ହାତରେ ଖଣ୍ଡା ଧରି ହତ୍ୟା ଅଭିଯୁକ୍ତଙ୍କ ବାର୍ଥ ଡେ' ସେଲିବ୍ରେସନ । ରାଜଧାନୀରେ ଅଭିଯୁକ୍ତଙ୍କ ଆଚରଣକୁ ନେଇ ଚର୍ଚ୍ଚା । ୩ ହତ୍ୟା ଅଭିଯୁକ୍ତ କେକ୍ କାଟିବାର ଭିଡିଓ ଏବେ ସୋସିଆଲ ମିଡିଆରେ ବେଶ୍‌ ଭାଇରାଲ ହେଉଛି । ସ୍ୱତନ୍ତ୍ର ଟିମ୍‌ ଗଠନ କରି କମିସନରେଟ୍‌ ପୋଲିସର ତଦନ୍ତ ଆରମ୍ଭ । ଅଭିଯୁକ୍ତଙ୍କ ନିକଟରେ ପହଞ୍ଚିବାକୁ ପୋଲିସ ବିଛାଇଛି ଜାଲ ।

କାର ଉପରେ ଥୁଆ ହୋଇଛି କେକ୍ । ଆଉ ଏକ ବଡ଼ ଖଣ୍ଡାରେ ୩ ହତ୍ୟା ଅଭିଯୁକ୍ତ କାଟୁଛନ୍ତି କେକ୍ । ଏହି ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ସାମନ୍ତରାୟପୁର ମିଠା ଦୋକାନୀକୁ ବିଚ୍‌ ରାସ୍ତାରେ ହତ୍ୟା କରିବା ଘଟଣାର ମୁଖ୍ୟ ଅଭିଯୁକ୍ତ ଶ୍ରୀକିତ ବିଶ୍ୱାଳ ନିଜ ଜନ୍ମଦିନରେ ହାତରେ ଖଣ୍ଡା ଧରି କେକ୍‌ କାଟୁଥିବା ଦୃଶ୍ୟ ଦେଖିବାକୁ ମିଳିଛି । ପାଖରେ ଅଛନ୍ତି ଅମରେଶ ନାୟକ ହତ୍ୟା କାଣ୍ଡର ମୁଖ୍ୟ ରଘୁଆ ବାରିକ ଓ ବରମୁଣ୍ଡା ହତ୍ୟାକାଣ୍ଡର ଅଭିଯୁକ୍ତ ରିକି ।

ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓକୁ ଆଧାର କରି ତଦନ୍ତ ଆରମ୍ଭ କରିଛି କମିସନରେଟ୍‌ ପୋଲିସ । ଏଥିପାଇଁ ଗଠନ ହୋଇଛି ସ୍ୱତନ୍ତ୍ର ଟିମ୍‌ । ଖୁବଶୀଘ୍ର ଭାଇରାଲ ଭିଡିଓରେ ଥିବା ସମସ୍ତଙ୍କ ପାଖରେ ପୋଲିସ ପହଂଚିବାକୁ ବିଛାଇଛି ଜାଲ । ଏପରି ଘଟଣାକୁ ଗୁରୁତ୍ବର ସହ ନେଇଛି କମିସନରେଟ ପୋଲିସ ।

ଅପରାଧୀମାନେ ଜେଲରୁ ବାହାରିବା ପରେ ସେମାନଙ୍କ କାର୍ଯ୍ୟକଳାପ ଉପରେ କମିସନରେଟ୍‌ ପୋଲିସ ନଜର ରଖିବାକୁ ଦାବି କରିଛନ୍ତି ରାଜଧାନୀ ବାସିନ୍ଦା ।