Bangladeshi Suspects / ୩ ମାସ ହୋଟେଲରେ ଲୁଚିଥିଲେ, ଶାଢୀ ପିନ୍ଧି ବୁଲୁଥିଲେ ୪ ବାଂଲାଦେଶୀ

କୋଲକାତା: ପଶ୍ଚିମବଙ୍ଗର ପୁରୁଲିଆରେ ୪ ଜଣ ସନ୍ଦିଗ୍ଧ ବାଂଲାଦେଶୀ ନାଗରିକଙ୍କୁ ଧରିଛି ପୋଲିସ । ପୋଲିସ କହିଛି ଯେ ଏମାନେ ଗତ ୩ ମାସ ଧରି ଛଦ୍ମବେଶରେ ଏକ ହୋଟେଲରେ ରହୁଥିଲେ । ନିଜ ପ୍ରକୃତ ପରିଚୟ ଲୁଚାଇବା ଲାଗି ଏମାନେ ମହିଳାଙ୍କ ପୋଷାକ ପିନ୍ଧୁଥିଲେ । କେହି ଯେପରି ଏମାନଙ୍କୁ ଚିହ୍ନିବେ ନାହିଁ ସେଥିଲାଗି ଶାଢୀ, ନାଇଟି ଓ ସଲୱାର ସୁଟ୍ ପିନ୍ଧି ହୋଟେଲରୁ ବାହାରକୁ ବାହାରୁଥିଲେ ।

ପୋଲିସ ବିଶେଷ ସୂତ୍ରରୁ ଖବର ପାଇବା ପରେ ହୋଟେଲ ଉପରେ ଚଢାଉ କରିଥିଲେ । ସେପ୍ଟେମ୍ବର ୧୩ ତାରିଖରେ ଏମାନଙ୍କୁ ଅଟକ ରଖିଥିଲା । ରଘୁନାଥପୁରରେ ପୋଲିସ ଶାଢୀ ପିନ୍ଧିଥିବା ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିଥିଲା । ପୋଲିସ ତାକୁ ପ୍ରଥମେ ଅଟକାଇ ପଚରାଉଚୁରା କରିଥିଲା । ସେ ନିଜ ପରିଚୟ ମହମ୍ମଦ ତୌହିଦ ମଣ୍ଡଳ ବୋଲି କହିଥିଲା । ତୌହିଦ ବାଂଲାଦେଶର ରାଜୱାଡୀ ଅଞ୍ଚଳର ଅଧିବାସୀ । ପଚରାଉଚୁରା ବେଳେ ସେ ଅନ୍ୟ କିଛି ଜଣଙ୍କ ସହ ଭାରତ ଆସିଥିଲା ବୋଲି କହିଥିଲା । ଏମାନେ ସେପ୍ଟେମ୍ବର ପହିଲାରେ ନଦିଆ ଜିଲ୍ଲାର ଅନ୍ତର୍ଜାତୀୟ ସୀମା ଦେଇ ଭାରତରେ ପ୍ରବେଶ କରିଥିଲେ । ତୌହିଦଠାରୁ ସବୁ ଶୁଣିବା ପରେ ପୋଲିସ ପୁରୁଲିଆ ଟାଉନ ଥାନା ଅଞ୍ଚଳର ଏକ ହୋଟେଲରେ ଚଢାଉ କରିଥିଲା । ଏଠାରୁ ଅନ୍ୟ ୩ ଜଣ ସନ୍ଦିଗ୍ଧଙ୍କୁ ପୋଲିସ ହେପାଜତକୁ ନେଇଛି ।

১৩ সেপ্টেম্বর গোপন সূত্রের ভিত্তিতে রঘুনাথপুর থানার পুলিশ এক বাংলাদেশি নাগরিককে আটক করে। তার দেওয়া তথ্যের ভিত্তিতে পুরুলিয়া টাউন থানা এলাকায় আরও ৩ জনকে আটক করা হয়।আইনানুগ প্রক্রিয়ায় চারজনকেই ডিটেনশন সেন্টারে রাখা হয়েছে, বাংলাদেশে প্রত্যাবাসনের প্রক্রিয়া সম্পন্ন হয়েছে। pic.twitter.com/WXEezoEAxd

