Passenger Death / ଜେନେରାଲ ବଗିରେ ବାଡ଼ିଆପିଟା; ପିଟିପିଟି ନେଲେ ଯାତ୍ରୀଙ୍କ ଜୀବନ

ଜାତୀୟ ରାଜଧାନୀ ନୂଆଦିଲ୍ଲୀର ଶାହଦରା ରେଲୱେ ଷ୍ଟେସନରେ ଟ୍ରେନ୍ ଧରିବା ସମୟରେ ହୋଇଥିବା ବିବାଦରେ ଜଣେ ଯାତ୍ରୀଙ୍କ ମୃତ୍ୟୁ ଘଟିଛି । ପ୍ଲାଟଫର୍ମ ନମ୍ବର-୩ରେ ୟୋଗା ଏକ୍ସପ୍ରେସର ଜେନେରାଲ ବଗିରେ ଚଢିବା ଉଦ୍ୟମ ବେଳେ ଜଣେ ଯାତ୍ରୀଙ୍କୁ ଅନ୍ୟ ସହଯାତ୍ରୀ ଅତି ନିର୍ଦ୍ଦୟ ଭାବେ ପିଟିପିଟି ହତ୍ୟା କରିଛନ୍ତି । ଏବେ ଏହି ଘଟଣାର ସିସିଟିଭି ଫୁଟେଜ୍ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଆରପିଏଫ କର୍ମଚାରୀ ଯାତ୍ରୀଙ୍କୁ ଭିଡ଼ ଭିତରୁ ଉଦ୍ଧାର କରି ହସ୍ପିଟାଲକୁ ନେଇଥିଲେ ସୁଦ୍ଧା ତାଙ୍କର ମୃତ୍ୟୁ ଘଟିଛି ।

ଏହି ଘଟଣାଟି ଶାହଦରା ରେଳ ଷ୍ଟେସନର ପ୍ଲାଟଫର୍ମ ନମ୍ବର-୩ରେ ସକାଳ ପ୍ରାୟ ୬ଟାରେ ଘଟିଥିଲା । ହରିଦ୍ଵାର ଯାଉଥିବା ୟୋଗା ଏକ୍ସପ୍ରେସ ଯେତେବେଳେ ଆସି ପ୍ଲାଟଫର୍ମରେ ଅଟକିଥିଲା, ସେତେବେଳେ ଜେନେରାଲ ବଗିରେ ଚଢି ତୁରନ୍ତ ସିଟ୍ ଧରିବା ଲାଗି ଯାତ୍ରୀଙ୍କ ମଧ୍ୟରେ ଠେଲାପେଲା ଆରମ୍ଭ ହୋଇଥିଲା । ଏହି ସମୟରେ ଉତ୍ତର ପ୍ରଦେଶର ବାଗପତ ଅଞ୍ଚଳର ପଙ୍କଜ ଧାମାଙ୍କର କିଛି ଅନ୍ୟ ଯାତ୍ରୀଙ୍କ ସହିତ ଗଣ୍ଡଗୋଳ ହୋଇଥିଲା । ଝିମିଟି ଖେଳରୁ ମହାଭାରତ ପରି ଏହି ସାଧାରଣ ଘଟଣା ଶେଷରେ ହିଂସାକାଣ୍ଡରେ ପରିଣତ ହୋଇଥିଲା । କ୍ରୋଧିତ ସହଯାତ୍ରୀ ପଙ୍କଜକୁ ନିର୍ମମ ଭାବେ ମାଡ଼ ମାରିଥିଲେ । ତାଙ୍କୁ ପ୍ଲାଟଫର୍ମ ଚଟାଣରେ ପକାଇଥିଲେ ଓ ମାଡ଼ ମାରିବା ଆରମ୍ଭ କରିଥିଲେ ।

