ଚମ୍ପୁଆ (କେନ୍ଦୁଝର): ପ୍ରେମ କରୁଥିଲେ, ହେଲେ ବିଶ୍ଵାସ ନଥିଲା । ଆଉ ସନ୍ଦେହକୁ ବଳ ଦେଲା ପ୍ରେମିକାଙ୍କ ଇନଷ୍ଟାଗ୍ରାମ ଭିଡିଓ । ଶେଷରେ ସନ୍ଦେହରୁ ପ୍ରତିଶୋଧର ସୂତ୍ରପାତ ହେଲା । ଛଳନାରେ ପ୍ରେମିକାକୁ ଭେଟିବାକୁ ଡାକି ପ୍ରେମିକ ଛୁରିରେ କାଟି ଦେଲା ତଣ୍ଟି । ପ୍ରେମରୁ ପ୍ରତିଶୋଧର ଏଭଳି ଲୋମଟାଙ୍କୁରା ଘଟଣା ଦେଖିବାକୁ ମିଳିଛି କେନ୍ଦୁଝରରେ ।

ହତ୍ୟାର ୨୬ ଦିନ ପରେ ଘଞ୍ଚ ଜଙ୍ଗଲରୁ ମିଳିଛି ଯୁବତୀଙ୍କ କଙ୍କାଳ । ପ୍ରେମିକାଙ୍କୁ ହତ୍ୟା ପରେ ମୃତଦେହକୁ ପ୍ରେମିକ ବାଇକ୍‌ରେ ୫ କିଲୋମିଟର ଦୂର ଜଙ୍ଗଲକୁ ନେଇ ପୋତି ଦେଇଥିଲା । ପ୍ରେମିକା ଅନ୍ୟ ଜଣଙ୍କ ସହ ସମ୍ପର୍କରେ ଥିବା ସନ୍ଦେହ କରି ହତ୍ୟା କରିଥିବା ପୋଲିସ ଆଗରେ ମାନିଛି ଅଭିଯୁକ୍ତ ପ୍ରେମିକ ।

ସନ୍ଦେହରୁ ପ୍ରେମିକାକୁ ହତ୍ୟା

ସୂଚନା ଅନୁସାରେ, ବଡ଼ବିଲ ଥାନା ଭଦ୍ରାସାହି ପଞ୍ଚାୟତ ଝାଡ଼ଗାଁ ଦୁମ୍ବି ସାହିର ପ୍ରମିଳା ମହାକୁଡ଼ଙ୍କ ସାନ ଝିଅ ଅନୀତା ମହାକୁଡ଼ ଗତ ମେ ମାସ ୧୧ ତାରିଖ ଅପରାହ୍ଣରୁ ନିଖୋଜ ହୋଇ ଯାଇଥିଲେ । ହେଲେ ଘରେ ଛାଡ଼ି ଦେଇଥିଲେ ଫୋନ୍ । ଅନୀତାଙ୍କ ମାଆ ଓ ଭଉଣୀ ତାଙ୍କୁ ଖୋଜାଖୋଜି ପରେ ପାଇ ଥିଲେ ।

ଏଥିସହ ପଢ଼ନ୍ତୁ: ଡାକ୍ତରୀ ଛାତ୍ରୀ ଚନ୍ଦ୍ରିକାଙ୍କ ହତ୍ୟା ଗୁମର ଖୋଲିବ ମୋବାଇଲ୍ ଓ ଡାକ୍ତରୀ ପ୍ରେସକ୍ରିପସନ୍‌ 

ଘରୁ ମିଳିଥିଲା ଅନୀତାଙ୍କ ମୋବାଇଲ୍ । ଫୋନ୍ ଚେକ୍ କରୁ କରୁ ଶେଷ କଲ୍ ସେହି ଗାଁର ସଂଗ୍ରାମ ଆଲଦାଙ୍କ ଥିଲା । ଯାହା ପରେ ଘର ଲୋକେ ସଂଗ୍ରାମକୁ ଡାକି ପଚରାଉଚରା କରିଥିଲେ । ମାତ୍ର ସଂଗ୍ରାମ କିଛି ଜାଣି ନଥିବା କହିଥିଲା । ଘଟଣାର ୩ ଦିନ ପରେ ବି ଅନୀତାଙ୍କ ଖବର ନ ମିଳିବାରୁ ପରିବାର ଲୋକେ ବଡ଼ବିଲ ଥାନାର ଦ୍ବାରସ୍ଥ ହୋଇଥିଲେ ।

ଅଭିଯୋଗ ପରେ ଚୁପ୍ ରହିଲା ପୋଲିସ !

ଝିଅ ନିଖୋଜ ହେବା ନେଇ ମାଆ ପ୍ରମିଳା ମହାକୁଡ଼ ବଡ଼ବିଲ ଥାନାରେ ଅଭିଯୋଗ କରିଥିଲେ । ମାତ୍ର ପୋଲିସ ଆବଶ୍ୟକ ପଦକ୍ଷେପ ନେଇ ନଥିଲା । ଫଳରେ ଶନିବାର କେନ୍ଦୁଝର ଏସ୍‌ପିଙ୍କ ଗୁହାରି କରିଥିଲେ ପରିବାର ଲୋକେ ।

