କେରଳର ପଥନମଥିଟ୍ଟାରୁ ଏକ ଅତ୍ୟନ୍ତ ହୃଦୟବିଦାରକ ଘଟଣା ସାମ୍ନାକୁ ଆସିଛି । ରାତିରେ ଶୋଇଥିବା ସମୟରେ ଲଗାତାର କାନ୍ଦୁଥିବାରୁ ମାତ୍ର ୮ ମାସର ଏକ ଶିଶୁକନ୍ୟାକୁ ଗଳା ଚିପି ହ*ତ୍ୟା କରାଯାଇଥିବା ଅଭିଯୋଗ ହୋଇଛି । ଘଟଣାର ପ୍ରାୟ ୩ ବର୍ଷ ପରେ ପୋଲିସର ତଦନ୍ତରେ ଶିଶୁଟିର ମା’ ମଞ୍ଜୀଙ୍କୁ ଗିରଫ କରାଯାଇଛି । ଏହି ଘଟଣାରେ ମୁଖ୍ୟ ଅଭିଯୁକ୍ତ ସିଭନ୍ ଏବଂ ତାଙ୍କ ଭାଇ ଶକ୍ତିଙ୍କୁ ଧରିବା ପାଇଁ ପୋଲିସ ଖୋଜା ଜାରି ରଖିଛି ।

ଦାମ୍ପତ୍ୟ କଳହ ପରେ ଶିଶୁକୁ ନେଇ ଅଲପ୍ପୁଝା ଯାଇଥିଲେ ମା’
ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ୨୦୨୩ ମସିହାରେ ମଞ୍ଜୀଙ୍କର ତାଙ୍କ ସ୍ୱାମୀ ଇସାକ୍କିଙ୍କ ସହ ମତଭେଦ ହୋଇଥିଲା । ଏହାପରେ ସେ ନିଜର ୮ ମାସର ଶିଶୁକନ୍ୟାକୁ ଧରି ଅଲପ୍ପୁଝା ଚାଲିଯାଇଥିଲେ । ସେଠାରେ କାଲାରକୋଡ୍‌ର ଏକ ଦୋକାନରେ ମଞ୍ଜୀଙ୍କର ସିଭନ୍ ନାମକ ଜଣେ ବ୍ୟକ୍ତିଙ୍କ ସହ ପରିଚୟ ହୋଇଥିଲା । ସିଭନ୍ ତାଙ୍କର ଦେଖାଶୁଣା କରିବାର ପ୍ରତିଶ୍ରୁତି ଦେଇ ମଞ୍ଜୀଙ୍କୁ ଚଙ୍ଗନାସେରୀକୁ ନେଇଯାଇଥିଲେ । ସେଠାରେ ଦୁହେଁ ଏକ ଦୋକାନର ବାରଣ୍ଡାରେ ରହୁଥିଲେ ।

କାନ୍ଦିବାରୁ ରାଗିଯାଇ ଶିଶୁର ଗଳା ଚିପି ହ*ତ୍ୟା କରିଥିବା ଅଭିଯୋଗ
୨୦୨୩ ଅଗଷ୍ଟ ମାସର ଗୋଟିଏ ରାତିରେ ଶିଶୁକନ୍ୟାଟି ଶୋଇଥିବା ସମୟରେ କାନ୍ଦିବାକୁ ଲାଗିଥିଲା । ଶିଶୁର କାନ୍ଦଣା ଶୁଣି ସିଭନ୍ ରାଗିଯାଇ ତା’ର ଗଳା ଚିପି ହ*ତ୍ୟା କରିଥିବା ଅଭିଯୋଗ ହୋଇଛି । ଘଟଣା ପରେ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ସିଭନ୍ ଓ ମଞ୍ଜୀ, ସିଭନ୍‌ଙ୍କ ସାନଭାଇ ଶକ୍ତିଙ୍କ ସହାୟତାରେ ଶିଶୁର ମୃ*ତଦେହକୁ କେରଳର ପଥନମଥିଟ୍ଟା ଜିଲ୍ଲାର ବଲାଞ୍ଜାଭଟ୍ଟମ୍ ଅଞ୍ଚଳର ଏକ ଦଳିଆ ଘାସ ପଡ଼ିଆରେ ଫିଙ୍ଗି ଦେଇଥିବା ପୋଲିସ ତଦନ୍ତରୁ ଜଣାପଡ଼ିଛି ।
୧୨ ଅଗଷ୍ଟ ୨୦୨୩ରେ ପୁଲିକୀଝୁ ପୋଲିସ ଥାନା ଅଧୀନ ବଲାଞ୍ଜାଭଟ୍ଟମ୍‌ର ଏକ ଦଳିଆ ଅଞ୍ଚଳରୁ ଶିଶୁଟିର ମୃ*ତଦେହ ଉଦ୍ଧାର ହୋଇଥିଲା । ଏହାପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା ।
ଏଥି ସହ ପଢନ୍ତୁ:   ଘର ଆଗରୁ ସ୍କୁଟିରେ ବସାଇ ନେଇ ମହାନଦୀ ପଠାରେ ହତ୍ୟା; ଧରାପଡ଼ିଲା ମୁଖ୍ୟ ଅଭିଯୁକ୍ତ

