Argus News - ଶୁଭମିତ୍ରା ହତ୍ୟା ମାମଲାରେ ନୂଆ ଖୁଲାସା, ପ୍ରଥମ ସ୍ତ୍ରୀଙ୍କୁ ବି ହତ୍ୟା କରିଥିଲା ଅଭିଯୁକ୍ତ ଦୀପକ

ମହିଳା ଟ୍ରାଫିକ୍ କନେଷ୍ଟବଳ ଶୁଭମିତ୍ରା ହତ୍ୟା ମାମଲାରୁ ହେଲା ନୂଆ ଖୁଲାସା । ଅଭିଯୁକ୍ତ ଦୀପକ ପ୍ରଥମ ସ୍ତ୍ରୀକୁ ବି କରିଥିଲା ହତ୍ୟା । ବିଜେଡିର ମୁଲତବୀ ପ୍ରସ୍ତାବରେ ଉତ୍ତର ରଖି ବଡ଼ ଖୁଲାସା କଲେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ । ୨୦୨୨ ମସିହାରେ ବୀମା ଟଙ୍କା ପାଇଁ ପ୍ରଥମ ସ୍ତ୍ରୀକୁ ହତ୍ୟା କରିଥିଲା ଦୀପକ । ଟ୍ରକ୍ ଧକ୍କାରେ ପ୍ରଥମ ସ୍ତ୍ରୀ ଅପର୍ଣ୍ଣାଙ୍କର ମୃତ୍ୟୁ ହୋଇଥିବା କହିଥିଲା ଦୀପକ ।

କିନ୍ତୁ ଦୀପକ ଯେଉଁ ଟ୍ରକ ଦୁର୍ଘଟଣା ଘଟାଇଥିବା କହିଥିଲେ ବାସ୍ତବରେ ସେଦିନ ସେହି ଟ୍ରକଟି ରାଉରକେଲାରେ ଥିଲା । ବିଜେଡି ସରକାର ଅମଳରେ ହୋଇଥିବା ତଦନ୍ତରେ ଘୋର ଅବହେଳା ହୋଇଥିଲା । ତେବେ କାହା ସ୍ୱାର୍ଥରେ ହତ୍ୟାକୁ ଲୁଚାଇ ଦିଆଯାଇଥିଲା ବୋଲି ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ପ୍ରଶ୍ନ କରିଛନ୍ତି । ଏବେ ଶୁଭମିତ୍ରା ହତ୍ୟା ମାମଲାରେ ମାତ୍ର ୧୦ ଦିନ ଭିତରେ ଦୀପକ ଧରାହେଲା ବୋଲି ଆଇନ ମନ୍ତ୍ରୀ କହିଛନ୍ତି ।

ସୂଚନା ଅନୁସାରେ, ମହିଳା ଟ୍ରାଫିକ୍ କନେଷ୍ଟବଳ ଶୁଭମିତ୍ରା ହତ୍ୟା ପରେ ଦୀପକଙ୍କ ବିରୋଧରେ ପ୍ରଥମ ପତ୍ନୀ ଅପର୍ଣ୍ଣା ପ୍ରିୟଦର୍ଶିନୀଙ୍କ ପରିବାର ଆଣିଥିଲେ ସାଂଘାତିକ ଅଭିଯୋଗ । ଶୁଭମିତ୍ରାଙ୍କ ପରି ଅପର୍ଣ୍ଣାଙ୍କୁ ହତ୍ୟା କରାଯାଇଛି । ଅଭିଯୋଗ ହୋଇଛି ଯେ ଦୁର୍ଘଟଣା ପୂର୍ବରୁ ଦୀପକଙ୍କ ସହ ବୁଲିବାକୁ ଯାଇଥିବା ନେଇ ଭଉଣୀକୁ ଫୋନ କରି ଜଣାଇଥିଲେ ଅପର୍ଣ୍ଣା । କିଛି ସମୟ ପରେ ଖୁଣ୍ଟୁଣୀ ଅଞ୍ଚଳରେ ଦୁର୍ଘଟଣା ଘଟିଥିବା ଅପର୍ଣ୍ଣାଙ୍କ ଘରକୁ ଫୋନ କରିଥିଲା ଦୀପକ । ଘରଲୋକ ମେଡିକାଲରେ ପହଞ୍ଚିବା ବେଳକୁ ଅପର୍ଣ୍ଣାଙ୍କ ମୃତ୍ୟୁ ହୋଇଯାଇଥିଲା ।

ସେପଟେ ଶୁଭମିତ୍ରାଙ୍କ ବାପା ଅଭିଯୁକ୍ତ ଦୀପକ ବିରୋଧରେ ଆଣିଥିଲେ ସାଂଘାତିକ ଅଭିଯୋଗ । ଅର୍ଗସ କ୍ୟାମେରାରେ ବଡ଼ ବୟାନ ଦେଇଥିଲେ ଶୁଭମିତ୍ରାଙ୍କ ବାପା । ୧ କୋଟି ୨୫ ଲକ୍ଷର ବୀମା ଟଙ୍କା ପାଇଁ ଶୁଭମିତ୍ରାଙ୍କୁ ହତ୍ୟା କରିଛି ଦୀପକ । ତେବେ ହତ୍ୟାକାଣ୍ଡ ପଛରେ ମାଷ୍ଟରମାଇଣ୍ଡ ଦୀପକର ବଡ଼ ଭାଇ ବୋଲି ବଡ଼ ଅଭିଯୋଗ କରିଥିଲେ ଶୁଭମିତ୍ରାଙ୍କ ବାପା ।

ସେ ଆହୁରି କହିଥିଲେ, ଶୁଭମିତ୍ରା ନାଁରେ ୧ କୋଟି ୨୫ ଲକ୍ଷ ଟଙ୍କାର ବୀମା କରିଥିଲା ଦୀପକ । ବୀମା ଟଙ୍କା ହାତେଇବାକୁ ଯୋଜନା କରିଥିଲେ ଦୀପକ ଓ ତା’ର ବଡ଼ ଭାଇ । ପ୍ରଥମ ସ୍ତ୍ରୀ ଅପର୍ଣ୍ଣା ନାଁରେ ବି ବୀମା କରିଥିଲା ଦୀପକ । ପ୍ରଥମ ସ୍ତ୍ରୀ ଅପର୍ଣ୍ଣା ନାଁରେ ଦୀପକ ଦେଢ଼ କୋଟି ଟଙ୍କାର ବୀମା କରିଥିଲା । ଆଉ ଅପର୍ଣ୍ଣାକୁ ମଧ୍ୟ ହତ୍ୟା କରିବା ପରେ ସେ ସେହି ଦେଢ଼ କୋଟି ଟଙ୍କା ହାତେଇଥିବା ଅଭିଯୋଗ କରିଛନ୍ତି ଶୁଭମିତ୍ରାଙ୍କ ବାପା । ଦୀପକ ହତ୍ୟା କରି ପାଉଥିବା ବୀମା ଟଙ୍କାକୁ ତା ଭାଇ ବ୍ୟବସାୟରେ ଲଗାଏ । ଅପର୍ଣ୍ଣା, ଶୁଭମିତ୍ରା ଭଳି ଆଉ କେତେ ଜଣଙ୍କୁ ଦୀପକ ଯୋଜନାବଦ୍ଧ ଭାବେ ହତ୍ୟା କରିଥିବ ବୋଲି ସେ ଅଭିଯୋଗ କରିଥିଲେ ।