ଏସ୍‌ପିଙ୍କୁ ଭେଟିବା ପରେ ବଡ଼ବିଲ ଥାନା ପୋଲିସ ଗୁରୁତ୍ଵ ଦେଇ ତଦନ୍ତ କରିଥିଲା । ଅନୀତାଙ୍କୁ ହତ୍ୟା ଅଭିଯୋଗରେ ଅଭିଯୁକ୍ତ ପ୍ରେମିକ ସଂଗ୍ରାମ ଆଲଦାକୁ ଗିରଫ କରିବା ପରେ ପୂରା ଘଟଣା ଉପରୁ ପରଦା ହଟିଛି । ସାମ୍ନାକୁ ଆସିଛି ପ୍ରେମିକାଙ୍କ ଇନଷ୍ଟା ଭିଡିଓରୁ ହତ୍ୟାର ପୂରା କାହାଣୀ ।

ରବିବାର ଅଭିଯୁକ୍ତ ସଂଗ୍ରାମକୁ ନେଇ ପୂରା ଘଟଣାର ସିନ୍ ରିକ୍ରିଏସନ କରିଛି ପୋଲିସ । ହତ୍ୟା କରିଥିବା ସ୍ଥାନ ଓ ବାଇକରେ ମୃତଦେହକୁ ନେଇ ୫ କିମି ଦୂର ରଇଡ଼ା ସିଦ୍ଧମଠ ସଂରକ୍ଷିତ ଜଙ୍ଗଲରେ ପୋତିଥିବା ସ୍ଥାନ ଦେଖାଇଛି ଅଭିଯୁକ୍ତ । ଘଟଣାରେ ବ୍ୟବହୃତ ବାଇକ୍, ଜଙ୍ଗଲରେ ଲୁଚାଇଥିବା ଯୁବତୀଙ୍କ ଚୁନି, ଚପଲ, ଧାରୁଆ ଅସ୍ତ୍ର ଓ ଅନ୍ୟାନ୍ୟ ସାମଗ୍ରୀ ପୋଲିସ ଜବତ କରିଛି ।

ମାଜିଷ୍ଟ୍ରେଟ୍ ତଥା ତହସିଲଦାରଙ୍କ ଉପସ୍ଥିତିରେ ଘଞ୍ଚ ଜଙ୍ଗଲ ମଧ୍ୟରେ ଥିବା ଏକ ଗାତରୁ ଅନୀତାଙ୍କ କଙ୍କାଳ ଉଦ୍ଧାର କରାଯାଇଛି । ପୋଲିସ ଅନୁସାରେ, ସଂଗ୍ରାମ ଏବଂ ଅନିତାଙ୍କ ମଧ୍ୟରେ ଅନେକ ଦିନରୁ ପ୍ରେମ ସମ୍ପର୍କ ରହିଥିଲା ଏବଂ ସଂଗ୍ରାମ ଅନିତାଙ୍କୁ ଭଲ ପାଉଥିଲେ ।

ଇନଷ୍ଟା ଭିଡିଓରୁ ରାଗ, ହତ୍ୟା

ଗତ ୩ରୁ ୪ ମାସ ହେବ ସଂଗ୍ରାମ ବାହରକୁ ଯାଇଥିବା ବେଳେ ଅନୀତା ଅନ୍ୟ ଜଣେ ଯୁବକଙ୍କୁ ପ୍ରେମ କରୁଥିବା ସନ୍ଦେହ କରିଥିଲେ ସଂଗ୍ରାମ । ଅନ୍ୟ ଜଣେ ଯୁବକଙ୍କ ସହ ଅନୀତାଙ୍କ କିଛି ଫଟୋ ଓ ଭିଡିଓ ଇନଷ୍ଟାଗ୍ରାମରେ ଦେଖିବା ପରେ ରାଗି ଯାଇଥିଲା ସଂଗ୍ରାମ ।

ଏଥିସହ ପଢ଼ନ୍ତୁ: ପ୍ରେମ, ବ୍ରେକଅପ୍‌, ପ୍ରତିଶୋଧ; ପ୍ରେମିକାର ଅଫିସରେ ପଶି ହତ୍ୟା, ଦେଖନ୍ତୁ ଛାତିଥରା ଭିଡିଓ 

ଶେଷରେ ଅନୀତାକୁ ହତ୍ୟା ପାଇଁ ସଂଗ୍ରାମ ଯୋଜନା କରିଥିଲା । ମେ ୧୧ ତାରିଖରେ ଅନୀତାକୁ ଦେଖା କରିବା ପାଇଁ ଡାକିଥିଲା । ଘର ଠାରୁ ପ୍ରାୟ ଅଧ କିମି ଦୂର ଫୁଟବଲ୍ ପଡ଼ିଆ ପାଖରେ ଥିବା ଏକ କେନ୍ଦୁଗଛ ନିକଟରେ ଉଭୟ ଭେଟିଥିଲେ ।

ଆଉ ସେହିଠାରେ ହିଁ ଯୋଜନା ମୁତାବକ ସାଥିରେ ନେଇଥିବା ଏକ ଛୁରିରେ ଅନୀତାର ତଣ୍ଟି କାଟି ଦେଇଥିଲା ସଂଗ୍ରାମ । ମାତ୍ର କିଛି ସମୟ ମଧ୍ୟରେ ଅନୀତାର ମୃତ୍ୟୁ ହୋଇଥିଲା । ଏହାପରେ ପ୍ରମାଣ ଲୁଚାଇବାକୁ ମୃତଦେହକୁ ବାଇକ୍‌ରେ ରଇଡ଼ା ସ୍ଥିତ ସିଦ୍ଧମଠ ସଂରକ୍ଷିତ ଜଙ୍ଗଲକୁ ନେଇ ଏକ ଗାତରେ ଫିଙ୍ଗି ଦେଇଥିଲା ।