Ranya Rao / ୧୨୭ କେଜିରୁ ଅଧିକ ସୁନା ତସ୍କରୀ ମାମଲାରେ କଷ୍ଟମ୍ସ ବିଭାଗର ବଡ଼ କାର୍ଯ୍ୟାନୁଷ୍ଠାନ

ବେଙ୍ଗାଲୁରୁ: କନ୍ନଡ ଅଭିନେତ୍ରୀ ହର୍ଷବର୍ଦ୍ଧିନୀ ରାନ୍ୟା ରାଓଙ୍କ ଲାଗି ବଢ଼ିଲା ଅଡ଼ୁଆ । ସୁନା ତସ୍କରୀ ମାମଲାରେ କଷ୍ଟମ୍ସ ବିଭାଗ ବଡ଼ କାର୍ଯ୍ୟାନୁଷ୍ଠାନ କରିଛି । ମାମଲାରେ ରାନ୍ୟା ରାଓଙ୍କ ସମେତ ୪ ଜଣଙ୍କ ବିରୋଧରେ ଜରିମାନା ଲଗାଯାଇଛି ।

୪ ଅଭିଯୁକ୍ତଙ୍କ ବିରୋଧରେ କଷ୍ଟମ୍ସ ବିଭାଗ ୨୭୦.୮ କୋଟି ଟଙ୍କା ଜରିମାନା ଲଗାଇଛି । ୧୨୭ କେଜି ସୁନା ଚୋରା ଚାଲାଣ ମାମଲାରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । କଷ୍ଟମ୍ସ ଅନୁସାରେ, ଅଭିଯୁକ୍ତଙ୍କ ସିଣ୍ଡିକେଟ ମାର୍ଚ୍ଚ ୨୦୨୪ରୁ ମାର୍ଚ୍ଚ ୨୦୨୫ ମଧ୍ୟରେ ଭାରତକୁ ତସ୍କରୀ ମାଧ୍ୟମରେ ୧୨୭ କେଜିରୁ ଅଧିକ ସୁନା ଚାଲାଣ କରିଥିବା ଅଭିଯୋଗ ରହିଛି ।

EDର ତଦନ୍ତ ଅନୁସାରେ, ଏହି ସୁନାର ମୋଟ ମୂଲ୍ୟ ପ୍ରାୟ ୧୦୨.୫୫ କୋଟି ଟଙ୍କା ଥିଲା । ତଦନ୍ତରୁ ଜଣାପଡ଼ିଛି ଯେ, ସୁନାକୁ ଦେଶର ବିଭିନ୍ନ ସ୍ଥାନରେ ବିକ୍ରି କରାଯାଇଥିବା ଏବଂ ଟଙ୍କା ହାୱାଲା ଚ୍ୟାନେଲ ମାଧ୍ୟମରେ ହେରଫେର ହୋଇଥିବା ଅଭିଯୋଗ ରହିଛି ।

ମାମଲାଟି ୩ ମାର୍ଚ୍ଚ ୨୦୨୫ରେ ସାମ୍ନାକୁ ଆସିଥିଲା । ସେଦିନ ଦୁବାଇରୁ ବେଙ୍ଗାଲୁରୁ ଆସିବା ପରେ କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ ରାନ୍ୟା ରାଓଙ୍କୁ ଯାଞ୍ଚ କରାଯାଇଥିଲା । ତାଙ୍କଠାରୁ ୧୪.୨୧୩ କେଜି ବିଦେଶୀ ସୁନା ଜବତ ହୋଇଥିଲା । ସେତେବେଳେ ଜବତ ସୁନାର ମୂଲ୍ୟ ପ୍ରାୟ ୧୨.୫୬ କୋଟି ଟଙ୍କା ଥିଲା ।

