କେନ୍ଦ୍ରାପଡ଼ା: ରାତି ସହ ଶୀତ ବଢ଼ୁଥିଲା । ନିଘୋଡ଼ ନିଦରେ ଶୋଇଥିଲା ସହର । ସବୁ ଦିନ ଭଳି ଦୋକାନ ବନ୍ଦ କରି ସେଇଠି ଶୋଇ ପଡ଼ିଥିଲେ ପରିବା ବ୍ୟବସାୟୀ ସୁବାସ ମଲ୍ଲିକ । ଆଉ ବିଳମ୍ବିତ ରାତିରେ ହଠାତ୍ ଜଳିବାକୁ ଲାଗିଲା ଦୋକାନ । ସେହି ନିଆଁରେ ଜୀବନ୍ତ ଦଗ୍ଧ ହୋଇଗଲେ ସୁବାସ ।

ଦୋକାନ ବାହାରୁ କେହି ଦୁର୍ବୃତ୍ତ ତାଲା ପକାଇ ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲ୍ଲା କୁଦାନଗରୀ ଥାନା ଗୋବିନ୍ଦପୁରରେ । ମନ୍ଦିରକୁ ଲାଗି ସୁବାସଙ୍କ ପରିବା ଦୋକାନ ରହିଥିଲା । ଅଗ୍ନିକାଣ୍ଡରେ ସୁବାସ ଜୀବନ୍ତ ଦଗ୍ଧ ହୋଇ ଯାଇଥିବା ବେଳେ ସବୁକିଛି ପୋଡ଼ି ନଷ୍ଟ ହୋଇ ଯାଇଛି ।

ଏଥିସହ ପଢ଼ନ୍ତୁ: ଜାଡ଼ରେ ଥରୁଛି କୋରାପୁଟ: ଲୋକଙ୍କ ହାଲ୍ ବେହାଲ୍

ତେବେ ବିଳମ୍ବିତ ରାତିରେ କିଏ ଦୋକାନ ବାହାରୁ ତାଲା ପକାଇ ନିଆଁ ଲଗାଇଲା ? ପୂର୍ବ ଶତ୍ରୁତାକୁ ନେଇ କେହି ନିଆଁ ଲଗାଇ ସୁବାସଙ୍କୁ ପୋଡ଼ି ମାରି ଦେଇଥିବା ସନ୍ଦେହ କରାଯାଉଛି । ସୁବାସଙ୍କ ମୃତ୍ୟୁ ପରେ ସେଠାରେ ଉତ୍ତେଜନା ଲାଗି ରହିଛି । ଉତ୍ତ୍ୟକ୍ତ ଲୋକେ ଟାୟାର୍ ଜାଳି ରାସ୍ତା ଅବରୋଧ କରିଛନ୍ତି । କୁଦାନଗରୀ ଥାନା ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରୁଛି ।

ସୁବାସଙ୍କ ସମ୍ପର୍କୀୟଙ୍କ ଅଭିଯୋଗ ଅନୁସାରେ, "ଗୋବିନ୍ଦପୁର ବଜାରରେ କିଛି ଲୋକ ସୁବାସଙ୍କ ସହ ଅନେକ ସମୟରେ ଲାଗନ୍ତି । ରାତିରେ ନିଆଁ ଲାଗିଥିବା ବେଳେ ଦୋକାନ ବାହାରୁ ତାଲା ଦିଆ ଯାଇଥିଲା । ତେଣୁ କେହି ପୂର୍ବ ଶତ୍ରୁତାକୁ ନେଇ ନିଆଁ ଲଗାଇ ସୁବାସଙ୍କୁ ମାରି ଦେଇଛନ୍ତି ।"

ଏଥିସହ ପଢ଼ନ୍ତୁ: ଘର ଛାଡ଼ିଦେବେ କହି ଚଳନ୍ତା କାର୍‌ରେ ଗଣଦୁଷ୍କର୍ମ ! ବନ୍ଧାହେଲେ IT କମ୍ପାନୀର CEO

ପୋଲିସ କହିଛି, "କେମିତି ନିଆଁ ଲାଗିଛି ଅନୁଧ୍ୟାନ କରାଯାଉଛି । ତଦନ୍ତ ପରେ ସ୍ପଷ୍ଟ ହେବ ନିଆଁ କେହି ଲଗାଇଛି ନା ସର୍ଟସର୍କିଟରୁ ଅଗ୍ନିକାଣ୍ଡ ହୋଇଛି । ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି । ପରିବାର ଲୋକଙ୍କ ଅଭିଯୋଗ ଆଧାରରେ ସବୁ ଦିଗକୁ ନେଇ ତଦନ୍ତ କରାଯିବ । ସାଇଣ୍ଟିଫିକ୍ ଟିମ୍ ଆସୁଛି ତଦନ୍ତରେ ସହଯୋଗ କରିବ ।"