ଜ୍ଞାନ ବିନ୍ଦୁ ପ୍ରତିଷ୍ଠାନର ନିର୍ଦ୍ଦେଶକ ରୋଶନ ଆନନ୍ଦ କଦମକୁଆନ ପୋଲିସ ଷ୍ଟେସନରେ ଖାନ ସାରଙ୍କ ବିରୁଦ୍ଧରେ ଏଫଆଇଆର ପଞ୍ଜିକରଣ ପାଇଁ ଆବେଦନ କରିବା ପରେ ପାଟନାରେ ଏକ ନୂତନ ବିବାଦ ଦେଖାଦେଇଛି । ରୋଶନ ଆନନ୍ଦ ଅଭିଯୋଗ କରିଛନ୍ତି ଯେ ଆବେଦନ ଦାଖଲ କରିବା ସତ୍ତ୍ୱେ ପୋଲିସ ଏଫଆଇଆର ପଞ୍ଜିକୃତ କରିନାହିଁ । ପୋଲିସର ମାମଲା ପରିଚାଳନା ଉପରେ ପ୍ରଶ୍ନ ଉଠାଇ ସେ ଦାବି କରିଛନ୍ତି ଯେ ଅଭିଯୋଗ ଦାଖଲ ହେବାର କିଛି ଘଣ୍ଟା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ।

ଗଣମାଧ୍ୟମ ସହିତ କଥାବାର୍ତ୍ତା ସମୟରେ ଆନନ୍ଦ ଏହି ବିଳମ୍ବ ଉପରେ ଅସନ୍ତୋଷ ପ୍ରକାଶ କରି କହିଥିଲେ, 'ମୋତେ ହତ୍ୟା କର ନଚେତ୍ ଖାନ ସାରଙ୍କ ବିରୋଧରେ ଏଫଆଇଆର ରୁଜୁ କର।' ସେପଟେ ରୋଶନ ଆନନ୍ଦଙ୍କ ସମର୍ଥନରେ ବହୁ ସଂଖ୍ୟକ ଛାତ୍ର କଦମକୁଆନ ପୋଲିସ ଷ୍ଟେସନରେ ଏକତ୍ରିତ ହୋଇଥିଲେ ଏବଂ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରି ପ୍ରତିବାଦ କରିଥିଲେ । ଗଣମାଧ୍ୟମ ସହ କଥାବାର୍ତ୍ତା କରି ରୋଶନ ଆନନ୍ଦ କହିଛନ୍ତି ଯେ ମୋତେ ଏକ ଷଡ଼ଯନ୍ତ୍ରର ଅଂଶ ଭାବରେ ଜେଲ ପଠାଯାଇ ମୋ ଭାଇକୁ ହତ୍ୟା କରାଯାଇଥିଲା । କାହାର ଚାପରେ ଏଫଆଇଆର ପଞ୍ଜିକୃତ କରାଯାଉନାହିଁ ବୋଲି ସେ ପ୍ରଶ୍ନ କରିଛନ୍ତି ।

• 'ପୋଲିସ ଆମକୁ ଗୁଳି କରିପାରେ, କିନ୍ତୁ ଆମେ ଏଠାରେ ବସିବୁ'

ଜ୍ଞାନ ବିନ୍ଦୁ କୋଚିଂର ନିର୍ଦ୍ଦେଶକ ରୋଶନ ଆନନ୍ଦ କହିଛନ୍ତି, "ଯଦି ଆଜି ଏଫଆଇଆର ରୁଜୁ ହୁଏ ନାହିଁ, ତେବେ ଆମେ ଏଠାରେ ବସିବୁ। ପାଟନା ପୋଲିସ ଆମକୁ ଗୁଳି କରିପାରେ, କିନ୍ତୁ ଆମେ ଏଠାରେ ବସିବୁ। ଉପରୁ ଚାପ ଯୋଗୁଁ ମୋର ଏଫଆଇଆର ପଞ୍ଜିକୃତ ହେଉନାହିଁ। ମୋତେ ସାରା ଭାରତରେ ଶିକ୍ଷକ ଏବଂ ଛାତ୍ରଙ୍କ ସମର୍ଥନ ଆବଶ୍ୟକ ।" ରୋଶନ କହିଛନ୍ତି ଯେ ଷ୍ଟେସନ ଇନଚାର୍ଜ ଏଫଆଇଆର ଦାଖଲ କରିବାକୁ ମନା କରିଥିଲେ। ସେ ଏସଏସପିଙ୍କୁ ଫୋନ୍ କରିଥିଲେ କିନ୍ତୁ ତାଙ୍କ ସହ କଥା ହୋଇପାରିଲେ ନାହିଁ।

• ଅଭିଯୋଗରେ ରୋଶନ କ'ଣ କହିଛନ୍ତି ?

