ପୋଲିସ ଏସଆଇ ପରୀକ୍ଷା କେଳେଙ୍କାରୀ ମାମଲାରେ ଆସିଛି ସବୁଠାରୁ ବଡ଼ ଖୁଲାସା । ହାଇକୋର୍ଟଙ୍କ ଅର୍ଡର କପି ଏବଂ ସିବିଆଇର ତଦନ୍ତ ରିପୋର୍ଟରୁ ଯେଉଁ ତଥ୍ୟ ସାମ୍ନାକୁ ଆସିଛି, ତାହା ସମସ୍ତଙ୍କୁ ଚମକାଇ ଦେଇଛି । ୨୦୨୫ ଅକ୍ଟୋବର ପୂର୍ବରୁ, ଅର୍ଥାତ୍ ମାର୍ଚ୍ଚ ମାସରେ ହିଁ ପ୍ରଶ୍ନପତ୍ର ଲିକ୍‌ର ବ୍ଲୁ-ପ୍ରିଣ୍ଟ ପ୍ରସ୍ତୁତ ସରିଥିଲା । ଆଶାୟୀ ପିଲାଙ୍କୁ ଭୁବନେଶ୍ୱରରୁ ଦିଘା, ଆଉ ଦିଘାରୁ ସୁନ୍ଦରବନର ରସୋର୍ଟକୁ ନିଆଯାଇଥିଲା । ଓପିଆରବି ଅଧରାତିରେ ପରୀକ୍ଷା ତ ବାତିଲ୍ କରିଦେଲା, ହେଲେ ସେତେବେଳେ ଏହାର ତଦନ୍ତ କାହିଁକି କରାଗଲାନି ? କାହା ସ୍ୱାର୍ଥରେ ସେତେବେଳେ ମାମଲାକୁ ଚପାଇ ଦିଆଗଲା, ଯାହା ପାଇଁ ଅକ୍ଟୋବରରେ ପୁଣିଥରେ ଏତେ ବଡ଼ କେଳେଙ୍କାରୀ ଘଟିଲା ?

ପୋଲିସ ଏସଆଇ କେଳେଙ୍କାରୀ ମାମଲାରେ ୧୭ ଅଭିଯୁକ୍ତଙ୍କ ଜାମିନ ଆବେଦନ ଖାରଜ । ସିବିଆଇ ପକ୍ଷରୁ ଦାଖଲ ତଥ୍ୟରୁ ବଡ଼ ଖୁଲାସା ହୋଇଛି । ୨୦୨୫ ମାର୍ଚ୍ଚ ୫ ଓ ୬ରେ ହେବାକୁ ଥିଲା ଏସଆଇ ପରୀକ୍ଷା । ସିବିଆଇ ତଦନ୍ତରୁ ଜଣାପଡିଛି, ସେତେବେଳେ ୧୩୦ରୁ ୧୫୦ ଆଶାୟୀ ପିଲାଙ୍କୁ ଭୁବନେଶ୍ବରର ଚନ୍ଦ୍ରିକା ରିସୋର୍ଟରେ ରଖାଯାଇଥିଲା । ସେଠାରୁ ସେମାନଙ୍କୁ ଦିଘା ନିଆଯାଇଥିଲା । ପରେ ଦିଘାରୁ ପଶ୍ଚିମବଙ୍ଗ ସୁନ୍ଦରବନର ରୟାଲ୍ ବେଙ୍ଗଲ ରିସୋର୍ଟ ଏବଂ ସୁରଞ୍ଜନା ରିସୋର୍ଟରେ ରଖାଯାଇଥିଲା । ସେଠାରେ ପିଲାଙ୍କୁ ପ୍ରଶ୍ନ ପତ୍ର ଦିଆଯାଇଥାନ୍ତା । ତେବେ ଏ ସଂପର୍କରେ ଜାଣିବା ପରେ ଓପିଆରବି ଅଧରାତିରେ ପରୀକ୍ଷା ବାତିଲ କରିଦେଲା । ହେଲେ ପ୍ରଶ୍ନ,
ପ୍ରଶ୍ନପତ୍ର ଲିକ୍ ନେଇ କାହିଁକି ହେଲା ନାହିଁ ତଦନ୍ତ ? ପିଲାଙ୍କୁ କିଏ ନେଇଥିଲା ? କାହିଁକି ନେଇଥିଲା ? କାହିଁକି ହେଲାନାହିଁ ଯାଞ୍ଚ ? ପିଲାଙ୍କ ବଭିଷ୍ୟତ ସହ ସାଂଘାତିକ ଖେଳ ଷଡଯନ୍ତ୍ର ପଛରେ କିଏ ? ମାର୍ଚ୍ଚରେ ତଦନ୍ତ ନ କରି ଅକ୍ଟୋବର କେଳେଙ୍କାରୀ ପାଇଁ ହୋଇଥିଲା କି ଡିଲ୍ ?