• ଭିଡିଓ ହେଉଛି ଭାଇରାଲ

ଏହି ନିନ୍ଦନୀୟ ଘଟଣାର ଏକ ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି, ଯାହାକି ରେଲୱେ ଷ୍ଟେସନରେ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଭିଡିଓରେ ଦେଖାଯାଉଛି ଯେ, ଘଟଣାସ୍ଥଳରେ ଉପସ୍ଥିତ ଜଣେ RPF କନଷ୍ଟେବଲ ବହୁ ଚେଷ୍ଟା କରି ଭିଡ଼ ଭିତରୁ ପଙ୍କଜକୁ ଉଦ୍ଧାର କରିଥିଲେ । ପ୍ରତ୍ୟକ୍ଷଦର୍ଶୀଙ୍କ ଅଭିଯୋଗ ଅନୁସାରେ, ପଙ୍କଜକୁ ରେଳ କର୍ମଚାରୀ ଜଣକ ଭିଡ଼ ଭିତରୁ ଉଦ୍ଧାର କରିଥିଲେ ସତ, କିନ୍ତୁ ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲକୁ ନିଆଯାଇନଥିଲା । ଏହି ଅଣଦେଖା କାରଣରୁ ତାଙ୍କୁ ସଠିକ୍ ସମୟରେ ଚିକିତ୍ସା ମିଳିନଥିଲା, ଫଳରେ ତାଙ୍କର ମୃତ୍ୟୁ ଘଟିଛି ।

• ଆଭ୍ୟନ୍ତରୀଣ ଆଘାତ ଯୋଗୁଁ ମୃତ୍ୟୁ

ଘଟଣା ସମ୍ପର୍କରେ ଖବର ପାଇବା ପରେ ଦିଲ୍ଲୀ ରେଳ ପୋଲିସ ଷ୍ଟେସନ (PS ODRS)ର ଟିମ ଷ୍ଟେସନରେ ପହଞ୍ଚିଥିଲେ । ନୂଆଦିଲ୍ଲୀ ରେଲୱେର ଡିସିପି ସଚିନ ଶର୍ମା କହିଛନ୍ତି ଯେ ଆହତ ଅବସ୍ଥାରେ ପୀଡ଼ିତ ପଙ୍କଜ ଧାମାଙ୍କୁ ଜିଟିବି ହସ୍ପିଟାଲ ନିଆଯାଇଥିଲା, ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପ୍ରାଥମିକ ଚିକିତ୍ସା ରିପୋର୍ଟ ଅନୁସାରେ, ମାରପିଟ ଯୋଗୁଁ ପଙ୍କଜଙ୍କ ଶରୀରର ଆଭ୍ୟନ୍ତରୀଣ ଅଙ୍ଗରେ ବଡ଼ ଆଘାତ ଲାଗିଥିଲା ଯାହାକି ମୃତ୍ୟୁର କାରଣ ପାଲଟିଥିଲା ।

ପଢନ୍ତୁ ଏହି ଖବର: ଟ୍ରେନ ଯାତ୍ରା ସମୟରେ ଏହି ଭୁଲ: ଆପଣଙ୍କୁ ଜେଲ୍ ପଠାଇପାରେ ନଚେତ୍ ଗଣିବେ ମୋଟା ଅଙ୍କର ଫାଇନ୍

ପୋଲିସ ଏହି ଘଟଣାରେ ତ୍ଵରିତ କାର୍ଯ୍ୟାନୁଷ୍ଠାନ ଗ୍ରହଣ କରି ଭାରତୀୟ ନ୍ୟାୟ ସଂହିତା (BNS)ର ଧାରା ୧୦୫ (ହତ୍ୟା) ଓ ଧାରା ୩(୫) ଅନୁଯାୟୀ ମାମଲା ରୁଜୁ କରିଛି । ବର୍ତ୍ତମାନ ପୋଲିସ ରେଳ ଷ୍ଟେସନରେ ଲାଗିଥିବା ସିସିଟିଭି ଫୁଟେଜ ଆଧାରରେ ମାରପିଟ କରିଥିବା ଲୋକଙ୍କୁ ଚିହ୍ନଟ କରୁଛି । ଚିହ୍ନଟ ପରେ ସେମାନଙ୍କୁ ତୁରନ୍ତ ଗିରଫ କରାଯିବ ବୋଲି ପୋଲିସ କହିଛି ।