Bramunda Kidnap Attempt / ବରମୁଣ୍ଡାରେ ଭୟରେ ଦୌଡ଼ି ଗଳିରେ ଲୁଚିଲେ ଯୁବତୀ, ଅପହରଣ ପାଇଁ ପିଛା କରୁଥିଲେ ଦୁର୍ବୃତ୍ତ

ରାଜଧାନୀରେ ଚାଞ୍ଚଲ୍ୟ । ବରମୁଣ୍ଡା ବସ୍‌ଷ୍ଟାଣ୍ଡରୁ ନାବାଳିକା ସମେତ ୩ ଯୁବତୀଙ୍କୁ ଅପହରଣ ଉଦ୍ୟମ ଅଭିଯୋଗ ହୋଇଛି । ଗତକାଲି ରାତିରେ ବରମୁଣ୍ଡା ବସ୍‌ଷ୍ଟାଣ୍ଡରୁ ଜଣେ ନାବାଳିକାଙ୍କ ସମେତ ୩ ଜଣ ଯୁବତୀଙ୍କୁ ଅପହରଣ ଉଦ୍ୟମ ହୋଇଥିବା ଅଭିଯୋଗ ଆସିଛି । ଏକ ଆଶ୍ରମ ସହ ଜଡିତ କିଛି ଏନଜିଓ କର୍ମଚାରୀ ଏହି ଯୁବତୀମାନଙ୍କୁ ଜିଲ୍ଲା ବାହାରକୁ ଚାଲାଣ କରିବା ପାଇଁ ଉଦ୍ୟମ କରୁଥିବା କଥା ମଧ୍ୟ ଚର୍ଚ୍ଚାକୁ ଆସିଛି ।

• ଗଳି ଓ ବସ ତଳେ ଲୁଚିଲେ

ସୋମବାର ରାତିରେ ଜଣେ ନାବାଳିକା ସହ ୩ ଯୁବତୀ ଭୟଭୀତ ଅବସ୍ଥାରେ ଦୌଡ଼ି ଦୌଡ଼ି ବରମୁଣ୍ଡା ବସ୍‌ଷ୍ଟାଣ୍ଡରେ ପହଞ୍ଚିଥିଲେ । ନିଜକୁ ବଞ୍ଚାଇବା ପାଇଁ ସେମାନେ ବସ୍‌ଷ୍ଟାଣ୍ଡ ନିକଟସ୍ଥ ଗଳି ଓ ବସ ତଳେ ଲୁଚି ଯାଇଥିଲେ । ସେହି ସମୟରେ ସଂପୃକ୍ତ ଏନଜିଓର କିଛି ମହିଳା କର୍ମଚାରୀ ସେମାନଙ୍କ ପିଛା କରୁଥିବା ଦେଖାଯାଇଥିଲା । ଘଟଣାକୁ ଦେଖି ବସ୍‌ଷ୍ଟାଣ୍ଡର ସୁରକ୍ଷାକର୍ମୀମାନେ ହସ୍ତକ୍ଷେପ କରି ଯୁବତୀମାନଙ୍କୁ ଉଦ୍ଧାର କରିଥିଲେ ।

• ଜିଲ୍ଲା ବାହାରକୁ ଚାଲାଣ ଉଦ୍ୟମ

ଉଦ୍ଧାର ସମୟରେ ଯୁବତୀମାନେ ତାଙ୍କ ଇଚ୍ଛା ବିରୋଧରେ ସେମାନଙ୍କୁ ନିଆଯାଉଥିବା କଥା କହିଥିବା ଜଣାପଡ଼ିଛି । ପରେ ସୁରକ୍ଷାକର୍ମୀମାନେ ସେମାନଙ୍କୁ ବରମୁଣ୍ଡା ବସ୍‌ଷ୍ଟାଣ୍ଡ ଫାଣ୍ଡି ପୋଲିସ ଜିମା ଦେଇଥିଲେ । ପୋଲିସ ଯୁବତୀମାନଙ୍କୁ ପଚରାଉଚରା କରିବା ପରେ ସର୍ଟ ଷ୍ଟେ ହୋମରେ ରଖିଥିବା ବେଳେ, ଘଟଣାସ୍ଥଳ ଓ ଆଖପାଖ ଅଞ୍ଚଳର ବିଭିନ୍ନ ସିସିଟିଭି ଫୁଟେଜ ଯାଞ୍ଚ କରିଛି । ତେବେ ଏହି ଘଟଣା ପରେ ସଂପୃକ୍ତ ଏନଜିଓ ସଂସ୍ଥା ଏବଂ ଆଶ୍ରମର କର୍ମଚାରୀଙ୍କ କାର୍ଯ୍ୟକଳାପକୁ ନେଇ ଗଭୀର ସନ୍ଦେହ ସୃଷ୍ଟି ହୋଇଛି ।

ପଢନ୍ତୁ ଏହି ଖବର: ରାଜଧାନୀରେ ଛାତ୍ରୀଙ୍କୁ ୫ ଘଣ୍ଟା ଅପହରଣ; ବାଇକ୍‌ରେ ଆସି ଉଠାଇନେଲେ ଦୁର୍ବୃତ୍ତ

ସୂଚନା ଥାଉ କି, ରାଜଧାନୀରେ କିଛି ମାସ ପୂର୍ବରୁ ଜଣେ ଅଷ୍ଟମ ଶ୍ରେଣୀ ଛାତ୍ରୀଙ୍କୁ ଅପହରଣ କରାଯାଇଥିଲା । ଅପହରଣର ୫ ଘଣ୍ଟା ପରେ କ୍ୟାପିଟାଲ୍ ହସ୍ପିଟାଲ୍‌ରେ ଛାଡ଼ିଥିଲେ ଦୁର୍ବୃତ୍ତ । ସୋମବାର ଅପରାହ୍ନରେ ଛାତ୍ରୀ ଜଣଙ୍କ ସ୍କୁଲ୍ ଛୁଟି ପରେ ଗେଟ୍‌କୁ ଆସିବା ବେଳେକୁ ବସ୍ ପଳାଇଥିଲା । ଏହାପରେ ପରିବାର ଲୋକଙ୍କୁ ଛାତ୍ରୀ ଜଣଙ୍କ ବସ୍ ପଳାଇଥିବା ଜଣାଇଥିଲେ । ପରିବାର ଲୋକ ସ୍କୁଲ୍‌ରେ ପହଞ୍ଚିବା ବେଳକୁ ସେଠାରେ ଝିଅକୁ ପାଇ ନଥିଲେ । ଏହାପରେ ସେମାନେ ତୁରନ୍ତ ପୋଲିସ ନିକଟରେ ଅଭିଯୋଗ କରିଥିଲେ । ଆଖପାଖରେ ଲାଗିଥିବା ସିସିଟିଭି ଫୁଟେଜ୍ ଅନୁଧ୍ୟାନ କରିଥିଲା ପୋଲିସ । ବାଇକ୍‌ରେ ଦୁର୍ବୃତ୍ତ ଆସି ଛାତ୍ରୀ ଜଣଙ୍କ ମୁହଁରେ ସ୍ପ୍ରେ ମାରି ଅପହରଣ କରି ନେଇଥିଲେ ।