Liquor Death / ୪୮ ଘଣ୍ଟାରେ ୧୮ ମୃତ୍ୟୁ, ବିଷାକ୍ତ ମଦ ନେଲା ଜୀବନ

ମହାରାଷ୍ଟ୍ରର ପୁଣେ ଓ ପିମ୍ପରି-ଚିଞ୍ଚବଡ୍ ସହରରେ ବିଷାକ୍ତ ମଦ ପିଇ ମୃତ୍ୟୁ ଘଟଣା । ଏଯାବତ ମୃତକଙ୍କ ସଂଖ୍ୟା ୧୮ରେ ପହଞ୍ଚିଛି । ପ୍ରଥମରୁ ଏହାକୁ ପ୍ରାକୃତିକ କହୁଥିବା ପୋଲିସ ଏବେ ବିଷାକ୍ତ ମଦ ବିକୁଥିବା ଧାରା ଅନୁସାରେ ମାମଲା ରୁଜୁ କରିଛି ଏବଂ ୮ ଜଣଙ୍କୁ ପୋଲିସ ହେପାଜତକୁ ନେଇଛି । ପୋଲିସର କହିବାନୁସାରେ ମଦରେ ଜୀବନ ନେଉଥିବା ମିଥାନଲ ମିଶାଯାଇଥିଲା । ଏହାସହିତ ପୋଲିସ ୮ ଜଣ ମୃତକ ପରିବାରଙ୍କ ବୟାନ ମଧ୍ୟ ରେକର୍ଡ କରିଛି ।

• ଯୋଗେଶ ୱାନଖେଡେ ମୁଖ୍ୟ ସପ୍ଲାୟର

ବିଷାକ୍ତ ମଦ ମୃତ୍ୟୁ ମାମଲାରେ ଅଭିଯୁକ୍ତ ଯୋଗେଶ ୱାନଖେଡେ ବିରୋଧରେ ପୁଣେ ଦାପୋଡି ଥାନା ଅଞ୍ଚଳରେ ମାମଲା ରୁଜୁ କରାଯାଇଛି, ଯିଏକି ଅବୈଧ ଓ ବିଷାକ୍ତ ମଦ ସପ୍ଲାଏ କରୁଥିବା ଅଭିଯୋଗ ରହିଛି । ରାଜ୍ୟ ଅବକାରୀ ବିଭାଗର ପୋଲିସ ଅଧିକ୍ଷକ ଅତୁଲ କାଣ୍ଡେ କହିଛନ୍ତିଯେ ଅଭିଯୁକ୍ତ ଯୋଗେଶ ୱାନଖେଡେ ମଦରେ ବିଷାକ୍ତ ରାସାୟନିକ ପଦାର୍ଥ ମିଥାନଲ ମିଶାଇଥିଲା, ଯେଉଁ କାରଣରୁ ଏତେ ଲୋକଙ୍କ ମୃତ୍ୟୁ ଘଟିଛି ।

• ଏଠାକୁ କରୁଥିଲା ସପ୍ଲାଏ

ଅଭିଯୁକ୍ତ ଯୋଗେଶ ୱାନଖେଡେ ପୁଣେର ହଡପସର୍ ଓ ପିମ୍ପରି-ଚିଞ୍ଚବଡ୍ ସହରର ଫୁଗେୱାଡି ଅଞ୍ଚଳରେ ଏହି ବିଷାକ୍ତ ମଦ ତିଆରି କରାଯାଉଥିଲା । ଏହି ବେଆଇନ କାର୍ଯ୍ୟରେ ଲିପ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଧରିବା ଲାଗି ପୋଲିସ ଯାଞ୍ଚ ପ୍ରକ୍ରିୟାକୁ ତ୍ଵରାନ୍ଵିତ କରିଛି । ଅବକାରୀ ବିଭାଗ ଏହି ଘଟଣାରେ ଏଯାବତ ୩ ଅଲଗା ଅଲଗା ସ୍ଥାନରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ମାମଲାରେ ଆଉ ଜଣେ ନିଖୋଜ ଅଭିଯୁକ୍ତ କର୍ଣ୍ଣଲ ସିଂହ ବିରଖାକୁ ମଧ୍ୟ ପୋଲିସ ଖୋଜୁଛି । ଏହି ବ୍ୟକ୍ତି ଜଣକ ବେଆଇନ ମଦ କାରବାରର ମାଲିକ ଥିଲା ।