ପ୍ରିନ୍ସ ଯାଦବଙ୍କ ଭାଇ ରୋଶନ ତାଙ୍କ ଅଭିଯୋଗରେ କହିଛନ୍ତି ଯେ ସେ ଦାବି କରୁନାହାଁନ୍ତି, କିନ୍ତୁ ସମ୍ପୂର୍ଣ୍ଣ ନିଶ୍ଚିତ ଯେ ଫୈସଲ ଖାନ ଓରଫ ଖାନ ସାର ଡକ୍ଟର ରାମଶଙ୍କର ପ୍ରସାଦ, କନହୈୟା କୁମାର ସିଂହ ଏବଂ ଅନ୍ୟମାନେ ତାଙ୍କ ଭାଇ ପ୍ରିନ୍ସଙ୍କୁ ହତ୍ୟା କରିବାକୁ ଷଡଯନ୍ତ୍ର କରିଥିଲେ । ରୋଶନ ଆନନ୍ଦ ଏହି ଅପରାଧୀମାନଙ୍କୁ ଗିରଫ ଏବଂ ଦଣ୍ଡ ଦେବାକୁ ଅନୁରୋଧ କରିଛନ୍ତି । ତାଙ୍କ ପରିବାରରକୁ ନ୍ୟାୟ ଦିଆଯାଉ ବୋଲି ସେ ଦାବି କରିଛନ୍ତି ।

• 'ପ୍ରିନ୍ସଙ୍କ ମୃତ୍ୟୁ ଏକ ଷଡ଼ଯନ୍ତ୍ର ଥିଲା'

ଜେଲରୁ ମୁକ୍ତ ହେବା ପରେ ରୋଶନ ଆନନ୍ଦ କହିଥିଲେ ଯେ ତାଙ୍କ ଭାଇ ପ୍ରିନ୍ସଙ୍କୁ ହତ୍ୟା କରାଯାଇଛି। ରୋଶନ ଖାନ୍ ସାର୍ ତାଙ୍କୁ ହତ୍ୟା କରିଥିବା ଅଭିଯୋଗ କରିଥିଲେ । ରୋଶନ ଦାବି କରିଛନ୍ତି ଯେ ଫୈସଲ ଖାନ (ଖାନ୍ ସାର୍) ତାଙ୍କ ଭାଇଙ୍କ ହତ୍ୟାର ଷଡ଼ଯନ୍ତ୍ର କରିଥିଲେ ଏବଂ ମୁଖ୍ୟ ଅଭିଯୁକ୍ତ ଫେରାର ଅଛନ୍ତି । ଜ୍ଞାନ ବିନ୍ଦୁ କୋଚିଂ ଇନଷ୍ଟିଚ୍ୟୁଟର ନିର୍ଦ୍ଦେଶକ ରୋଶନ ଆନନ୍ଦ ଅଭିଯୋଗ କରିଥିଲେ ଯେ ତାଙ୍କ ଭାଇ ପ୍ରିନ୍ସ ଯାଦବଙ୍କ ମୃତ୍ୟୁ ଦୁର୍ଘଟଣାଜନିତ ନୁହେଁ, ବରଂ ଏକ ସୁଚିନ୍ତିତ ଷଡ଼ଯନ୍ତ୍ରର ଅଂଶ ଥିଲା।

• କେମିତି ଘଟିଲା ପ୍ରିନ୍ସ ଯାଦବଙ୍କ ମୃତ୍ୟୁ ?

ରୋଶନ ଆନନ୍ଦଙ୍କ ଭାଇ ପ୍ରିନ୍ସ ଯାଦବଙ୍କର ତିନି ଦିନ ପୂର୍ବେ ନେପାଳର ଏକ ହୋଟେଲରେ ସନ୍ଦେହଜନକ ପରିସ୍ଥିତିରେ ମୃତ୍ୟୁ ହୋଇଥିଲା । ରବିବାର ନେପାଳର ବିରାଟନଗରର ଏକ ହୋଟେଲ ରୁମରୁ ତାଙ୍କ ମୃତଦେହ ମିଳିଥିଲା । ଏହା ସାମ୍ପ୍ରତିକ କୋଚିଂ ବିବାଦକୁ ଆହୁରି ତୀବ୍ର କରିଥିଲା । ଖାନ ସାରଙ୍କ କୋଚିଂ ସେଣ୍ଟରରେ ହୋଇଥିବା ଗୁଳିକାଣ୍ଡ ଘଟଣାରେ ପ୍ରିନ୍ସ ଯାଦବଙ୍କ ବିରୁଦ୍ଧରେ ପୂର୍ବରୁ ଅଭିଯୋଗ ହୋଇଥିଲା ।

ପଢନ୍ତୁ ଏହି ଖବର: କେତେ ସମ୍ପତ୍ତିର ମାଲିକ ଖାନ୍ ସାର ? ଦିନେ ବସ୍ ଭଡ଼ା ପାଇଁ ନଥିଲା ଟଙ୍କା, ଆଜି କୋଟିପତି

ରିପୋର୍ଟ ଅନୁସାରେ, ଜୁନ ୨ ତାରିଖରେ ଖାନ ଗ୍ଲୋବାଲ୍ ଷ୍ଟଡିଜ୍‌ରେ ଭଙ୍ଗାରୁଜା ଏବଂ ପଥର ଫିଙ୍ଗା ଘଟଣା ପରେ ଦାୟର ହୋଇଥିବା ଏଫଆଇଆରରେ ପ୍ରିନ୍ସ ଯାଦବଙ୍କ ନାମ ପୂର୍ବରୁ ଅଭିଯୁକ୍ତ ଭାବରେ ଦର୍ଶାଯାଇଥିଲା । କୋଚିଂ ଇନଷ୍ଟିଚ୍ୟୁଟ୍ ହିଂସା ମାମଲାରେ ରୋଶନ ଆନନ୍ଦଙ୍କୁ ଜୁନ ୩ ତାରିଖରେ ଗିରଫ କରାଯାଇଥିଲା ଏବଂ ଜାମିନ ପାଇବା ପୂର୍ବରୁ ପ୍ରାୟ ୧୨ ଦିନ ନ୍ୟାୟିକ ହାଜତରେ ରହିଥିଲେ ।