ଫୁଲବାଣୀ (କନ୍ଧମାଳ): ଦେଶୀ ବନ୍ଧୁକରୁ ଫୁଟିଲା ଗୁଳି, ଗଡ଼ିଲା ମୁଣ୍ଡ । ରାସ୍ତାରେ ଯାଉଥିବା ଦମ୍ପତିଙ୍କ ଉପରେ ପ୍ରଥମେ ଗୁଳିମାଡ଼ କଲା । ତଥାପି ମନ ବୁଝିଲାନି, ଘରକୁ ଆସି ସ୍ତ୍ରୀ ଉପରେ ମଧ୍ୟ ଗୁଳି ଚଳାଇଲା । ଦେଶୀ ବନ୍ଧୁକ ଧରି ଏଭଳି ଆତଙ୍କ ଖେଳାଇ ଦେଇଛନ୍ତି ବିରଞ୍ଚି ।

କନ୍ଧମାଳ ଜିଲ୍ଲା ଗୋଛାପଡ଼ା ଥାନା ଏଞ୍ଚଳରେ ଏଭଳି ଗୁଳିମାଡ଼ ହୋଇଛି । ଗୋଛାପଡ଼ା ଥାନାର କଟାପଙ୍ଗା ଗାଁରେ ସ୍ଵାମୀ ବିରଞ୍ଚି ବେହେରାଙ୍କ ଗୁଳିମାଡ଼ରେ ଆଖି ବୁଜିଛି ସ୍ତ୍ରୀ । କେବଳ ସ୍ତ୍ରୀ ନିଳିମା ବେହେରାଙ୍କ ମୃତ୍ୟୁ ହୋଇନି । ବିରଞ୍ଚି ରକ୍ତମୁଖା ହୋଇ ରାସ୍ତାରେ ଯାଉଥିବା ଦମ୍ପତିଙ୍କ ଉପରେ ଗୁଳିମାଡ଼ କରିଛନ୍ତି ।

ଏଥିସହ ପଢ଼ନ୍ତୁ: ନାବାଳିକା ଅପହରଣ ମାମଲାରେ ଉଠାଇ ନେଇଥିଲା ପୋଲିସ, ସକାଳୁ ମିଳିଲା ମୃତଦେହ

ସୌଭାଗ୍ୟକୁ ରାସ୍ତାରେ ଯାଉଥିବା ପୁରୁଷଙ୍କ ଦେହରେ ଗୁଳି ବାଜିଥିବା ବେଳେ ଅଳ୍ପକେ ବର୍ତ୍ତି ଯାଇଛନ୍ତି ତାଙ୍କ ପତ୍ନୀ । ଗୁରୁତର ଅବସ୍ଥାରେ ନରୋତ୍ତମଙ୍କୁ ଫୁଲବାଣୀ ମେଡିକାଲ୍‌ରେ ଭର୍ତ୍ତି କରାଯାଇଛି । ସକାଳ ପ୍ରାୟ ୯ଟା ସମୟରେ ଏହି ଗୁଳିକାଣ୍ଡ ଘଟିଛି । ଗୁଳିମାଡ଼ କରିଥିବା ବିରଞ୍ଚି ବେହେରାକୁ ଗୋଛାପଡ଼ା ପୋଲିସ ଥାନାରେ ଅଟକ ରଖି ପଚରାଉଚରା କରୁଛି ।

କଟାପଙ୍ଗା ଗାଁ ଠାରୁ ପ୍ରାୟ ଗୋଟିଏ କିଲୋମିଟର ଦୂର ବଗାରମୁଣ୍ଡା ନିକଟରେ ବିରଞ୍ଚି ପ୍ରଥମେ ନରୋତ୍ତମ ବେହେରାଙ୍କ ଉପରକୁ ଗୁଳିମାଡ଼ କରିଥିଲା । ନରୋତ୍ତମଙ୍କ ଉପରକୁ ଗୁଳିମାଡ଼ ପରେ ଘରକୁ ଆସିଥିଲା ବିରଞ୍ଚି । ଆଉ ଘରେ ପହଞ୍ଚି ସ୍ତ୍ରୀ ନିଳିମାକୁ ଗୁଳି କରି ହତ୍ୟା କରିଛି ।

ଏଥିସହ ପଢ଼ନ୍ତୁ: ରାଜଧାନୀରେ ଲଭ୍ ଜିହାଦ୍ ! ଜୟରାମ ଶର୍ମା ପରିଚୟ ଦେଇ ହିନ୍ଦୁ ଝିଅଙ୍କୁ ଫସାଉଥିଲା ଇରଫାନ

ତେବେ ବିରଞ୍ଚି ହଠାତ୍ କାହିଁକି ଗୁଳିମାଡ଼ କଲା ? ନରୋତ୍ତମଙ୍କୁ ରାସ୍ତାରେ ଗୁଳିମାଡ଼ର କାରଣ କ'ଣ ? ପୂର୍ବ ଶତ୍ରୁତା ନା ଅନ୍ୟ କାରଣରୁ ଗୁଳି କଲା ? ନରୋତ୍ତମଙ୍କ ପରେ ସ୍ତ୍ରୀ ନିଳିମାଙ୍କୁ କାହିଁକି ଟାର୍ଗେଟ୍ କଲା ସ୍ଵାମୀ ବିରଞ୍ଚି ? ଗୁଳିମାଡ଼ ପରେ ଏଭଳି ଅନେକ ପ୍ରଶ୍ନ ଉଠିଛି ।