ପଢନ୍ତୁ ଏହି ଖବର: ମଦ ପ୍ରେମୀଙ୍କୁ ଝଟକା ଏବେ ମଦ କିଣିବା ହେଲା ମହଙ୍ଗା

ଅନ୍ୟ ଜଣେ ଅଭିଯୁକ୍ତ ବିକାଶ ସିଂହ ଏହି ପୂରା ଅଞ୍ଚଳରେ ବିଷାକ୍ତ ମଦ ବିକୁଥିଲା, ଯାହାକୁ ଯୋଗେଶ ଦ୍ଵାରା ସପ୍ଲାଏ କରାଯାଉଥିଲା । ଯୋଗେଶ ଯେଉଁ ଘରେ ରହୁଥିଲା, ସେଠାରୁ ଏହି ବେଆଇନ କାର୍ଯ୍ୟ କରୁଥିଲା । ଘଟଣାରେ ଯେଉଁ ଲୋକଙ୍କ ମୃତ୍ୟୁ ଘଟିଛି, ସେମାନେ ବିକାଶ ସିଂହ ଠିକଣାକୁ ଆସି ବିଷାକ୍ତ ମଦ ପିଇଥିଲେ । ପୋଲିସ ଏହି ସ୍ଥାନକୁ ସିଲ୍ କରି କାର୍ଯ୍ୟାନୁଷ୍ଠାନ ଆରମ୍ଭ କରିଛି ।

• ଏଯାବତ ବିଷାକ୍ତ ମଦ ପିଇ ୭ଜଣଙ୍କ ମୃତ୍ୟୁ ସ୍ପଷ୍ଟ

ପୋଲିସ ଅଧିକାରୀ ସନ୍ଦୀପ ଆଟୋଲେ ପିମ୍ପରି ଅଞ୍ଚଳରେ ବିଷାକ୍ତ ମଦ ପିଇ ୭ ଜଣଙ୍କ ମୃତ୍ୟୁ ଘଟିଥିବା ଏବେ ସ୍ଵୀକାର କରିଛନ୍ତି । ପୂର୍ବରୁ ପୋଲିସ ଏମାନଙ୍କ ମୃତ୍ୟୁ ପ୍ରାକୃତିକ ବୋଲି କହୁଥିଲା । ଏହି ୭ଜଣଙ୍କ ଶବ ବ୍ୟବଚ୍ଛେଦ ରିପୋର୍ଟରେ ବିଷାକ୍ତ ମଦ ଯୋଗୁଁ ମୃତ୍ୟୁ ଘଟିଥିବା ସ୍ପଷ୍ଟ ହୋଇଛି । ଅନ୍ୟମାନଙ୍କର ଶବ ବ୍ୟବଚ୍ଛେଦ ରିପୋର୍ଟ ଆସିଲେ ପୋଲିସ ଆଗାମୀ ସୂଚନା ଦେବ । ଏବେ ୩ ଜଣଙ୍କର ଚିକିତ୍ସା ଜାରି ରହିଛି ।

• କଠୋର କାର୍ଯ୍ୟାନୁଷ୍ଠାନ ପାଇଁ CMଙ୍କ ନିର୍ଦ୍ଦେଶ

ପୁଣେ ଓ ପିମ୍ପରି-ଚିଞ୍ଚବଡରେ ବିଷାକ୍ତ ମଦ ମୃତ୍ୟୁ ଘଟଣାରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀ ଉଭୟ ସହରର ପୋଲିସ ମୁଖ୍ୟକୁ ଘଟଣାର ଚେର ପର୍ଯ୍ୟନ୍ତ ଯାଇ ପ୍ରକୃତ ଦୋଷୀକୁ ଚିହ୍ନଟ କରିବାକୁ କହିଛନ୍ତି । ଏହି ବେଆଇନ କାର୍ଯ୍ୟରେ ଲିପ୍ତ କୌଣସି ବି ଦୋଷୀକୁ ନ ଛାଡ଼ିବାକୁ ସେ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ମଦ ମାଫିଆ ଓ ମଦ ତିଆରି ହେଉଥିବା ସ୍ଥାନଗୁଡ଼ିକରେ ପୋଲିସ ଚଢାଉ କରିଛି ।