତ ଅଭିଯୋଗ କଲେ ବାଇକ୍ ମାଲିକ ତଥାଗତ ତ୍ରିପାଠୀ । ଏବେ ପୋଲିସ ସିସିଟିଭି ଆଧାରରେ ଅରମ୍ଭ କଲା ଛାନଭିନ ।

• ରାଜଧାନୀରେ ମାତିଛନ୍ତି ବଞ୍ଜରା ଗ୍ୟାଙ୍ଗ

ଅନ୍ୟପଟେ ରାଜଧାନୀରୁ ପୁଣି ବଞ୍ଜରା ଗ୍ୟାଙ୍ଗ ଗିରଫ । ୪ ଜଣିଆ ବଞ୍ଜରା ଗ୍ୟାଙ୍ଗକୁ ଗିରଫ କରିଛି କ୍ୟାପିଟାଲ ଥାନା ପୋଲିସ । ସେମାନଙ୍କ ନିକଟରୁ ଲୁଟ ସାମଗ୍ରୀ ଜବତ କରାଯାଇଛି । ଆମ ବସ ଓ ଜନଗହଳି ପୂର୍ଣ୍ଣ ଜାଗାରେ ସେମାନେ ଲୁଟପାଟ କରୁଥିଲେ । କିଛି ଦିନ ତଳେ କମିସନରେଟ ପୋଲିସ ହାତରେ ଧରାପଡ଼ିଥିଲେ ମହିଳା ବଞ୍ଜରା ଗ୍ୟାଙ୍ଗ । ରାଜଧାନୀରେ ରଥଯାତ୍ରା ଭିଡ଼ ଭିତରେ କରୁଥିଲେ ଲୁଟପାଟ । ୮ ଜଣିଆ ମହିଳା ବଞ୍ଜରା ଗ୍ୟାଙ୍ଗକୁ କାବୁ କରିଥିଲା ନୟାପଲ୍ଲୀ ଥାନା ପୋଲିସ । ସେମାନଙ୍କ ନିକଟରୁ ଲୁଟ୍‌ ସାମଗ୍ରୀ ଜବତ ହୋଇଥିଲା ।

ପଢନ୍ତୁ ଏହି ଖବର: 

ରାଜଧାନୀରେ ବଡଧରଣର ମୋବାଇଲ୍ ଲୁଟେରା ଗ୍ୟାଙ୍ଗକୁ ବି ଗିରଫ କରାଯାଇଛି । ଏହି ଲୁଟେରା ମାନେ ଭିଡ ସମୟରେ ମୋବାଇଲ ନେଇ ଚମ୍ପଟ ମାରୁଥିଲେ । ବିଭିନ୍ନ ଥାନା ଅଧୀନରେ ଚାଲିଥିବା ଏକ ବଡ଼ ଅପରେସନରେ ୧୦୦ରୁ ଅଧିକ ଚୋରି ଫୋନ୍ ଜବତ କରାଯାଇଛି । ପୋଲିସ କମିଶନର ଅଫିସରେ ଅସଲି ମାଲିକମାନଙ୍କୁ ଚିହ୍ନଟ କରାଯାଇ ସେମାନଙ୍କ ଫୋନ୍ ଫେରସ୍ତ କରାଯାଉଛି ।