ଏଥିସହ ପଢ଼ନ୍ତୁ: ଛାତ୍ର ଆନ୍ଦୋଳନ ବେଳେ ହିଂସା; ଅଭିଭାବକଙ୍କ ଠାରୁ କ୍ଷତି ଭରଣା କରିବେ ସରକାର 

ତଦନ୍ତ ପରେ ଏହି ମାମଲା କେବଳ ସେହି ଜବତ କରାଯାଇଥିବା ୧୪ କେଜି ସୁନାରେ ସୀମିତ ରହିନଥିଲା । ତଦନ୍ତକାରୀ ସଂସ୍ଥା ୨୦୨୪-୨୫ ମଧ୍ୟରେ ଆସିଥିବା ଅନ୍ୟ ସୁନା ଚାଲାଣ ସମ୍ପର୍କରେ ମଧ୍ୟ ତଦନ୍ତ କରିଥିଲା । ED କହିଛି ଯେ, ମୋଟ ୧୨୭.୨୮୭ କେଜି ସୁନା ତସ୍କରୀ ମାଧ୍ୟମରେ ଭାରତକୁ ଆସିଥିଲା ।

ତଦନ୍ତ ସମୟରେ ରାନ୍ୟା ରାଓଙ୍କ ଘରୁ ପ୍ରାୟ ୨.୬୭ କୋଟି ଟଙ୍କା ନଗଦ ଏବଂ ପ୍ରାୟ ୨.୦୬ କୋଟି ଟଙ୍କା ମୂଲ୍ୟର ସୁନା ଗହଣା ମିଳିଥିଲା । ED ଅନୁସାରେ, ଏହି ସମ୍ପତ୍ତି ମାମଲାର ଟଙ୍କା ହେରଫେର ତଦନ୍ତର ଅଂଶ ।

ଏହି ମାମଲାରେ ରାନ୍ୟା ରାଓଙ୍କ ସହ ତରୁଣ କୋଣ୍ଡୁରୁ ରାଜୁ, ସାହିଲ ସକରିୟା ଜୈନ ଏବଂ ଭରତ କୁମାର ଜୈନଙ୍କ ନାଁ ମଧ୍ୟ ଆସିଛି । କଷ୍ଟମ୍ସର ତଦନ୍ତରେ ଚାରି ଜଣଙ୍କ ଭୂମିକା ନେଇ ତଥ୍ୟ ଯାଞ୍ଚ କରାଯାଇଥିଲା । ଦୁବାଇରୁ ସୁନା ଆଣିବା, ଭାରତରେ ଏହାକୁ ବିକ୍ରି କରିବା ଏବଂ ଟଙ୍କାର ଦେଣନେଣ ହୋଇଥିବା ତଦନ୍ତରୁ ଜଣାପଡ଼ିଛି ।

କଷ୍ଟମ୍ସର ତଦନ୍ତରେ ବିମାନବନ୍ଦରର CCTV ଫୁଟେଜ୍, ଯାତ୍ରା ସମ୍ପର୍କିତ ରେକର୍ଡ, ଦସ୍ତାବିଜ, ଡିଜିଟାଲ ତଥ୍ୟ ଏବଂ ଆର୍ଥିକ ଦେଣନେଣର ରେକର୍ଡ ଯାଞ୍ଚ କରାଯାଇଛି । କଷ୍ଟମ୍ସର ୩୯୯ ପୃଷ୍ଠାର ଆଦେଶକୁ ନେଇ ପ୍ରକାଶିତ ରିପୋର୍ଟରେ ମଧ୍ୟ ଏହି ତଦନ୍ତ ସମ୍ପର୍କରେ ତଥ୍ୟ ଦିଆଯାଇଛି ।

ଏହି ମାମଲାରେ କଷ୍ଟମ୍ସର ଜରିମାନା ପ୍ରକ୍ରିୟା ଏବଂ ଅପରାଧିକ ମାମଲା ଅଲଗା ପ୍ରକ୍ରିୟା । ରିପୋର୍ଟ ଅନୁସାରେ, କଷ୍ଟମ୍ସର ଆଦେଶ ବିରୋଧରେ ଆଇନ ଅନୁସାରେ ଅପିଲ୍ କରିବାର ସୁଯୋଗ ମଧ୍ୟ ରହିଛି ।