— Purulia Police (@PuruliaPolice) September 17, 2026

• ଛଦ୍ମ ନାଁରେ ହୋଟେଲରେ ରହୁଥିଲେ

ପୋଲିସ କହିଛି ଯେ ଧରାପଡ଼ିଥିବା ବାଂଲାଦେଶୀଙ୍କ ନାମ ମହମ୍ମଦ ଜାହିଦ ଇମନ, ସୁମନ ଶେଖ ଓ ଶାନ୍ତ ହୁସୈନ ବୋଲି ଜଣାପଡ଼ିଛି । ଏମାନେ ବାଂଲାଦେଶର ରାଜୱାଡି ଓ କୁଶଟିଆ ଜିଲ୍ଲାର ଅଧିବାସୀ । ତଦନ୍ତରୁ ଜଣାପଡ଼ିଛି ଯେ ଏହି ୪ ଜଣ ଯେଉଁ ହୋଟେଲରେ ରହୁଥିଲେ, ସେହି ରୁମ୍‌ଟି କମରା ମଣି ସରକାର ନାମକ ଜଣେ ମହିଳାଙ୍କ ଆଧାର କାର୍ଡରେ ବୁକ୍ ହୋଇଛି । ମନି ସରକାର ଉତ୍ତର ୨୪ ପ୍ରଗଣାର ଅଧିବାସୀ । ହୋଟେଲ ମାଲିକ କହିଛନ୍ତି ଯେ ରୁମ୍ ବୁକିଂ ଲାଗି କେବଳ ଜଣେ ବ୍ୟକ୍ତିଙ୍କ ଆଧାର କାର୍ଡ ନିଆଯାଇଥିଲା, ହେଲେ ସେଠାରେ ୪ଜଣ ରହୁଥିଲେ ।

ପଢନ୍ତୁ ଏହି ଖବର: ଅନୁପ୍ରବେଶକାରୀଙ୍କୁ ନିସ୍ତାର ନାହିଁ,ଓଡ଼ିଶାରୁ ହଟିବେ ବାଂଲାଦେଶ ଅନୁପ୍ରବେଶକାରୀ

• କେମିତି ଜାଣିପାରିଲେନି ହୋଟେଲ କର୍ମଚାରୀ ?

ହୋଟେଲ ମାଲିକ ନଜରୁଲ୍ ହକ୍ ପୋଲିସକୁ କହିଛନ୍ତି ଯେ ଏମାନେ ବାଂଲାଦେଶୀ ବୋଲି ସେ ଜାଣିନଥିଲେ । ସେମାନେ କେତେବେଳେ ହୋଟେଲରେ ୨ଦିନ ରହୁଥିଲେ ଓ ପରେ କେଉଁଆଡ଼େ ଚାଲିଯାଉଥିଲେ । ହୋଟେଲର ସୁରକ୍ଷାକର୍ମୀ ମାନେ କିଛି ଜାଣିପାରିନଥିଲେ । ଏମାନେ ହୋଟେଲ ବାହାରକୁ ଯିବା ସମୟରେ ଶାଢୀ, ନାଇଟି ଓ ସଲୱାର-ପଞ୍ଜାବୀ ପିନ୍ଧି ବାହାରୁଥିଲେ । ସେମାନେ ଟୋଟୋରେ ବାହାରକୁ ଯାଉଥିଲେ ଓ ପୁଣି ଫେରିଆସୁଥିଲେ । ସେମାନଙ୍କ ଚାଲିଚଳଣି ସମ୍ପୂର୍ଣ୍ଣ ମହିଳାଙ୍କ ପରି ଥିଲା, ଏଣୁ ସେମାନଙ୍କ ସନ୍ଦେହ ହୋଇନଥିଲା । ଏହି ୪ ସନ୍ଦିଗ୍ଧଙ୍କୁ ବର୍ତ୍ତମାନ ରଘୁନାଥପୁରର ଏକ ଡିଟେନ୍ସନ ସେଣ୍ଟରରେ ରଖାଯାଇଛି । ସେମାନେ କେମିତି ସୀମା ପାର କରି ରାଜ୍ୟରେ ପହଞ୍ଚିଲେ ସେ ନେଇ ପୋଲିସ ତଦନ୍ତ କରୁଛି ।