ଏସଆଇ ପରୀକ୍ଷା କରାଇବା ପାଇଁ ଓପିଆରବି ଦାୟିତ୍ବ ଦେଇଥିଲା ଆଇଟିଆଇ ଲିମିଟେଡକୁ । ଆଇଟିଆଇ ସବଲେଟ୍ କଣ୍ଟ୍ରାକ୍ଟ ଦେଇଦେଲା ସୁରେଶ ନାୟକଙ୍କ ସିଲିକନ୍ ଟେକଲ୍ୟାବ୍ ପ୍ରାଇଭେଟ ଲିମିଟେଡକୁ । ଆଉ ସିଲିକନ୍ କାମ ଦେଇଦେଲା ଶଙ୍କର ପୃଷ୍ଟିର ପଞ୍ଚସଫ୍ଟ ଲିମିଟେଡକୁ । ଶଙ୍କର ଓ ସୁରେଶ ମିଶି କରିଥିଲେ କେଳେଙ୍କାରୀ । ଓପିଆରବି ଅଧିକାରୀଙ୍କ ସହ କୋଲକାତା ପ୍ରଶ୍ନପତ୍ର ଆଣିବାକୁ ଯାଇଥିଲେ ସୁରେଶ । ଚାଲାକି କରି ପ୍ରିଣ୍ଟିଂ ପ୍ରେସରେ ପ୍ରଶ୍ନପତ୍ର ସେଟ୍ ବଦଳାଇଦେଲେ । ତା'ପରେ ୨୫ ଲକ୍ଷରେ ପିଲାଙ୍କ ସହ କରିଥିଲେ ଡିଲ୍ । ନିଜକୁ ନିର୍ଦ୍ଦୋଷ ଓ ଗରିବ କହୁଥିବା ଗିରଫ ଅଭିଯୁକ୍ତ ବେଲ୍ ପାଇଁ ଲଗାଇଥିଲେ ୧୭ ଓକିଲଙ୍କୁ । ସେପଟେ ସିବିଆଇ ପକ୍ଷରୁ ଆଇନଜୀବୀ ସାର୍ଥକ ନାୟକ ବେଲ୍ ପ୍ରଦାନ ନ କରିବା ନେଇ କୋର୍ଟଙ୍କ ଆଗରେ ବଳିଷ୍ଠ ଯୁକ୍ତି ଉପସ୍ଥାପନ କରିଥିଲେ ।

ସେପଟେ ସ୍ୱାସ୍ଥ୍ୟଗତ କାରଣ ଦର୍ଶାଇ ଗତ ଫେବୃଆରୀ ୧୧ ତାରିଖରୁ ଅନ୍ତରୀଣ ଜାମିନରେ ଥିବା ମୁନା ମହାନ୍ତିକୁ ଆସନ୍ତା ୨୧ ଦିନ ମଧ୍ୟରେ ଆତ୍ମସମପର୍ଣ କରିବା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି ।