ବଢ଼ିଚାଲିଛି ପ୍ରସିଦ୍ଧ ୟୁଟ୍ୟୁବ ଶିକ୍ଷକ ତଥା ଖାନ ଗ୍ଲୋବାଲ ଷ୍ଟଡିଜର ପ୍ରତିଷ୍ଠାତା ଖାନ ସାର ଓରଫ ଫୈସଲ ଖାନଙ୍କ ଅଡୁଆ । ୨ ଜୁନ ରାତିରେ ପାଟନା ସ୍ଥିତ ‘ଖାନ୍ ଗ୍ଲୋବାଲ୍ ଷ୍ଟଡିଜ୍’ କୋଚିଂ ସେଣ୍ଟର ଉପରେ ହୋଇଥିବା ଆକ୍ରମଣ ଓ ଗୁଳିକାଣ୍ଡ ଘଟଣା ଏବେ ଏକ ନୂଆ ମୋଡ଼ ନେଇଛି । ପୋଲିସ କାଉଣ୍ଟରରେ ଖାନ୍ ସାର୍‌ଙ୍କ ବିରୋଧରେ ହତ୍ୟା ଉଦ୍ୟମ ଏବଂ ଆର୍ମସ ଆକ୍ଟ ଭଳି ସଙ୍ଗିନ ଦଫା ଲଗାଇଛି । ଗାର୍ଡଙ୍କ ବୟାନ ଆଧାରରେ ରୁଜୁ ହୋଇଛି ମାମଲା ।

ଗାର୍ଡଙ୍କ କହିବା କଥା, ଖାନ୍ ସାର୍‌ଙ୍କ ନିର୍ଦ୍ଦେଶ ପରେ ହିଁ ସେମାନେ ଗୁଳି ଚଳାଇଥିଲେ । ଯାହା ପରେ ଏବେ ଖାନ ସାର ଗିରଫ ହେବା ନେଇ ଚର୍ଚ୍ଚା ଜୋର୍ ଧରିଛି । ସେପଟେ ଏହି ଚର୍ଚ୍ଚାକୁ ଆହୁରି ବଳ ଯୋଗାଇଛି ପାଟଣା ପୋଲିସର ଟ୍ବିଟ୍ । ଯେଉଁଥିରେ ଘଟଣା ସମ୍ପର୍କରେ ସୂଚନା ଦିଆଯିବା ସହ ଆଇନ ଖିଲାପକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବା ନେଇ ସୂଚନା ରହିଛି ।

• ରାତି ସାରା ପୋଲିସର ଚଢାଉ

ପାଟନା ପୋଲିସ ଖାନ ସାରଙ୍କୁ ଖୋଜିବା ଏବଂ ମାମଲାର ତଦନ୍ତ କରିବା ପାଇଁ ତିନୋଟି ସ୍ୱତନ୍ତ୍ର ଦଳ ଗଠନ କରିଛି । ଏହି ପୋଲିସ ଦଳଗୁଡ଼ିକ ଶୁକ୍ରବାର ରାତି ସାରା ଖାନ ସାରଙ୍କ ସମ୍ଭାବ୍ୟ ଆଡ୍ଡା ଏବଂ ମୁସଲ୍ଲାହପୁର ଅଞ୍ଚଳରେ ବଡ଼ ଧରଣର ଚଢାଉ କରିଥିଲେ । ତଥାପି ଏହି ସାରା ରାତିର ଅପରେସନ ସତ୍ତ୍ୱେ ପୋଲିସ ହାତ ଖାଲି । ଖାନ ସାରଙ୍କ କୌଣସି ସନ୍ଧାନ ମିଳିନାହିଁ । କୁହାଯାଉଛି ଗିରଫଦାରୀ ଭୟରେ ଖାନ ସାର୍ ଚୁପଚାପ୍ ତାଙ୍କ କୋଚିଂ ସେଣ୍ଟରରୁ ପଳାଇ ଯାଇଛନ୍ତି ।