କଲୋନୀ ପ୍ରମୋଟରଙ୍କ ସନ୍ଦେହରୁ ଖୋଲିଲା ତିନି ବର୍ଷ ପୁରୁଣା ରହସ୍ୟ
ମଞ୍ଜୀ ଶିଶୁକନ୍ୟା ବିନା ପଲକ୍କଡ୍‌ସ୍ଥିତ ନିଜ କଲୋନୀକୁ ଫେରିଥିଲେ। ଏହା ଦେଖି କଲୋନୀର ପ୍ରମୋଟର ଶିଶୁଟି କେଉଁଠି ବୋଲି ପଚାରିଥିଲେ । ମଞ୍ଜୀ ସନ୍ତୋଷଜନକ ଉତ୍ତର ଦେଇ ନପାରିବାରୁ ପ୍ରମୋଟରଙ୍କ ସନ୍ଦେହ ହୋଇଥିଲା ଏବଂ ସେ ତୁରନ୍ତ ପୋଲିସକୁ ଖବର ଦେଇଥିଲେ ।

ଏହାପରେ ପୋଲିସ ମଞ୍ଜୀଙ୍କୁ ହେପାଜତକୁ ନେଇ ପଚରାଉଚରା କରିଥିଲା । ପୋଲିସର ଦାବି ଅନୁଯାୟୀ, ପଚରାଉଚରା ସମୟରେ ମଞ୍ଜୀ ଘଟଣା ସମ୍ପର୍କରେ ତଥ୍ୟ ପ୍ରକାଶ କରିଥିଲେ । ପରେ ତାଙ୍କୁ ଅଦାଲତରେ ହାଜର କରାଯାଇ ନ୍ୟାୟିକ ହେପାଜତକୁ ପଠାଯାଇଛି ।

ମୁଖ୍ୟ ଅଭିଯୁକ୍ତଙ୍କୁ ଧରିବାକୁ SITର ତଦନ୍ତ ଜାରି
ତିରୁଭଲ୍ଲାର ଡେପୁଟି ସୁପରିଣ୍ଟେଣ୍ଡେଣ୍ଟ ଅଫ୍ ପୁଲିସ (DySP) ପି.ଆର୍. ସନ୍ତୋଷଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଏହି ମାମଲାର ତଦନ୍ତ କରୁଛି । ପୋଲିସ ମାମଲାରେ ସିଭନ୍‌ଙ୍କୁ ମୁଖ୍ୟ ଅଭିଯୁକ୍ତ, ଶକ୍ତିଙ୍କୁ ଦ୍ୱିତୀୟ ଅଭିଯୁକ୍ତ ଏବଂ ମଞ୍ଜୀଙ୍କୁ ତୃତୀୟ ଅଭିଯୁକ୍ତ ଭାବେ ନାମିତ କରିଛି । ମୁଖ୍ୟ ଅଭିଯୁକ୍ତ ସିଭନ୍ ଓ ତାଙ୍କ ଭାଇ ଶକ୍ତିଙ୍କୁ ଗିରଫ କରିବା ପାଇଁ ପୋଲିସର ବିଭିନ୍ନ ଟିମ୍ ସମ୍ଭାବ୍ୟ ଠିକଣାରେ ଚଢ଼ାଉ ଜାରି ରଖିଛନ୍ତି । ମାତ୍ର ୮ ମାସର ଶିଶୁକନ୍ୟାର ଏହି ମୃ*ତ୍ୟୁ ଘଟଣା ସମଗ୍ର ଅଞ୍ଚଳରେ ଗଭୀର ଆଲୋଡ଼ନ ସୃଷ୍ଟି କରିଛି ।