Bhubaneswar Murder Case / କୁଞ୍ଜଲତା ନନ୍ଦ ହତ୍ୟାକାଣ୍ଡ: ମୁଖ୍ୟ ଅଭିଯୁକ୍ତକୁ ଧରାଇଦେଲା ମୋବାଇଲ, ସୁରଟରୁ ବଳଭଦ୍ରକୁ ଧରିଲା ପୋଲିସ

ଭୁବନେଶ୍ବର କୁଞ୍ଜଲତା ନନ୍ଦ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ବଳଭଦ୍ର ମହାରଣାକୁ ଧରାଇଦେଲା ମୋବାଇଲ୍ । ଲୁଧିଆନାରୁ ସୁରଟରେ ପୋଲିସ ଜାଲରେ ଧରାପଡ଼ିଲା ଫେରାର ହତ୍ୟାକାରୀ । କୁଞ୍ଜଲତା ନନ୍ଦ ହତ୍ୟାକାଣ୍ଡ ପରଠାରୁ ଫେରାର ଥିବା ମୁଖ୍ୟ ଅଭିଯୁକ୍ତ ବଳଭଦ୍ର ମହାରଣା ଶେଷରେ ପୋଲିସର ଜାଲରେ ପଡ଼ିଛି । ପୋଲିସକୁ ଚକମା ଦେବା ପାଇଁ ସେ ବାରମ୍ବାର ନିଜର ମୋବାଇଲ୍ ନମ୍ବର ଏବଂ ଲୋକେସନ୍ ବଦଳାଉଥିଲା । ମାତ୍ର ଶେଷରେ ଏହି ମୋବାଇଲ୍ ହିଁ ତା'ର ପରିଚୟ ସାମ୍ନାକୁ ଆଣିଥିଲା ଏବଂ ଟେକ୍ନିକାଲ୍ ସର୍ଭିଲାନ୍ସ ଜରିଆରେ ପୋଲିସ ତା'ର ଠିକଣା ଜାଣିପାରିଥିଲା ।

ହତ୍ୟାକାଣ୍ଡ ପରେ ଅଭିଯୁକ୍ତ ବଳଭଦ୍ର ଓଡ଼ିଶା ଛାଡ଼ି ପ୍ରଥମେ ପଞ୍ଜାବର ଲୁଧିଆନା ଏବଂ ସେଠାରୁ ଗୁଜରାଟର ସୁରଟକୁ ଖସିଯାଇଥିଲା । ସୁରଟରୁ ପୁଣି ଦିଲ୍ଲୀ ଫେରାର ହେବା ପାଇଁ ସେ ଯୋଜନା କରୁଥିବାବେଳେ ସୁରଟ କ୍ରାଇମବ୍ରାଞ୍ଚ ଏବଂ ଭଦୋଦରା ଗ୍ରାମାଞ୍ଚଳର ସ୍ପେଶାଲ ଅପରେସନ୍ ଗ୍ରୁପ୍ ଏକ ମିଳିତ ଅପରେସନ୍ କରି ତାକୁ କାବୁ କରିବାରେ ସଫଳ ହୋଇଛନ୍ତି । ବର୍ତ୍ତମାନ ପୋଲିସର ପଚରାଉଚରା ଏବଂ ତଦନ୍ତରୁ ହତ୍ୟାର ପୂରା ଷଡ଼ଯନ୍ତ୍ର, ଜବତ ସାମଗ୍ରୀ ଏବଂ ଲୁଟ୍ ଟଙ୍କା ସମ୍ପର୍କରେ ଅଧିକ ସୂଚନା ସାମ୍ନାକୁ ଆସୁଛି ।

ସେପଟେ ଧରାପଡ଼ିବା ପରେ ମୁଖ୍ୟ ଅଭିଯୁକ୍ତ ବଳଭଦ୍ର ମହାରଣାକୁ ସୁରଟରୁ ଭୁବନେଶ୍ୱର ଅଣାଯିବ । ଟ୍ରାନଜିଟ୍ ରିମାଣ୍ଡ ପାଇଁ କୋର୍ଟଙ୍କ ଅନୁମତି ମିଳିଛି । ଅଭିଯୁକ୍ତ ବଳଭଦ୍ରଙ୍କୁ ଭୁବନେଶ୍ୱର ଆଣିବା ପାଇଁ କମିଶନରେଟ୍ ପୋଲିସକୁ ଟ୍ରାନଜିଟ୍ ରିମାଣ୍ଡ ଅନୁମତି ମିଳିଛି । ସୁରଟର ଅଷ୍ଟମ ଅତିରିକ୍ତ ସିନିୟର ସିଭିଲ୍ ଜଜ୍ ତଥା ଏସିଜେଏମ୍ କୋର୍ଟ ଏହି ଅନୁମତି ପ୍ରଦାନ କରିଛନ୍ତି । ଭୁବନେଶ୍ୱର ଲକ୍ଷ୍ମୀସାଗର ଥାନାରେ ରୁଜୁ ହୋଇଥିବା ମାମଲା ଆଧାରରେ ପୋଲିସ ତାଙ୍କୁ ଓଡ଼ିଶା ଆଣିବ । କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ନଭେମ୍ବର ୧୧ ତାରିଖରୁ ନଭେମ୍ବର ୧୬ ତାରିଖ ସକାଳ ୧୧ଟା ପର୍ଯ୍ୟନ୍ତ ଟ୍ରାନଜିଟ୍ ରିମାଣ୍ଡ ମଞ୍ଜୁର କରାଯାଇଛି । ଆସନ୍ତା ୧୬ ତାରିଖ ସୁଦ୍ଧା ଅଭିଯୁକ୍ତଙ୍କୁ ଭୁବନେଶ୍ୱର ସ୍ଥିତ ସମ୍ପୃକ୍ତ କୋର୍ଟରେ ହାଜର କରିବାକୁ ସୁରଟ କୋର୍ଟ ନିର୍ଦ୍ଦେଶ ଦେଇଛନ୍ତି ।