• ସୋମବାର କୋର୍ଟରେ ଆତ୍ମସମର୍ପଣ ଚର୍ଚ୍ଚା

ଖାନ୍ ସାରଙ୍କ ଗିରଫଦାରୀ ସମ୍ପର୍କରେ କଳ୍ପନାଜଳ୍ପନା ମଧ୍ୟରେ ଆଇନଗତ ମହଲରେ ଏକ ନୂତନ ଆଲୋଚନା ଜୋର ଧରିଛି । କୁହାଯାଉଛି ଯେ ଖାନ୍ ସାର ଶନିବାର କିମ୍ବା ରବିବାର ପୋଲିସ ବା କୋର୍ଟରେ ଆତ୍ମସମର୍ପଣ କରିବେ ନାହିଁ । ଏହାର ମୁଖ୍ୟ କାରଣ ହେଉଛି ଯଦି ତାଙ୍କୁ ଶନିବାର କିମ୍ବା ରବିବାର ଗିରଫ କରାଯାଏ, ତେବେ କୋର୍ଟ ବନ୍ଦ ଥିବାରୁ ସେ ଅତି କମରେ ଦୁଇ ଦିନ ଜେଲରେ ରହିପାରନ୍ତି । ତେଣୁ ଆଇନ ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଖାନ୍ ସାର ସୋମବାର ଦିନ ସିଧାସଳଖ ଦାନାପୁର କିମ୍ବା ପାଟନା କୋର୍ଟରେ ଆତ୍ମସମର୍ପଣ କରି ଜାମିନ ପାଇଁ ଆବେଦନ କରିପାରନ୍ତି।

• କଣ ପୂରା ଘଟଣା ?

ଜୁନ ୨ ତାରିଖ ରାତିରେ ପାଟଣାର ଦୁଇ ଗୋଷ୍ଠୀ ଭିତରେ ହୋଇଥିବା ବିବାଦ ବାସ୍ତବରେ ଦୁଇ କୋଚିଂ ସେଣ୍ଟର ଭିତରେ ଲାଗି ରହିଥିବା ତିକ୍ତତାର ଥିଲା ପ୍ରତିଫଳନ । ଗୋଟିଏ ପଟେ ଖାନ ଗ୍ଲୋବାଲ ଷ୍ଟଡିଜ୍ ଏବଂ ଅନ୍ୟପଟେ ଜ୍ଞାନ ବିନ୍ଦୁ କୋଚିଂ ସେଣ୍ଟର । କୁହାଯାଉଛି ଜ୍ଞାନ ବିନ୍ଦୁର ବୋର୍ଡ ଉପରେ ଖାନ ସାରଙ୍କ କୋଚିଂ ସେଣ୍ଟର ପୋଷ୍ଟର ମାରିବା ଘଟଣା ପରେ ବିବାଦ ତେଜିଥିଲା । ଜ୍ଞାନବିନ୍ଦୁ କୋଚିଂ ସେଣ୍ଟରର ଲୋକେ ଏକାଡେମୀର ପୋଷ୍ଟର ଚିରିବା ସହ ତାଙ୍କ ସୁରକ୍ଷାକର୍ମୀଙ୍କୁ ମାରି ଲହୁଲୁହାଣ କରିଥିବାର ଅଭିଯୋଗ ଆଣିଥିଲେ ଖାନ ସାର୍ । ଏମିତିକି ତାଙ୍କ କୋଚିଂ ସେଣ୍ଟର ଉପରକୁ ଫାୟାରିଂ ମଧ୍ୟ କରାଯାଇଥିବାର ସେ ଅଭିଯୋଗ ଆଣିଥିଲେ । ହେଲେ ତଦନ୍ତ ପରେ ଫାୟାରିଂ ହୋଇନଥିବା ସ୍ପଷ୍ଟ କରିଥିଲା ପୋଲିସ ।

#WATCH | Bihar: Heavy Police deployment outside Khan Sir's coaching centre in Patna. pic.twitter.com/B9sP4x5wLg

— ANI (@ANI) June 5, 2026

• ଖାନ୍ ସାରଙ୍କ କୋଚିଂ ସେଣ୍ଟର ଗାର୍ଡ ଗିରଫ

ପରେ ଖାନ ସାରଙ୍କ ଅଭିଯୋଗ ଆଧାରରେ ଜ୍ଞାନ ବିନ୍ଦୁ କୋଚିଂ ସେଣ୍ଟର ନିର୍ଦ୍ଦେଶକ ରୌଶନ ଆନନ୍ଦଙ୍କୁ ଗିରଫ କରାଯାଇଥିଲା । ଏହାପରେ ସୋସିଆଲ ମିଡିଆରେ ଭାଇରାଲ ଏକ ଭିଡିଓ ବଦଳାଇ ଦେଇଥିଲା ତଦନ୍ତର ଦିଗ । ଘଟଣା ଦିନ ଫାୟାରିଂର ଅଭିଯୋଗ ଆଣିଥିବା ଖାନ ସାରଙ୍କ ଦୁଇ ସୁରକ୍ଷା କର୍ମୀ ହିଁ ବ୍ଲାଙ୍କ ଫାୟାରିଂ କରୁଥିବାର ଭାଇରାଲ ଭିଡିଓରେ ଦେଖିବାକୁ ମିଳିଥିଲା । ଯାହା ପରେ ପୋଲିସ ଉଭୟ ସୁରକ୍ଷାକର୍ମୀଙ୍କୁ ଗିରଫ କରି ହେପାଜତକୁ ନେଇଛି । ପଚରାଉଚରାରୁ ସ୍ପଷ୍ଟ ହୋଇଛି ଯେ ଖାନ ସାରଙ୍କ ନିର୍ଦ୍ଦେଶ ପରେ ହିଁ ସେ ଗୁଳି ଚାଳନା କରିଥିଲେ । ଯାହାପରେ ପୋଲିସ ଖାନ ସାରଙ୍କ ବିରୋଧରେ BNSର ଧାରା ୧୦୯ ଆଧାରରେ ହତ୍ୟା ଉଦ୍ୟମ ସହ ଆର୍ମ୍ସ ଆକ୍ଟରେ ମାମଲା ରୁଜୁ କରିଥିବା ସୂଚନା ମିଳିଛି। ସେପଟେ ରୌଶନ ଆନନ୍ଦଙ୍କ ସମର୍ଥନରେ ରାସ୍ତାକୁ ଓହ୍ଲାଇଛନ୍ତି ଜ୍ଞାନ ବିନ୍ଦୁ କୋଚିଂ ସେଣ୍ଟର ଛାତ୍ରଛାତ୍ରୀ ।

ପଢନ୍ତୁ ଏହି ଖବର: କେତେ ସମ୍ପତ୍ତିର ମାଲିକ ଖାନ୍ ସାର ? ଦିନେ ବସ୍ ଭଡ଼ା ପାଇଁ ନଥିଲା ଟଙ୍କା, ଆଜି କୋଟିପତି

• କଥା ବଦଳାଇବା ପରେ ବିବାଦରେ ଖାନ୍ ସାର

ଘଟଣାରେ ଖାନ ସାରଙ୍କ ଆଭିମୁଖ୍ୟ ଏବେ ସବୁଠୁ ବଡ଼ ବିବାଦ ସୃଷ୍ଟି କରିଛି । ପ୍ରଥମରୁ ନିଜ କଥା ବଦଳାଇ ଚାଲିଛନ୍ତି ଫୈସଲ ଖାନ ବା ଖାନ୍ ସାର୍ । ପ୍ରଥମେ ତାଙ୍କ କୋଚିଂ ସେଣ୍ଟର ଉପରକୁ ଗୁଳିମାଡ଼ର ଅଭିଯୋଗ ଆଣୁଥିଲେ । ଯେଉଁ ମିଛର ପୋଲ୍ ଖୋଲି ଦେଇଥିଲା ପୋଲିସ । ଏହାପରେ ଯେବେ ତାଙ୍କ ସୁରକ୍ଷା କର୍ମୀଙ୍କ ଭିଡିଓ ଭାଇରାଲ ହେଲା ସେବେ ଏହାକୁ ଆତ୍ମରକ୍ଷା ପାଇଁ ପଦକ୍ଷେପ କହି ମାମଲାକୁ ନୂଆ ଦିଗ ଦେବାକୁ ଚେଷ୍ଟା କରିଥିଲେ । ଉତ୍ତେଜନା ବେଳେ ବନ୍ଧୁକ ଚାଳନା କରି ଏକ ପ୍ରକାର ଫସି ଯାଇଛନ୍ତି ଖାନ୍ ସାର୍ । ତାଙ୍କୁ ଗିରଫ କରିବାକୁ ପୋଲିସ ଏକ ସ୍ବତନ୍ତ୍ର ଟିମ୍ ଗଢ଼ିଛି । ତାଙ୍କୁ ଯେକୌଣସି ସମୟରେ ଗିରଫ କରାଯାଇପାରେ ।